ކޮވިޑް ކޭސްތައް އިތުރުވަމުންދާތީ އަނެއްކާވެސް އާންމު ހިދުމަތްދޭ ތަންތަން އިންސްޕެކްޝަން ކުރަން ނިންމައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މި ދުވަސްވަރު ރާއްޖޭގައި ކޮވިޑް ޖެހޭ މީހުންގެ އަދަދު އިތުރުވަމުން ދާތީ ބަލި ކޮންޓްރޯލް ކުރުމަށް ކުރެވޭ މަސައްކަތެއްގެ ގޮތުން އެޗްޕީއޭ އިން ކަނޑައަޅާފައިވާ ގައިޑްލައިންތަކާ އެއްގޮތަށް އަމަލު ކުރަމުން ދާކަން ދެނެގަތުމަށް އާންމު ހިދުމަތްދޭ ތަންތަން ބަލާ ފާސް ކުރުމަށް ނިންމާފައިވާ ކަމަށެވެ.
މި އިންސްޕެކްޝަން ކުރިއަށް ދާނީ އެޗްޕީއޭ އާއި ފުލުހުން އަދި ސަރުކާރުގެ އެހެނިހެން އިދާރާތައް ގުޅިގެން މާލޭ ސަރަޙައްދަށް އަމާޒުކޮށްގެން ކަމަށް އެ އެޖެންސީން ބުނެއެވެ. މި އިންސްޕެކްޝަންގައި ކާބޯތަކެތީގެ ހިދުމަތް ދޭ ތަންތަނާއި، ފިހާރަތަކާއި، ފިޓްނަސް ސެންޓަރުތަކާއި، ސެލޫންތައް އަދި މާރުކޭޓުތައް ފަދަ އާންމު ހިދުމަތް ދޭ ހުރިހާ ތަނެއް ބެލުމަށް ވަނީ ހަމަޖެހިފައި ކަމަށް އެޗްޕީއޭއިން ބުނެއެވެ. މީގެ އިތުރުން ޕަބްލިކް ޓްރާންސްޕޯޓުގެ ހިދުމަތް ފޯރުކޮށް ދޭ ޓެކްސީ، ލޮރީ، ޕިކަޕް އަދި ޕްރައިވެޓް ހަޔާ ފަދަ އުޅަނދުތައް ވެސް އިންސްޕެކްޓް ކުރާނެ ކަމަށް އެޗްޕީއޭއިން ބުނެއެވެ.
އެގޮތުން ގައިޑްލައިންތަކާ ހިލާފުވާ ފަރާތްތަކާ މެދު ''އާންމު ސިއްހަތު ކުއްލި ނުރައްކަލުގައި ޑިރެކްޓާ ޖެނެރަލް އޮފް ޕަބްލިކް ހެލްތު އަންގާ އެންގުންތަކާ ހިލާފުވާ ފަރާތްތަކާ މެދު ފިޔަވަޅު އެޅުމުގައި އަމަލު ކުރާނެ ގޮތުގެ އުސޫލު' ގެ ދަށޫން ފިޔަވަޅު އަޅާނެ ކަމަށް އެޗްޕީއޭ އިން ބުނެއެވެ.
މި އިންސްޕެކްޝަންއާ ގުޅިގެން އިތުރު މައުލޫމާތު ހޯދުމަށް ގުޅާނީ 7264574 ނަންބަރަށް ކަމަށާއި އެ ނަންބަރަށް ގުޅޭނީ ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 9:00 އިން ހަވީރު 6:00 އަށް ކަމަށް އެޗްޕީއޭ އިން ބުނެއެވެ. އަދި އިންސްޕެކްޝަންއާ ގުޅިގެން މެއިލް އެ އެޖެންސީން ބުނެއެވެ.
.ކޮވިޑް-19 އާ ގުޅިގެން ހެދިފައިވާ ގައިޑް ލައިންތަކާ އެއްގޮތަށް އަމަލު ކުރޭތޯ ބެލުމަށް މީގެ ކުރިން ވެސް އެކި ފަހަރު މަތިން ވާނީ އިންސްޕެކްޝަންތައް ކުރިއަށް ގެންގޮސްފައެވެ. އެގޮތުން ބައެއް ތަންތަން ޖޫރިމަނާ ކޮށް، ތަން ތަން ބަންދުކޮށް އަނެއްކާ ހުޅުވުމަށް ހުއްދަ ދެނީ އެ ތަންތަން އެޗްޕީއޭގެ މިންގަނޑުތަކަށް ފެތޭ ގޮތަށް ބަދަލުތައް ގެނައުމުންނެވެ.
ކޮވިޑް-19 އިން ރައްކާތެރި ވުމަށް އެޗްޕީއޭ އިން ކަނޑައަޅާފައިވާ އުސޫލުތަކާ އެއްގޮތަށް އަމަލު ކުރުމަކީ މި ބަލިން ރައްކާތެރިވުމަށް އެޅޭނެ އެންމެ މުހިންމު އެއް ފިޔަވަޅު ކަމަށް އެ އެޖންސީން ބުނެއެވެ.
