ކޮވިޑް ބަލިމަޑުކަމުން އަރައިގަތުމަށް އަޅަފައިވާ ފިޔަވަޅުތައް ވަރުގަދަކޮށް، މިއަދުން ފެށިގެން ކެފޭ، ހޮޓާ، ކެންޓީން އަދި ރެސްޓޯރަންޓް އަދި ފިހާރަ ތަކުން ހިދުމަތް ދޭ ވަގުތަށް ބަދަލު ގެނެސްފިއެވެ.
އިކޮނޮމިކް މިނިސްޓްރީން މިއަދު ކުރި އިއުލާނެއްގައި ބުނީ، ކޮވިޑް-19 އިން ރައްކާތެރި ވުމަށް އަޅާފައިވާ ހާއްސަ ފިޔަވަޅުތަކަށް ބަދަލު ގެނައުމާ ގުޅިގެން، މިއަދުން ފެށިގެން ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ހިދުމަތް ދޭ ތަންތަން އަދި ފިހާރަތައް ހުޅުވާފައި ބެހެއްޓޭނެ ގަޑިއަކީ ފަތިހު 5:00 އިން ރޭގަނޑު 10:30 އަށް ކަމަށެވެ.
އިކޮނޮމިކް މިނިސްޓްރީން ބުނީ ހުޅުވާލައިގެން ވިޔަފާރި ކުރާ ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ހިދުމަތް ދޭ ތަންތަނާއި ފިހާރަތަކުން، ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާ އުސޫލުތަކާ އެއްގޮތަށް އަމަލުކުރަން ވާނެ ކަމަށެވެ.
އިކޮނޮމިކް މިނިސްޓްރީން މި ފިޔަވަޅު އަޅާފައި ވާއިރު، ކޮވިޑުން ރައްކާތެރި ވުމުގެ ގޮތުން މާލެ ސަރަހައްދުގައި ވަނީ ފިޔަވަޅުތައް ވަރުގަދަ ކޮށްފައެވެ. އެގޮތުން ރޭގަނޑު 8:30 އިން ފެށިގެން އެއްގަމު އުޅަނދު ދުއްވުން މަނާ އިރު، ރޭގަނޑު 11:00 އިން ފެށިގެން ފަތިހު 4:30 އަށް ކާފިއު ހިންގުމަށް ވަނީ ހަމަޖެހިފައެވެ.
ފިޔަވަޅުތައް ވަރުގަދަ ކޮށްފައި ވަނީ ރާއްޖޭގައި ހަލުވި ކަމާއެކު ކޮވިޑް-19 ފެތުރެމުން ދާތީ، ބަލިން ރައްކާތެރި ވުމުގެ ގޮތުންނެވެ.
ވޭތުވެދިޔަ 2 ހަފްތާގައި މާލެ ސަރަހައްދުން ފެނުނު ކޮވިޑް ކޭސްތަކުގެ އަދަދު ބޮޑުތަނުން މަތިވެފައި ވާ ކަން ވަނީ ފާހަގަ ކުރެވިފައެވެ. އެޗްއީއޯސީން ބުނާ ގޮތުން، ކޭސްތައް އެހާ ބޮޑަށް އިތުރުވީ، ރައްކާތެރި ކަމުގެ ފިޔަވަޅުތަކަށް އާންމުން ބޯލަނބާ މިންވަރު ދަށްވީމައެވެ.
