ރައީސް އިބްރާހިމް މުހައްމަދު ސޯލިހްގެ ކޮއްކޯފުޅު އަދި ރައީސް އޮފީހުގެ ސެކްރެޓެރީ، ޕްރެޒިޑެންޝަލް ސެކްރެޓޭރިއެޓް އެންޑް ޕްރޮޓޮކޯލްގެ މަގާމަށް ހުންނެވި ފާތިމަތު މުހައްމަދު ސޯލިހުގެ މާލީ ބަޔާން އިސްލާހު ކޮށްފިއެވެ.
ރައީސް އޮފީހުން ނެރުނު ބަޔާނެއްގައި ބުނީ ފާތިމަތު މުހައްމަދު ސޯލިހުގެ މާލީ ބަޔާނަށް ގެނައި އިސްލާހުތަކާ އެކު މިމަހު 11 ވަނަ ދުވަހު އެއޮފީހުގެ އޮފިޝަލް ވެބްސައިޓުގައި އަލުން އާންމު ކޮށްފައިވާނެ ކަމަށެވެ.
އެގޮތުން ފާތިމަތު މުހައްމަދު ސޯލިހުގެ މާލީ ބަޔާން ފޯމް އެންޓާ ކުރުމުގައި ދިމާވެފައިވާ އޮޅުމެއްގެ ސަބަބުން އެފޯމުގައި ބަޔާން ކޮށްފައިވާ އާމްދަނީ އާ މުދަލާއި ފައިސާ އަދި ލޯނުގެ ބައިގައި ފާތިމަތު މުހައްމަދު ސޯލިހުގެ މައުލޫމާތު ބަދަލުގައި ފިރިކަލުން އަލްމަރްހޫމް އިސްމާއީލް ފިރާގުގެ ބޭންކް އެކައުންޓުގައި ހުރި 700،000 ރުފިޔާ އަދި އިމާރާތުގެ އަގުގެ ގޮތުގައި 20 މިލިއަން ރުފިޔާގެ މައުލޫމާތު ހިމެނިފައި ވާކަން ފާހަގަ ވެފައިވާ ކަމަށް ރައީސް އޮފީހުން ވަނީ ބުނެފައެވެ.
އެހެން ކަމުން ފާތިމަތު މުހައްމަދު ސޯލިހުގެ ފޯމު ރައީސް އޮފީހުގެ އޮފިޝަލް ވެބްސައިޓަށް އަލުން އަޕްލޯޑް ކޮށްފައި ވަނީ އެކަންކަން އިސްލާހު ކުރުމަށް ފަހުގައި ކަމަށް ރައީސް އޮފީހުން ވަނީ ބުނެފައެވެ.
