ކޮވިޑް ކޭސްތައް އަނެއްކާވެސް އިތުރުވަމުން ދާތީ މާލެ ސަރަހައްދުގައި އެއްގަމު އުޅަނދު ދުއްވަން މަނާކޮށް އެޗްޕީއޭއިން އެންގި އެންގުން ތަންފީޒު ކުރަން ހާއްސަ މަސައްކަތްތަކެއް ކުރާނެ ކަމަށް ފުލުހުން ބުނެފިއެވެ.

ފުލުހުން ބުނީ، މިއަދުން ފެށިގެން ވަކިގޮތެއް އަންގަންދެން މާލެ ސަރަހައްދުގައި ހަވީރު 6:00 އިން ހެނދުނު 6:00 އަށް އެއްގަމު އުޅަނދު ދުއްވުމަކީ މަނާކަމެއް ކަމަށެވެ. އަދި އެކަން ތަންފީޒް ކުރުމަށް ފުލުހުން ހާއްސަ މަސައްކަތްތަކެއް ކުރާނެ ކަމަށް ބުނެއެވެ.

ޑިރެކްޓާ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއި ކުރައްވާފައިވާ އެޗްޕީއޭއިން ނެރުނު ބަޔާނެއްގައި ވަނީ، މިއަދުން ފެށިގެން މާލެ، ހުޅުމާލެ، ވިލިމާލެ، ތިލަފުށި ހުޅުލެ އަދި ގުޅީފަޅު ހިމެނޭ ސަރަަހައްދުގައި ހަވީރު 6 އިން ފެށިގެން ހެނދުނު 6 އަށް އެއްގަމު އުޅަނދުފަހަރު ދުއްވުން މަނާ ކޮށްފައިވާ ކަމަށެވެ. އެ ވަގުތު ތަކުގައި ސިފައިންނާއި ފުލުހުން، ސިއްހީ ހިދުމަތް ދޭ އިދާރާތަކުގެ މުވައްޒަފުންނާއި އެމުވައްޒަފުން ދުއްވާ އުޅަނދު ފަހަރުގެ އިތުރުން ހެލްތް އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ފާސް ލިބިފައިވާ ފަރާތްތަކާއި އެމަޖެންސީކޮށް ސިއްހީ ހިދުމަތް ހޯދަން ޖެހޭ ފަރާތްތަކަށް ދުއްވާ އުޅަނދުފަހަރުގައި ބޭރަށް ނުކުމެ އުޅުން އިސްތިސްނާވާނެ ކަމަށެވެ.

މީގެ އިތުރުން މި އެންގުން ތަންފީޒު ކުރުމަށް މޯލްޑިވްސް ޕޮލިސް ސާވިސް އާއި ކަމާގުޅޭ އެހެނިހެން މުއައްސަސާތަކުން އަޅަން ޖެހޭ އެންމެހާ ފިޔަވަޅުތައް އަޅާނެ ކަމަށް އެޗްޕީއޭ އިން ބުނެއެވެ.

މާލެ ސަރަހައްދުގައި އެއްގަމު އުޅަނދު ދުއްވުން މަނާ ކޮށްފައި ވަނީ މި އަހަރު ފެށުނު ފަހުން ކޮވިޑް ކޭސްތައް އިތުރުވުމާ ގުޅިގެންނެވެ. އެގޮތުން މާލެ ސަރަހައްދުގައި ކާފިއު ވަގުތެއްގެ ގޮތުގައި އެޗްޕީއޭއިން އަންގާފައި ވަނީ ރޭގަނޑު 11 އިން ފަތިހު 4:30 އަށެވެ.

މި ދިޔަ ޖެނުރައީ މަހުގެ ފަހު ކޮޅުން ފެށިގެން ރާއްޖޭގައި ކޮވިޑް ކޭސްގެ އަދަދުތައް ވަނީ ދުވާލަކު 100 އިން މައްޗަށް ރިޕޯޓް ކޮށްފައެވެ. މިއާއެކު މިހާތަނަށް ރާއްޖެއިން ކޮވިޑް ޖެހުނު ޖުމްލަ މީހުންގެ އަދަދު ވެސް 17000 އިން މައްޗަށް ގޮސްފައެވެެ.

ހަބަރު ކޮވިޑް-19 އެޗްޕީއޭ ޕޮލިސް