ހއ. ފިއްލަދޫ ފަޅުތެރެއިން 25 ކިލޯގެ މަސްތުވާތަކެތި ފެނިއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން ފިއްލަދޫ ކައުންސިލްގެ ރައީސް މުހައްމަދު ފަލާހު ވިދާޅުވީ ފިއްލަދޫ ޖެޓީ ސަރަހައްދުން 50 ވަރަކަށް ބޮނޑި (ޕެކެޓް) މަސްތުވާތަކެތި ކަމަށް ޝައްކުކުރެވޭ އެއްޗެހި ފެނިފައިވާ ކަމަށެވެ. އަދި އެއީ 25 ކިލޯ ކަމަށް ފަލާހު ވަނީ ވިދާޅުވެފައެވެ.
އެތަކެތި ފެނުނީ މަހަށް ގޮސްފައި އައި ދޯންޏަކަށް ކަމަށް ފަލާހު ވަނީ ވިދާޅުވެފައެވެ.
ފަލާހު ވިދާޅުވީ އެތަކެތި ހުރީ ވަރަށް ރަނގަޅަށް ބަންދުކޮށްފައި ކަމަށާއި، އަދި ބަދުކޮށްފައި ހުރީ ރާއްޖޭގައި ބޭނުން ނުކުރާ ބާވަތެއްގެ ކޮފީ ޕެކެޓުތަކެއްގެ ތެރެއަށް ލާފައި، ގޯންޏެއްގެ ތެރޭގައި ކަމަށެވެ.
"ދަ ޕްރެސް" އަށް މައުލޫމާތު ދެއްވަމުން އެއަތޮޅު ވަށަފަރު ކައުންސިލްގެ ރައީސް މުހައްމަދު ވަހީދު ހަސަން ވިދާޅުވީ މިއަދުުގެ އެކި ފަހަރު މަތިން އެރަށު ޖެޓީ ސަރަހައްދުން ވެސް މަސްތުވާތަކެތި ކަމަށް ޝައްކުކުރެވޭ ހަތަރު ބޮނޑި ފެނިފައިވާ ކަމަށެވެ. އެއީ އެއް ކިލޯގެ ތަކެތި ކަމަށް ވަހީދު ވަނީ ވިދާޅުވެފައެވެ.
އެތަކެތި މިހާރު ފުލުހުންނާ ހަވާލުކޮށްފައިވާ ކަމަށް ވަހީދު ވަނީ ވިދާޅުވެފައެވެ.
ފުލުހުން ބުނީ ހއ ގެ ބައެއް ރަށްރަށަށް މަސްތުވާތަކެތި ކަމަށް ބެލެވޭ އެއްޗެހި ހުރި ޕެކެޓްތަކެއް ލައްގަމުން ދާތީ އެކަމާ ގުޅިގެން ހަރަކާތްތެރި ވަމުން ދާ ކަމަށެވެ.
