ހާލުގައި ޖެހިގެން ކަމަށް ބުނެ، ސްރީލަންކާގެ ހަމްބަންޓޯޓާ ޕޯޓަށް ވަތް ޗައިނާގެ ބޯޓުގައި، ނުރައްކާތެރި ރޭޑިއޯއެކްޓިވް މާއްދާތަކެއް ހުރިކަން އެނގުނު ހިސާބުން، ބަނދަރު ދޫކޮށް ދިއުމަށް އެ ބޯޓަށް އަންގާފައި ވާނެ ކަމަށް، ސްރީލަންކާގެ އޮފިޝަލުން ވިދާޅުވެއްޖެއެވެ.
ސްރީލަންކާގެ އެޓޮމިކް އެނާޖީ އޮތޯރިޓީ (އެސްއެލްއޭއީއޭ) ގެ އިސް އޮފިޝަލެއް ކަމަށްވާ އަނީލް ރަންޖީތު ވިދާޅުވީ، އެ ބޯޓަކީ ރޮޓާޑެމްއިން ފުރައިގެން ޗައިނާއަށް ދަތުރު ކުރަމުން ދިޔަ ބޯޓެއް ކަމަށާ، ހަމްބަންޓޯޓާ ޕޯޓަށް އެ ބޯޓު ވަނީ، ޓެކްނިކަލް މައްސަލަތަކެއް ޖެހިގެން ކަމަށެވެ.
ނަމަވެސް، ލަންކާ ބަނދަރުގައި ބޯޓު ޑޮކް ކުރިއިރު، އެ ބޯޓުގައި ރޭޑިއޯއެކްޓިވް މާއްދާ ހުރިކަން ބަޔާން ކުރުމަށް ޗައިނާގެ އުޅަނދު ފެއިލްވެފައި ވާ ކަމަށްވެސް އެސްއެލްއޭއީއޭއިން ބުނެއެވެ.
މި ބޯޓަކީ ޗައިނާ މާޝަންޓްސް ޕޯޓް ހޯލްޑިންގް ކޮމްޕެނީގެ ބެލެހެއްޓުމުގެ ދަށުގައި އޮތް ބޯޓެކެވެ.
ގާނޫނު ހަދާ މަޖިލީހުގައި ވާހަކަދައްކަވަމުން މައި އިދިކޮޅު ލީޑަރު ސަޖީތު ޕްރޭމަދާސަ ވިދާޅުވީ، ޗައިނާގެ އުޅަނދުގެ ފުރިހަމަ އިންސްޕެކްޝަނެއް ހެދުމުގެ ފުރުސަތު، ހަމްބަންޓޯޓާ ޕޯޓްގެ ސަލާމަތާ ބެހޭ ކަންކަމާ ހަވާލު އޮތް ލަންކާގެ ކަނޑުގެ އަސްކަރިއްޔާއަށް ދީފައި ނުވާ ކަމަށެވެ.
ހަމްބަންޓޯޓާ ޕޯޓަށް ބޯޓު ވެއްދިއިރު، އެ ބޯޓުގައި ނުރައްކާ ކާގޯ ހުރިކަން، ލަންކާގެ އޭޖެންޓުވެސް ބަޔާންކޮށްފައި ނުވާ ކަމަށް ޕްރޭމަދާސަ ވިދާޅުވިއެވެ. ނިއުކްލިއާ ހަކަތަ އުފައްދާ ޕްލާންޓްތަކަށް ބޭނުންވާ ހަކަތަ އުފެއްދުމަށް ބޭނުން ކުރާ ރޭޑިއޯއެކްޓިވް މާއްދާތައް ހިފައިގެން ދަތުރު ކުރަމުން ދިޔަ އުޅަނދަކީ ކޮމާޝަލް އުސޫލުން މުދާ އުފުލާ ބޯޓެއް ކަންވެސް ޕްރޭމަދާސަ ވަނީ ފާހަގަ ކުރައްވާފައެވެ.
ތަރައްގީގެ ނަމުގައި ދަރަނި ދަންތުރާގައި ލަންކާ ޖައްސައިގެން އެ ގައުމުގެ ބަނދަރުތައް ތަރައްގީކޮށް، އެ ބަނދަރުތަކަށް ޗައިނާއިން އަތްގަދަކޮށް، ޗައިނާގެ އިސްތިއުމާރީ ވެރިކަން އެ ސަރަހައްދަށް ހިންގާ ކަމުގެ ޝަކުވާއަކީ ދޭތެރެ ދޭތެރެއިން ފެންމަތިވަމުން އަންނަ ޝަކުވާއެކެވެ. ޗައިނާއިން ލަންކާގެ ބަނދަރަށް އަތްގަދަ ކުރުމުގައި އިސްތިރާޖީ ދަހިވެތިކަން އޮތް ކަމަށްވެސް ތުހުމަތު ކުރެވެއެވެ.
