ކޮވިޑު-19 ގައި 88 އަހަރުގެ މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިރޭ 07:33 ހާއިރު އުމުރުން 88 އަހަރުގެ މީހަކު ވަނީ ކޮވިޑް ޖެހިގެން ނިޔާވެފައި ކަމަށެވެ. އަދި އޭނާ ނިޔާވެފައި ވަނީ ހުޅުމާލެ މެޑިކަލް ފެސިލިޓީގައި އެޑްމިޓްކޮށްގެން ފަރުވާދެމުން ދަނިކޮށް ކަމަށް ވެސް އެޗްޕީއޭއިން މައުލޫމާތު ދެއެވެ.
މިއާއެކު ކޮވިޑުގައި ނިޔާވި މީހުންގެ އަދަދު މިވަނީ 52 އަކަށް އަރާފައެވެ. މި ބަލީގައި ނިޔާވެފަައި ވަނީ 45 ދިވެހިންނާއި ހަތް ބިދޭސީންނެވެ. މަރުވި ބިދޭސީންގެ ތެރޭގައި ހިމެނެނީ ބަންގްލަދޭޝްގެ ހަ މީހަކާއި ފިލިޕީންސް މީހެކެވެ. މީގެ އިތުރުން، އެޗްޕީއޭއިން ބުނެފައި ވަނީ ޕޮޒިޓިވް ކޭސްތަކުގެ ތެރޭގައި ހިމެނޭ 7 މީހަކު ނިޔާވެފައިވާ އިރު އެއީ ކޮވިޑް މަރު ނޫން ކަމަށް ނިންމާފައިވާ ކަމަށެވެ.
ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 15،736 އަށް އަރާފައެވެ. އޭގެ ތެރެއިން 14،096 މީހަކު ވަނީ ރަނގަޅުވެފައެވެ. މިވަގުތު މިބަލި ޖެހިފައި ތިބި މީހުންގެ އަދަދު 1582 ގައި އުޅޭ އިރު، އެމީހުންގެ ތެރެއިން 152 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
މިއަހަރު ފެށުނު އިރު 50 އިން ދަށުގައި ކޭސްތައް އޮތް ނަމަވެސް މިހާރު ކޭސްތައް މި ވަނީ އިތުރު ވާން ފަށާފައެވެ. އެގޮތުން މިހާރު 100 އިން މައްޗަށް ކޭސްތައް ގުނަމުން އަންނައިރު މާލެ ސަރަހައްދުން ފެންނަ ކޭސްތަކުގެ އަދަދުވެސް ވަނީ 100 އިން މައްޗަށް ގޮސްފައެވެ.
