ކޮވިޑް-19 އަށް ޕޮޒިޓިވްވާ ބަލިމީހުންނަށް ފަރުވާދިނުމަށް ގާއިމް ކޮށްފައިވާ އެނދުތައް ދަނީ ފުރެމުން ކަމަށާއި މިވަގުތު ބޭނުންވަނީ ބަލި ކޮންޓްރޯލު ކުރުމަށް އެންމެންގެ އެއްބާރުލުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އާއްމުކޮށްފައިވާ ވީޑިއޯ މެސެޖެއްގައި ހުޅުމާލެ މެޑިކަލް ފެސިލިޓީގެ ސްޕެޝަލައިޒްޑް ކްރިޓިކަލް ކެއާ ނާސް ދުންޔާ މުހައްމަދު ވިދާޅުވީ ހުޅުމާލެ ކޮވިޑް ފެސިލިޓީގެ ބެޓް ކެޕޭސިޓީއަކީ 240 ކަމަށާއި މި ޕީކް އާއެކު ބެޑް ކެޕޭސިޓީ ވެސް ފުރެއް ކައިރިވެފައިވާ ކަމަށެވެ.
ދުންޔާ ވިދާޅުވީ ކޮންމެ 20 މީހަކަށް ހުރީ އެންމެ ނަރުހެއް ކަމަށާއި އެކަމުގެ ސަބަބުން ބަލި މީހާއަށް އެންމެ ފުރިހަމަ ފަރުވާ ނުދެވި އެބަ ދާ ކަމަށެވެ.
އޭގެ އިތުރުން ސިއްހީ މަަސައްކަތްތެރިން ވެސް ވަރަށް ބޮޑަށް ވަރުބަލި ވެއްޖެ ކަމަށް ދުންޔާ ވަނީ ވިިދާޅުވެފައެވެ.
"ދަ ޕްރެސް" އަށް މައުލޫމާތު ދެމުން އެޗްއީއޯސީން ބުނީ މާލެ ސަރަހައްދުން ހުޅުމާލެ މެޑިކަލް ފެސިލިޓީގައި 8 އައިސީޔޫ އާއި ޖުމްލަ 242 އެނދު ހުރި ކަމަށެވެ. އަދި މިހާރު އޭގެ ތެރެއިން ބާކީ ހުރީ މަދު އެނދެއް ކަމަށް އެޗްއީއޯސީން ބުނެއެވެ.
މީގެ އިތުރުން ދަރުމަވަންތަ ހޮސްޕިޓަލްގެ ޑީއެޗް11 ގައި 9 އެނދު ހުރިއިރު ޑީއެޗް16ގައި ހުރީ 10 އެނދެވެ.
އަތޮޅުތެރޭގެ ބެޑް ކެޕޭސިޓީއަށް ބަލާލާއިރު، ށ. ފުނަދޫގައި 20 އައިސީޔޫ އެނދާއި އަދި 37 އައިސޮލޭޝަން އެނދު ހުރި އިރު ބ. އޭދަފުށި ކޮވިޑް ފެސިލިޓީގައި ހުރީ 20 އައިސީޔޫ އެނދާއި 25 އައިސޮލޭޝަން އެނދެވެ. ގއ. ވިލިގިލި ކޮވިޑް ފެސިލިޓީގައި 18 އައިސީޔޫ އެނދު ހުރި އިރު އައިސޮލޭޝަން ގައި ހުރީ 5 އެނދެވެ. އަދި ލ.ގަން ކޮވިޑް ފެސިލިޓީގެ އައިސީޔޫ ގައި ހުރީ 15 އެނދާއި އައިސޮލޭޝަން ގައި 13 އެނދެވެ. .
ރީޖަނަލް ކޮވިޑް ފެސިލިޓީތަކަށް ބަލާލާއިރު، ފުވައްމުލަކު ފެސިލިޓީގައި 3 އައިސީޔޫ އެނދާއި 5 އައިސޮލޭޝަން އެނދު އެބަހުއްޓެވެ. މި ދެ ފެސިލިޓީއަކީ ޓްރާންސިޓް ފެސިލިޓީތަކެެވެ.
މިދިޔަ އަހަރު ފަހުކޮޅު ކޮވިޑް ކޭސްތައް މަދުވެފައި ވީ ނަމަވެސް މި އަހަރު ފެށުމަށް ފަހު ކޭސްތައް އިތުރުވަމުން ދާތަން އަންނަނީ ފެންނަމުންނެވެ. މުޅި ޖެނުއަރީ މަހުގެ ތެރޭގައި ފެނުނު ޕޮޒިޓިވް ކޭސްތަކުގެ އަދަދު ވަނީ 2084 އަށް އަރާފައެވެ. ފެބްރުއަރީ މަހުގެ މިހާތަނަށް ފެނުނު ޖުމްލަ ކޭސްގެ އަދަދު ވަނީ 2461 އަށް އަރާފައެވެ. މި ފެބްރުއަރީ މަހުގެ އެންމެ ގިނަ ކޭސް ފެނިފައި ވަނީ މި މަހުގެ 1 ވަނަ ދުވަހެވެ. އެއީ 215 ކޭސްއެވެ.
ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 18،340 އަށް އަރާފައެވެ. އޭގެ ތެރެއިން ރަނގަޅު ވީ 15،863 މީހުންނެވެ. މިވަގުތު މިބަލި ޖެހިފައި ތިބި މީހުންގެ އަދަދުވެސް ވަނީ 2412 އަށް އަރާފައެވެ.
ޕޮޒިޓިވްވާ މީހުން އިތުރު ވާއިރު، ރާއްޖެއިން ކޮވިޑް ބަލީގައި މަރުވި މީހުންގެ އަދަދު ވަނީ 58 އަށް އަރާފައެވެ. އެއީ 51 ދިވެހިންނާއި 7 ބިދޭސީންނެވެ. އެ ބިދޭސީންގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި ޕިލިޕީންސް މީހެކެވެ. މަރުވި 58 މީހުންގެ އިތުރުން ކޮވިޑަށް ޕޮޒިޓިވް ވި 7 މީހަކު މަރުވެފައި ވެއެވެ. ނަމަވެސް އެ 7 މީހުންނަކީ ކޮވިޑް މަރު ނޫން ކަމަށް އެޗްޕީއޭއިން އޮތީ ނިންމާފައެވެ.
