އިސްރާއީލާއެކު އާންމު އުސޫލުން ގުޅުން ބަދަހި ކުރުމުގައި، ސަރަހައްދަށް އޮތް ފައިދާ ބޮޑު ކަމަށް ސައުދީ އަރަބިއްޔާގެ ފޮރިން މިނިސްޓަރު، ފައިސަލް ބިން ފަރްހާން އަލް ސައުދު ވިދާޅުވެއްޖެއެވެ.
މީޑިއާއަށް ދެއްވި ބަސްދީގަތުމެއްގައި ސައުދީގެ ފޮރިން މިނިސްޓަރު ވިދާޅުވީ، އިސްރާއީލާއެކު ގުޅުން ބަދަހި ކުރުމުގެ އެއްބަސްވުން އިންތިހާއަށް ބަރޯސާ ވަނީ، ސުލްހައިގެ މަޝްވަރާތައް ކުރިއަށް ދާ ގޮތެއްގެ މައްޗަށް ކަމަށެވެ.
ސައުދީއިން މީގެ ކުރިންވެސް ވަނީ، އިސްރާއީލާއެކު އާންމު އުސޫލުން ގުޅުން ބަދަހި ކުރާނީ، ފަލަސްތީނަކީ މިނިވަންކަމުގެ ސިޔާދު ލިބިފައިވާ ދައުލަތަކަށް ހެދުމުގެ ޕްލޭންގެ ތެރެއިން ކަން ހާމަކޮށްފައެވެ.
ޕްރިންސް ފައިސަލް ވިދާޅުވީ، ހަދަން ޖެހިފައި ވަނީ، ފަލަސްތީނުގެ ދައުލަތް، އޭގެ ޝަރަފާ ސިޔާދަތާއެކު ފަލަސްތީނުގެ ރައްޔިތުންވެސް ބަލައިގަންނަ ފަދަ ސުލްހައިގެ އެއްބަސްވުމެއް ކަމަށެވެ.
މި މޭރުމުން އޭނާ އިތުރަށް ވިދާޅުވީ، އިސްރާއީލާއެކު އާންމު އުސޫލުން ގުޅުން ބަދަހި ކުރުމަކީ، ގިނަ ދުވަސްތަކެއް ވަންދެން ސައުދީގެ ތަސައްވުރުގައި އޮތް ކަމެއް ކަމަށެވެ. އަދި ސައުދީއިން ތާއީދު ކުރަނީ، 1967 ވަނަ އަހަރުގެ ސަރަހައްދީ އިންތަކާއެކު، ފަލަސްތީނުގެ ދައުލަތް އުފެދިގެން ދިއުން ކަމަށްވެސް ސައުދީގެ ފޮރިން މިނިސްޓަރު ވަނީ ފާހަގަ ކުރައްވާފައެވެ.
މިދިޔަ ސެޕްޓެމްބަރު މަހު، އެކުވެރި އަރަބި އިމާރާތް (ޔޫއޭއީ) އަދި ބަހްރައިންއިން ވަނީ ސައުދީއާއެކު އާންމު އުސޫލުން ޑިޕްލޮމެޓިކް ގުޅުން ގާއިމު ކޮށްފައެވެ. އޭގެ ފަހުން، ސޫދާންއާއި މޮރޮކޯއިންވެސް ވަނީ އިސްރާއީލާއެކު އާންމު އުސޫލުން ގުޅުން ގާއިމު ކޮށްފައެވެ. ފަލަސްތީނުން ވަނީ މި އެއްބަސްވުންތައް ކުށްވެރިކޮށްފައެވެ.
