އައްޑޫ ސިޓީ ފޭދޫން މިއަދު އެކަކު ކޮވިޑަށް ޕޮޒިޓިވް ވެ މުޅި އައްޑޫން މިހާތަނަށް ފެނިފައިވާ ޖުމްލަ ކޭސްގެ އަދަދު 62 އަށް އަރައިފިއެވެ.
އައްޑޫ އެމަޖެންސީ އޮޕަރޭޝަން ސެންޓަރުން ނެރުނު ތަފާސް ހިސާބުތަކުން ދައްކާ ގޮތުގައި މިއަދު ވަނީ އެ ސިޓީން އެކަކު ޕޮޒިޓިވް ވެފައެވެ. ޖުމްލަ ކޭސްގެ އަދަދު 62 އަށް އަރާފައިވާ އިރު، ޑައިރެކްޓް ކޮންޓެކްޓުންގެ ގޮތުގައި ވަނީ 341 މީހަކު ދެނެގަނެވިފައި ކަމަށާއި 210 އިމާރާތް ކަރަންޓީން ކޮށްފައިވާ ކަމަށް އެ ސެންޓަރުން ބުނެއެވެ.
މިހާރު ހުރި ކޭސްތަކުގެ އިތުރު ތަފްސީލް ހާމަ ކުރަމުން އެ ސެންޓަރުން ބުނީ، ހިތަދޫން ފެނުނު ކޭސްގެ އަދަދު ވަނީ 20 އަށް އަރާފައި ކަމަށެވެ. ފޭދޫން 13 ކޭސް ފެނިފައި ވާއިރު ހުޅުމީދޫން 25 ކޭސް އަދި މަރަދޫ ފޭދޫން 4 ކޭސް ފެނިފައިވާ ކަމަށް އެ ސެންޓަރުން ބުނެއެވެ. އަދި މިހާތަނަަށް އައި އިރު މަރަދޫން އެންމެ ކޮވިޑް ކޭސްއެއް ވެސް ފެނިފައެއް ނުވެއެވެ.
ކޮވިޑް ބައްޔަށް ޕޮޒިޓިވް ވި 62 މީހަކު ފެނިފައިވާ އިރު އެއީ މިހާރު ތިބި އެކްޓިވް ކޭސްގެ އަދަދު ކަމަށް ވެސް އެ ސެންޓަރުން ބުނެއެވެ. އަދި ޕޮޒިޓިވްވި މީހުންގެ ތެރެއިން ތިން މީހަކަށް ދަނީ ހޮސްޕިޓަލުގައި ފަރުވާ ދެމުން ކަަމަށް އެ ސެންޓަރުން ބުނެއެވެ.
ވޭތުވެދިޔަ 3 ދުވަހުގެ ތެރޭގައި އިތުރު ކޭސްތައް ފެނިފައި ވަނީ ހިތަދޫ އާއި ފޭދޫއިން ނެވެ. މިއަދު އެއް ކޭސް ފެނިފައި ވާއިރު އިއްޔެ ވެސް ފޭދޫން ވަނީ އެއް ކޭސް ފެނިފައެވެ.
އައްޑޫ ސިޓީން ކޮވިޑް ކޭސްތަކެއް ފެނުމާއެކު ވަނީ މޮނިޓަރިންއަށް ލާފައެވެ. އަދި އެ އަތޮޅުގެ ހުރިހާ ރަށެއް ހިމެނޭ ގޮތަށް ކާފިއުވެސް އިއުލާން ކޮށްފައެވެ. އެ ސިޓީގައި ކާފިއު ވަގުތަކީ ރޭގަނޑު 8:00 އިން ފެށިގެން ފަތިހު 4:00 އާ ދެމެދެވެ. މީގެ އިތުރުން އައްޑޫ ސިޓީގައި މިސްކިތްތަކުގައި ޖަމާއަތުގައި ނަމާދު ކުރުންވެސް ވަނީ މަނާކޮށްފައެވެ.
