ސްރީލަންކާގެ ސަރުކާރުން އެކުލަވާލާފައިވާ "ކޮލަމްބޯ ޕޯޓް ސިޓީ އިކޮނޮމިކް ކޮމިޝަން ބިލް" އާއެކު، ކޮލަމްބޯ ޕޯޓަކީ، ޗައިނާގެ އިސްތިއުމާރީ ބާރު ހިނގާ ކޮލަނީއަކަށް ވެގެންދާނެ ކަމަށް، ސްރީލަންކާގެ ގާނޫނު ހަދާ މަޖިލީހުގެ މެންބަރު، ވިޖޭޔަދާސަ ރާޖަޕަކްޝެ ވިދާޅުވެއްޖެއެވެ.
އެމްޕީ ރާޖަޕަކްޝެ ވިދާޅުވީ، "ކޮލަމްބޯ ޕޯޓް ސިޓީ އިކޮނޮމިކް ކޮމިޝަން ބިލް" މެދުވެރިކޮށް، ޗައިނާއާ ޕޯޓް ސިޓީ ހަވާލު ކުރުމަށް ލަންކާގެ ސަރުކާރުން މަސައްކަތް ކުރަމުން އަންނަ ކަމަށެވެ.
ނޫސްވެރިންގެ ބައްދަލުވުމެއްގެ ވާހަކަދައްކަވަމުން އެމްޕީ ރާޖަޕަކްޝެ ވިދާޅުވީ، މި ބިލުގެ ބައެއް ބައިތަކަކީ ޣައިރު ގާނޫނީ ބައިތަކެއް ކަމަށާ، މިއީ ވަރަށް ނުރައްކާ ބިލެއް ކަމަށެވެ. ކުރީގެ ބޮޑު ވަޒީރު ރަނީލް ވިކްރަމަސިންހަ، ހަމްބަންޓޯޓާ ޕޯޓް ހަވާލު ކުރެއްވީ އެއްބަސްވުމެއްގެ ދަށުން ކަމަށާ، ނަމަވެސް ގާނޫނެއްގެ ދަށުން ޗައިނާއާ ޕޯޓް ސިޓީ ހަވާލު ކުރުމަކީ ހަމްބަންޓޯޓާ ޕޯޓް ޕްރޮޕޯސަލަށް ވުރެ ނުރައްކާ ކަމެއް ކަމަށްވެސް އެމްޕީ ރާޖަޕަކްޝެ ވިދާޅުވިއެވެ.
"ކޮލަމްބޯ ޕޯޓް ސިޓީ އިކޮނޮމިކް ކޮމިޝަން ބިލް" އާއެކު، ކޮލަމްބޯ ޕޯޓަކީ، ޗައިނާގެ އިސްތިއުމާރީ ބާރު ހިނގާ ކޮލަނީއަކަށް ވެގެންދާނެ ކަމަށް ވިދާޅުވަމުން އެމްޕީ ރާޖަޕަކްޝެ ވިދާޅުވީ، އެ ތަނަކީ ބޭރު މީހުންނަށް މިލްކު ކޮށް، ވިއްކާލެވޭނެ ތަނަކަށް ވާނެ ކަމަށެވެ.
އެމްޕީ ރާޖަޕަކްޝެ ވިދާޅުވީ، ކޮލަމްބޯ ޕޯޓް މަޝްރޫއުގެ ތެރެއިން ހިއްކި 1100 އޭކަރުގެ ބިމަކީ ސްރީލަންކާގެ ޗާޓުގައި ހިމަނާފައި ވާ ބައެއް ނޫން ކަމަށާ، އެ ސަރަހައްދުގެ ކަންކަން ބެލެހެއްޓުމަށް ހާއްސަ ކޮމިޝަނެއް އެކުލަވާލާ ކަމަށެވެ. އެ ކޮމިޝަނުން އަމަލު ކުރާނީ، ޗައިނާގެ ޑިމާންޑްތަކާ އެއްގޮތަށް ކަމަށްވެސް ރާޖަޕަކްޝެ ވިދާޅުވިއެވެ. އަދި ސްރީލަންކާގައި މިހާރު ތަންފީޒު ކުރަމުންދާ ބައެއް ގާނޫނުތަކަކީ ޕޯޓް ސިޓީގެ މައްޗަށް ތަންފީޒުވާ ގާނޫނުތަކެއް ނޫންކަންވެސް އޭނާ ވަނީ ފާހަގަ ކުރައްވާފައެވެ.
ސްރީލަންކާގެ ގިނަ ޕާޓީތަކަކުން ދަނީ "ކޮލަމްބޯ ޕޯޓް ސިޓީ އިކޮނޮމިކް ކޮމިޝަން ބިލް" އާ ދެކޮޅަށް އެ ގައުމުގެ ސުޕްރީމް ކޯޓުގައި ގޮންޖަހަމުންނެވެ.
