މަސްތުވާތަކެތީގެ މައްސަލައެއްގައި މީހަކު އުމުރަށް ޖަލަށް ލާން ހައިކޯޓުން މިއަދު ހުކުމް ކޮށްފިއެވެ.
ހައިކޯޓުން އުމުރަށް ޖަލަށް ލާން ހުކުމް ކޮށްފައި ވަނީ ހދ. ހިރިމަރަދޫ ހިޔާވަހި، އަހްމަދު ނަބީހުއެވެ.
މިމައްސަލަ ނިންމައި ކުރި ހުކުމްގައި ވަނީ މަސްތުވާ ތަކެއްޗާ ބެހޭ ގާނޫނުގެ ދަށުން، އަހްމަދު ނަބީހުގެ މައްޗަށް ކެނެބިސް ޓްރެފިކް ކުރުމުގެ ކުށް ގާނޫނު އަސާސީގެ 51 ވަނަ މާއްދާގައިވާ، އެކަށީގެންވާ ޝައްކެތްނެތް މިންވަރަށް ޝަރީއަތަށް ސާބިތުވާ ކަމަށެވެ.
އޭގެ އިތުރުން ކެނަބިސް ޓްރެފިކް ކުރުމުގެ ކުށުގެ އުގޫބާތެއްގެ ގޮތުން މަސްތުވާ ތަކެއްޗާ ބެހޭ ގާނޫނުގެ ދަށުން ނަބީހު އުމުރަށް ޖަލަށް ލުމާއެކު 100,000ރ އިން ޖޫރިމަނާ ކުރާ ކަމަށެވެ.
މި މައްސަލަ ބަލާ ހުކު މްކުރި ހައިކޯޓުގެ ފަނޑިޔާރުންނަކީ ފަނޑިޔާރު މުހައްމަދު ނިޔާޒު އާއި ފަނޑިޔާރު ހުސެއިން މަޖީދު އަދި ފަނޑިޔާރު މުހައްމަދު ފައިސަލްއެވެ.
މި މައްސަލައިގައި ހދ. ހިރިމަރަދޫ މެޖިސްޓްރޭޓް ކޯޓުން މީގެ ކުރިން ވަނީ ނަބީހުގެ މައްޗަށް ކުށް ސާބިތު ނުވާކަމަށް ކަނޑައަޅާފައެވެ.
