އެޗްޕީއޭގެ އުސޫލުތަކާ ހިލާފަށް އެއްވުންތައް ބާއްވާ ނުވަތަ އެ އެއްވުންތަކުގައި ބައިވެރިވާ މީހުންނާމެދު ވަގުތުން ފިޔަވަޅު އަޅާނެ ކަމުގެ އިންޒާރު ދީފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި މާލެ ސިޓީ ފުލުހުންގެެ އިސްވެރިޔާ ޗީފް ސުޕްރިންޓެންޑެންޓް އަބްދުﷲ ޝަރީފް އެވެ. އޭނާ ވިދާޅުވީ، އެފަދަ މީހުންނާ މެދު ވަގުތުން އަޅާނެ ފިޔަވަޅަކީ، އެއްވުންތައް ރޫޅާލުން ކަމަށާއި، ބާރުގެ ބޭނުން ކުރަން ޖެހިއްޖެ ހާލަތެއްގައި ކުރެވެން އޮތް އެންމެ ކުޑަ މިންވަރަކަށް ބާރުގެ ބޭނުން ވެސް ކުރާނެ ކަމަށެވެ.
ޝަރީފު ވިދާޅުވީ ޕީޕީއެމް އަދި ޕީއެންސީގެ އިސްވެރިން އެޗްޕީއޭގެ ގައިޑްލައިންތަކާ ހިލާފަށް އަދި ގާނޫނާ ހިލާފަށް އެއްވުންތައް އިންތިޒާމް ކުރަމުން ދާ ކަމަށެވެ. އަދި ތަކުރާރުކޮށް ފުލުހުންގެ އިދާރާއަށް ހާޒިރުކޮށް ޕީޕީއެމް، ޕީއެންސީގެ އިސްވެރިންނަށް އެއްވުންތައް ނުބޭއްވުމަށް ނަސޭހަތް ދީފައި ވާނެ ކަމަށް ޝަރީފު ވިދާޅުވިއެވެ.
ޝަރީފު އިތުރަށް ވިދާޅުވީ ގާނޫނާ ހިލާފު ވާތީމިފަދަ ފަރާތްތަކާމެދު ވަގުތުން ފިޔަވަޅު އަޅާނެ ކަމަށެވެ. އަދި މިއީ އެއްވުންތަކުގައި ބައިވެރިވާ މީހުންނާއި، އެ ތަނަށް ދާ ފުލުހުންނަށް އަދި އެ ހުރިހާ ފަރާތްތަކެއްގެ އާއިލާ ވެސް ނުރައްކަލަށް ހުށަހެޅުން ކަމަށް ޝަރީފު ވިދާޅުވިއެވެ.
ޝަރީފު މިހެން ވިދާޅުވެފައި ވާއިރު، މާލެ ސަރަހައްދުގައި 10 މީހުންނަށްވުރެ ގިނަ މީހުން އެއްވެ ނޫޅުމަށް އެޗްޕީއޭއިން ވަނީ އަންގާފައެވެ. އަދި 3 ފޫޓުގެ ގައިދުރުކަން ބެހެއްޓުމާއި، ބޭރުގައި އުޅޭ އިރު މާސްކު އެޅުމަށް ވެސް އެޗްޕީއޭއިން ވަނީ އަންގާފައެވެ.
މި އެންގުންތަކާ ހިލާފަށް އިދިކޮޅު ޕީޕީއެމް ޕީއެންސީން މިއަުދ ހަވީރު ވެސް ވަނީ މުޒާހަރާ ކޮށްފައެވެ. އަދި މުޒާހަރާ ރޫޅާލުމަށް ފުލުހުން މަސައްކަތް ކޮށްފައި ވާއިރު، ކޮންމެވެސް މިންވަރަކަށް ޕެޕާ ސްޕްރޭގެ ބޭނުން ވެސް ކޮށްފައި ވެއެވެ.
