ނައިފަރު ދާއިރާ މެންބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް ކޮވިޑް-19 އަށް ޕޮޒިޓިވް ވެއްޖެއެވެ.
ރައްޔިތުންގެ މަޖިލީހުގެ މީޑިއާ ޑިރެކްޓަރު ހަސަން ޒިޔާއު ވަނީ "ދަ ޕްރެސް" އަށް އެކަން ކަށަވަރުކޮށްދެއްވާފައެވެ. ޒިޔާއު ވިދާޅުވީ، ކޮވިޑަށް ޕޮޒިޓިވެފައިވާ ކަން ޝިޔާމް މަޖިލީހަށް ރަސްމީކޮށް އަންގަވާފައިވާ ކަމަށެވެ.
އެކަމާ ގުޅިގެން ޝިޔާމްގެ ބަހެއް ލިބޭގޮތެއް ނުވިއެވެ.
މިމަހުގެ ތެރޭގައި އެމްޑީޕީ ޕާލިމެންޓަރީ ގްރޫޕްގެ ލީޑަރު އަލީ އާޒީމް ވެސް ވަނީ ކޮވިޑަށް ޕޮޒިޓިވް ވެފައެވެ.
ރާއްޖޭގައި އަނެއްކާވެސް ކޮވިޑް ކޭސްތައް އިތުރުވާން ފަށާފައި ވާއިރު، އިއްޔެ 140 މީހަކު ވަނީ ރާއްޖެއިން ކޮވިޑަށް ޕޮޒިޓިވް ވެފައެވެ. އިއްޔެ ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 102 މީހަކާއި، ހިންގަމުން ދާ ރިސޯޓަކުން 14 މީހަކާއި މީހުން ދިރިއުޅޭ ރަށްރަށުން ޕޮޒިޓިވް ވި 17 މީހަކާއި ހަދަމުންދާ ރަށަކުން ޕޮޒިޓިވްވި މީހަކާއި ލިވަ ބޯޑުން 6 މީހެކެވެ.
މުޅި ރާއްޖެއިން މި ބައްޔަށް ޕޮޒިޓިވް ވި މީހުންގެ އަދަދު މިހާރު ވަނީ 22،513 އަށް އަރާފައެވެ.
މިހާތަނަށް ބަލިން ރަނގަޅުވި މީހުންގެ ޖުމްލަ އަދަދު 20،004 އަށް އަރާފައި ވާއިރު، ކޮވިޑް ޖެހިގެން ރާއްޖެއިން މަރުވި މީހުންގެ ޖުމްލަ އަދަދު ވަނީ 66 އަށް އަރާފައެވެ.
