މިއީ ރައްކާތެރިކަމުގެ ފިޔަވަޅުތައް ކުރިއަށްވުރެ ހަރުދަނާ ކުރަންވީ ވަގުތު ކަމަށާއި މިމަހުގެ ފުރަތަމަ ދެ ހަފްތާގައި ކޮވިޑްގައި މަރުވި މީހުންގެ އަދަދު ކުރީގެ ދެ މަހުގައި ޖުމްލަ މަރުވި އަދަދަށް ވުރެ އިތުރު ވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ، މިދިޔަ މަހުގެ ތަފާސް ހިސާބުތަކަށް ބަލާއިރު ރާއްޖޭގައި މިވަގުތު ކޮވިޑް އެކްޓިވް ކޭސްތައް ވަނީ ބޮޑުތަނުން އިތުރު ވެފައި ކަމަށެވެ. އަދި މި ބަލީގައި މަރުވާ މީހުންގެ އަދަދު ވެސް މިވަނީ މިދިޔަ ދެމަހުގެ ތަފާސް ހިސާބުތަކާ އަޅާ ބަލާއިރު މައްޗަށް ގޮސްފައި ކަަމަށް އެޗްޕީއޭއިން ބުނެއެވެ. އެހެންކަމުން މި ވަގުތަކީ މި ބަލިން ރައްކާތެރިވުމަށް ވެކްސިން ޖަހަން ވީ ވަގުތު ކަމަށް އެ އެޖެންސީން ބުނެއެވެ.
ރާއްޖޭގައި ކޮވިޑް ބަލީގައި މިދިޔަ މަހު 5 މީހަކު ވަނީ މަރުވެފައެވެ. އަދި މި މަހުގެ ދެ ހަފްތާ ނިމިގެން ދިޔަ އިރު ކޮވިޑް ޖެހިގެން މަރުވި މީހުންގެ އަދަދު ވަނީ 7 އަށް އަރާފައެވެ. މިހާތަނަށް އައި އިރު ކޮވިޑް ބަލީގައި މަރުވި މީހުންގެ ޖުމަލް އަދަދު 58 އަށް އަރާފައި ވާއިރު މި ފެބްރުއަރީ މަހު ރިޕޯޓު ކުރި މަރުގެ އަދަދު މި ވަނީ މައްޗަށް ގޮސްފައެވެ. އެ ގޮތުން މަރުވި މީހުންގެ ތެރޭގައި އައިޖީއެމްއެޗް އެމަޖެންސީ ރޫމަށް ގެންދެވުނު ދެމީހަކު މަރުވެފައި ވުމަކީ މި ވަގުތު ކޮވިޑްގެ ހާލަތު ނާޒުކު ފައްތަރެއްގައި އޮތް ކަން ރަނގަޅަށް ދޭހަވާ ކަމެކެވެ.
ޖެނުއަރީ މަހާ އަލާބަލާއިރު ކޮވިޑް ބަލި ރިޕޯޓު ކުރާ އަދަދުވެސް މިވަނީ މި ހިންގާ ފެބްރުއަރީ މަހު އިތުރު ވެފައެވެ. މުޅި ޖެނުއަރީ މަހު ޖުމްލަ 2084 މީހުން ރިޕޯޓް ކޮށްފައި ވެއެވެ. އަދި ފެބްރުއަރީ މަހު ރިޕޯޓު ކުރި ކޭސްތަކަށް ބަލާއިރު އިއްޔެއާ ހަމައަށް ޖުމްލަ 2203 އަށް ވަނީ އަރާފައެވެ.
ކޭސްތައް އިތުރުވެ ތިން ވަނަ ރާޅެއްގެ ސިގްނަލް ދޭން ފަށާފައި ވަނީ މި މަހު ފެށުނު ހިސާބުންނެވެ. ރައްކާތެރިކަމުގެ ގޮތުން ފިޔަވަޅުތައް ހަރުކަށިކޮށް މާލެ ސަރަހައދުގައި ކާފިއުވެސް އިއުލާން ކޮށްފައި ވީ ނަމަވެސް އަދިވެސް ދުވާލެއްގެ މައްޗަށް ރިޕޯޓު ކުރާ ކޭސްތަކުގެ އަދަދު މަދު ނުވުމަކީ ކަންބޮޑުވާން ޖެހޭ މައްސަލައެއް ކަމަށް ސަރުކާރުން ބުނެއެވެ. އަދި ކޭސްތައް މަދުނުވާ ނަމަ އިތުރަށް ހަރުކަށި ފިޔަވަޅު އަޅަންޖެހިދާނެ ކަމަށް ސަރުކާރުން ވަނީ ބުނެފައެވެ.
ވެކްސިން ޖެހުމަކީ މިވަގުތު އޮތް ހައްލު ކަމަށް އެޗްޕީއޭއިން ބުނާއިރު، އިއްޔެ ގެ ނިޔަލަށް ރާއްޖެއިން 50،000 އަށް ވުރެ ގިނަ މީހުން ވަނީ ކޮވިޑް ވެކްސިން ޖަހާފައެވެ. މި މަހުގެ 1 ވަނަ ދުވަހުން ފެށިގެން ކޮވިޑް އިން ރައްކާތެރިވުމަށް ރާއްޖޭގައި ވެކްސިން ޖަހަން ވަނީ ފަށާފައެވެ. އެ ގޮތުން މާލެ ސަރަހައްދުގައި އިސްލާމީ މަރުކަޒާއި، ރައްޔިތުން މަޖިލިސް ކުރާ އިދާރާ، ހުޅުމާލޭ ހޮސްޕިޓަލާއި، ޓްރީޓޮޕް ހޮސްޕިޓަލާއި، ވިލިމާލޭ ހޮސްޕިޓަލުގައި ވެކްސިން ޖަހައެވެ. ހަމައެއާއެކު އައިޖީއެމްއެޗާއި އޭޑީކޭ އާއި ސޯޝަލް ސެންޓަރާއި ހުޅުމާލެ ވެކްސިން ސެންޓަރުން ވެސް ދަނީ ވެކްސިން ޖަހައި ދެމުންނެވެ. މީގެ އިތުރުން އަތޮޅު ތެރޭގެ 66 ސެންޓަރެއްގައި ވެކްސިން ޖެހުމުގެ ކަންކަން ކުރިއަށް ދާ ކަމަށް އެޗްޕީއޭ އިން ބުނެއެވެ.
އެޗްޕީއޭއިން ބުނާ ގޮތުގައި މިހާރު ރާއްޖޭގެ ހުރިހާ އަތޮޅެއްގައި ވެސް ވެކްސިން ޖެހޭނެއެވެ. އެގޮތުން މިހާރު 40 އަހަރުން މަތީގެ އެންމެންނަށް މިހާރު ފެށިގެން ވެކްސިން ލިބޭނެ ކަމަށާއި އޭގެ އިތުރުން އުމުރުން 18 އާއި 40 އަހަރު ދެމެދު އުމުރު ފުރައިގެ މީހުންގެ ތެރެއިން ދިގު މުއްދަތަށް ބޭސްފަރުވާ ކުރާ މީހުންނަށް ވެކްސިން ދިނުން ކުރިއަށް ގެންދާނެ ކަމަށް އެޗްޕީޢޭއިން ވަނީ ބުނެފައެވެ.
