ހަވީރު ނޫހުގެ ޗެއާމަން އަދި ކުރީގެ ޔޫތު އެންޑް ސްޕޯޓްސް މިނިސްޓަރު ޑރ. މުހައްމަދު ޒާހިރު ހުސައިންގެ އަނބިކަނބަލުން، ނާއިލާ އިބްރާހިމް ކަލޭފާނު މިއަދު އަވަހާރަވެއްޖެއެވެ.
ނާއިލާ އަވަހާރަވީ ވަރަށް ގިނަ ދުވަސްތަކަކު އާލާސްކަންފުޅާ އުޅުއްވުމަށް ފަހު މިއަދު ހެނދުނުއެވެ. ނައިލާ އަވަހާރަވީ އުމުރުފުޅުން 72 އަހަރު ގައެވެ.
މައުލޫމާތު ލިބިފައިވާގޮތުގައި ނާއިލާ އަވަހާރަވެގެން ކޮވިޑް-19 އަށް ޓެސްޓް ކުރުމުން ނަތީޖާ ވަނީ ޕޮޒިޓިވް ވެފައެވެ. އެކަމާ ގުޅިގެން އަދި އެޗްޕީއޭގެ ބަހެއް ލިބިފައެއް ނުވެއެވެ.
ނާއިލާ އަވަހާރަވިއިރު ފިރިކަލުންނާއި ތިން ބޭފުޅުން ދުނިޔޭގައި އެބަތިއްބެވިއެވެ.
ނާއިލާ ތައުލީމު ހާސިލްކުރެއްވީ ސްރީލަންކާއާއި ނިއުޒީލޭންޑުންނެވެ.
ނާއިލާ އަކީ އަމީނިއްޔާ ސްކޫލުގައި އިނގިރޭސި އާއި ހިސްޓްރީ ކިޔަވާ ދެއްވި މަޝްހޫރު ޓީޗަރަކެވެ. އެސުކޫލުގައި 25 ވަރަކަށް އަހަރު ވަންދެން ނައިލާ ކިޔަވާދެއްވާފައިވެއެވެ.
ނައިލާ އަކީ މޮޅު ކެއްކުންތެރިއެއް ވެސް މެއެވެ. އެގޮތުން ނައިލާ ވަނީ "ޒީނާރު" ގެ ނަމުގައި ކެއްކުމާ ބެހޭ ހާއްސަ ފޮތެއް ނެރުއްވާފައެވެ.
