ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމާ ގުޅިގެން ވައިޓްހައުސްއިން އެކުލަވާލި ޓާސްކްފޯހުގައި ހިމެނޭ ހުރިހާ ޑޮކްޓަރުންނަށްވެސް މަރުގެ އިންޒާރު ދީފައި ވާ ކަމަށް، އެމެރިކާގެ ކުރީގެ ރައީސް، ޑޮނާލްޑް ޓްރަމްޕްގެ ވެރިކަމުގައި ވައިޓްހައުސް ކޮރޯނާވައިރަސް ރެސްޕޯންސް ކޯޑިނޭޓަރުގެ ގޮތުގައި މަސައްކަތް ކުރެއްވި ޑރ ޑެބްރާ ބާކްސް ވިދާޅުވެއްޖެއެވެ.
ސީއެންއެންގެ ނޫސްވެރިޔާ ޑރ ސަންޖޭ ގުޕުތާގެ ޑޮކިއުމަންޓްރީ، "ކޮވިޑް ވޯ: ދަ ޕެންޑަމިކް ޑޮކްޓާޒް ސްޕީކް އައުޓް"އަށް ދެއްވި އިންޓަވިއުއެއްގައި ޑރ ބާކްސް ވިދާޅުވީ، ހުރިހާ ޑޮކްޓަރުންނަށް މަރުގެ އިންޒާރު ލިބުނުއިރު، އޭނާގެ އަންހެން ދަރިންނަށްވެސް ހުތުރު މެސެޖުތައް ލިބުނު ކަމަށެވެ. ޖިންސީ ފުރައްސާރައިގެ މެސެޖުތަކުގެ އިތުރުން، އޭނާ ދުނިޔޭގައި ނެތް ނަމަ އެމެރިކާއަށް މާ ރަނގަޅުވާނެ ކަމަށް ބުނާ މެސެޖުތައްވެސް ލިބުނު ކަމަށް ޑރ ބާކްސް ވިދާޅުވިއެވެ.
ޑރ ބާކްސް ވިދާޅުވީ، މަރުގެ އިންޒާރުތަކުގެ މައްސަލަ، އެމެރިކާގެ ހާރިޖީ ވުޒާރާއަށް ހުށަހެޅުއްވި ކަމަށާ، ނަމަވެސް ފަހުން އެކަމާ އުޅުއްވަން، ވަގުތު ނުވީ ކަމަށެވެ.
އެމެރިކާގެ ތަޖުރިބާކާރު ޑޮކްޓަރު، ޑރ އެންތަނީ ފައޫޗީވެސް ވަނީ މިފަދަ އިޝާރާތެއް ކުރައްވާފައެވެ. އެގޮތުން، މަރުގެ އިންޒާރުތަކުގެ ނުރައްކަލާއެކު، ޑރ ފައޫޗީ ވަނީ އޭނާގެ ސެކިއުރިޓީ ވަރުގަދަ ކޮށްފައެވެ. މި ރިޕޯޓްތައް ފެންމަތިވީ މިދިޔަ އަހަރުގެ ޑިސެމްބަރު މަހުގެ ކުރީކޮޅުގައެވެ.
