ރިޔާސީ ބަޔާން އިއްވާތީ، އިދިކޮޅު ޕީޕީއެމް/ޕީއެންސީ ކޯލިޝަނުން މަޖިލިސް ބޭރުގައި އިހުތިޖާޖު ކޮށްފިއެވެ.
އިދިކޮޅުން މަޖިލިސް ބޭރުގައި އިހުތިޖާޖު ކުރީ، ރައީސް ޔާމީން މިނިވަން ކުރުމަށް ގޮވާލައެެވެ. އަދި ބޭސްފަރުވާއަށް ސަލާން ޖެހުން އިތުރު ވެއްޖެ ކަމަށާއި، އެމްޑީއެން އަދި އުތެމާ ޖަމްއިއްޔާ އުވާލެއްވިއްޖެ ތޯ ސުވާލުކޮށް، އެ ފަރާތްތަކުގެ އެކި އެކި ކަންބޮޑުވުންތައް ބޯޑުތަކުގައި ލިޔެ، ދިވެހި ދިދައާއެކު އިހުތިޖާޖު ކުރިއެވެ.
އިދިކޮޅުގެ ކޯލިޝަނުގެ މެންބަރުން މަޖިލިސް ބޭރުގައި އިހުތިޖާޖު ކުރަމުން ދިޔައިރު، އިދިކޮޅުގެ މަޖިލިސް މެންބަރުން ތިއްބެވީ ޗެމްބަރަށް ނުވަދެވި މަޖިލިސް ޗެމްބަރުގެ ދޮރުމަތީގައެވެ. އެ މެންބަރުން ޗެމްބަރަށް ނުވެއްދީ، "ރައީސް ޔާމީން މިނިވަން ކުރަން" ގޮވާލާ ބެނާއެއް ހިއްޕަވަގެން ތިއްބެވުމުންނެވެ.
ރައީސް ސޯލިހް މަޖިލިސް ޗެމްބަރުން ނިކުމެ ވަޑައިގެންނެވި އިރު އިދިކޮޅު މަޖިލިސް މެންބަރުން ވަނީ މަޖިލީހަށް ވަންނަ ދޮރާށިން އެތެރޭގައި އިހުތިޖާޖު ކޮށްފައެވެ. އެ މެންބަރުން ތިއްބެވީ ރައީސް ޔާމީން މިނިވަން ކުރަން ގޮވާލާ ފޮތިގަނޑު ހިއްޕަވައިގެންނެވެ. ނަމަވެސް ރައީސް ސޯލިހު ވަނީ އެ މެންބަރުންގެ ގާތަށް ވަޑައިގެން ވާހަކަ ދައްކަވާލައްވާފައެވެ.
ތަޅުމުން ނިކުމެ ވަޑައިގެން މެންބަރުން ވިދާޅުވީ ސަރުކާރުން، ކުދި އަދި މެދު ފަންތީގެ ވިޔަފާރިތަކަށް އެހީތެރިވާ ކަމަށް ބުނި ނަމަވެސް އެއީ ދޮގެއް ކަމަށާއި، ކުދި ވިޔަފާރިތައް ދަނީ ބަނގުރޫޓު ވަމުން ކަމަށެވެ. ހަމައެއާއެކު، މިއަދުގެ ރިޔާސީ ބަޔާނުގައި ރައީސް ކުރައްވާނެ ކަމަށް ވިދާޅުވީ އެއްވެސް ހަގީގަތެއް ނެތް، ނުކުރެވޭނެ ކަންތައްތައް ކަމަށް ވެސް ބައެއް މެންބަރުން ވިދާޅުވިއެވެ.
ރިޔާސީ ބަޔާން އިއްވާ ނިމުމުން، ތަޅުމުން ބޭރަށް ވަޑައިގެން އިދިކޮޅު މަޖިލިސް މެންބަރުން ވަނީ ރައީސް ސޯލިހްގެ ރިޔާސީ ބަޔާނަށް ވަރަށް ބޮޑަށް ފާޑު ވިދާޅުވެފައެވެ. މެންބަރުން ވިދާޅުވީ، ރައީސް ސޯލިހް އިއްވެވީ އެއްވެސް އުއްމީދެއް ނެތް ރިޔާސީ ބަޔާނެއް ކަމަށެވެ. އަދި އެއީ އިތުރުފުޅު ހައްދަވާ ވެރިއެއް ކަން މިއަދުގެ ރިޔާސީ ބަޔާނުން ވެސް ހާމަވެފައިވާ ކަމަށެވެ.
