އެމްޑީޕީ އިސްނަގައިގެން މި ސަރުކާރުން ހުނަރުވެރި ޒުވާނުންގެ މުސްތަގުބަލު ކަތިލައިފި ކަމަށާއި އަދި އެކަން ކުރުމަށް ފަހު އެމްޑީޕީން އުފާފާޅު ކުރުމަކީ ލަދުވެތި އަމަލެއް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ސިފަކުރައްވައިފިއެވެ.
ޖަމީލް މިހެން ވިދާޅުވީ، އެސިސްޓަންޓް ކޮމިޝަނާ އޮފް ޕޮލިސްގެ މަގާމު ފުރުއްވި ޑރ. އަބްދުﷲ ފައިރޫޝް ރިޓަޔާ ކުރެއްވުމާ ގުޅިގެން އޭނާ ކުރެއްވި ހިދުމަތަށް ކޮމިޝަނާ އޮފް ޕޮލިސް މުހައްމަދު ހަމީދު ޝަކުރު އަދާ ކުރެއްވުމުން އެކަމަށް އެމްޑީޕީގެ ބައެއް މެންބަރުން ފާޑުވިދާޅުވުމުންނެވެ.
އެމްޑީޕީގެ މެޖޯރިޓީ އޮންނަ މަޖިލީހުން ފާސްކުރި ފުލުހުންގެ އާ ގާނޫނުގެ މަގްސަދަކީ ބަދަލުހިފުން ކަމަށް ވިދާޅުވަމުން ޖަމީލު ވިދާޅުވީ، ގައުމެއްގެ ގޮތުގައި އެފަދަ އަމަލްތަކެއް ހިންގުމަކީ ވަރަށް ނާތަހުޒީބު އަމަލްތަކެއް ކަމަށެވެ. އެމްޑީޕީ ސަރުކާރު ވެރިކަމަށް އައުމަށް ވީ ވައުދުގެ ތެރޭގައި ވަޒީފާގެ ބިރުވެރިކަން ނެތް މުޖުތަމައުއެއް ބިނާ ކުރުމުގެ ވައުދު ކޮބައިތޯ ވެސް ޖަމީލް ސުވާލު ކުރެއްވިއެވެ. އަދި މި ގައުމުގައި މަސައްކަތުގެ މާހައުލުގައި ތިބި ހުނަރުވެރި ޒުވާނުންގެ މުސްތަގްބަލް އެމްޑީޕީން އިސް ނަގައިގެން ކަތިލާފައިވާ ކަމަށާއި އަދި އެކަން ކުރުމަށް ފަހު އެ ޕާޓީން އުފާފާޅު ކުރުމަކީ ލަދުވެތި އަމަލެއް ކަމަށް ޖަމީލް ވިދާޅުވިއެވެ.
މިކަމުގެ އިތުރު ތަފްސީލް ހާމަ ކުރައްވަމުން ޖަމީލް ވިދާޅުވީ، މިއަދު އެމްޑިޕީގެ ޝިކާރައަކަށް ވެފައި ވަނީ ކުރީގެ އެސީޕީ ފައިރޫޝް ކަމަށެވެ. އަދި މާދަމާ އެ ޝިކާރައިގައި ޖެހޭނީ ކާކުތޯ އައްސަވާ ސުވާލު ކުރެއްވިއެވެ. މި ގައުމަށް އެމްޑީޕީ ސަރުކާރުން ކެހި ދެމުން ދާ ކަމަށް ވިދާޅުވަމުން ވަކިން ހާއްސަކޮށް އައްޑޫ ރައްޔިތުންނަށް މި ސަރުކާރުންނާއި އެމްޑީޕީން އަބަދުވެސް ދެނީ ކެހި ކަމުގައި ޖަމީލު ވިދާޅުވިއެވެ.
ޕޮލިހުގައި 20 އަހަރު ދުވަހުގެ ދިގު މުއްދަތަކަށް ހިދުމަތް ކުރެއްވުމަށް ފަހު އިއްޔެ ފައިރޫޝް ރިޓަޔާ ކުރައްވާފައި ވާއިރު ދާދި ފަހުން ވަނީ ފުލުހުންގެ އާ ގާނޫނަށް އަމަލު ކުރަން ފަށާފައެވެ. އެ ގާނޫނަށް ގެނައި ވާ ގޮތުން، ފުލުހުންގެ ތެރޭގައި ނުވަތަ ފުލުހުން އެހެން ބަޔަކާ ބައިވެރިވެގެން ބަޢާވާތް ކޮށްފި ނަމަ، ނުވަތަ ބަޢާވާތެއް ކުރަން އުޅެފި ނަމަވެސް އެއީ ކުށެއް ކަމަށް ބުނެފައި ވެއެވެ. އަދި އެފަދަ ކަމެއް ކުރަން ރޭވުން، އެފަދަ ކަމަކަށް ހިތްވަރު ދިނުން، އެހެން ބަޔަަކު ކުރާކަން ނުވަތަ ކުރަން ރާވާކަން އެނގިހުރެ އެކަން ސިއްރު ކުރުމަކީވެސް ކުށެއް ކަމަށް ބިލުގައި ބުނެފައި ވެއެވެ.
މި ކަމާ ގުޅިގެން ގިނަ ބައެއްގެ ފާޑުކިޔުން މި ސަރުކާރަށް ވަނީ އަމާޒުވެފައެވެ. ފުލުހުންގެ ބިލަށް ގެނައި އިސްލާހަކީ ފައިރޫޝް ފަދަ އިސް އޮފިސަރުން މަގާމުން ދުރުކުރުމަށް ކުރި ކަމެއްގެ ގޮތުގައި އާންމުންގެ ޝަކުވާތައް ވަނީ ފެންމަތި ވެފައެވެ.
ފެބުރުއަރީ ހަތެއްގައި ރައީސް މުހައްމަދު ނަޝީދުގެ ވެރިކަން ވެއްޓުމަށް ފަހު ފުލުހުންގެ އިދާރާއާ ވަގުތީ ގޮތުން ހަވާލުވަޑައިގަތީ ފައިރޫޝްއެވެ. އަދި އެ ދުވަހު ނަޝީދު އިސްތިއުފާ ދެއްވަން ކުރިމަތިވި ހަމަނުޖެހުންތަކުގައި ފައިރޫޝް އިސް ދައުރެއް އަދާކުރެއްވި ކަމަށް ވަނީ ތުހުމަތު ކޮށްފައެވެ.
މިފަދައިން ތުހުުމަތުތައް އޮތް އިރު ރިޓަޔާ ކުރެއްވުމާ ގުޅިގެން ފައިރޫޝް ވިދާޅުވެފައި ވަނީ، އޭނާ މަގާމުން ރިޓަޔާވުމަށް އެދި ހުށަހަޅުއްވާފައި ވަނީ މީގެ ހަތް މަސް ކުރިން މިދިޔަ ޖޫން މަހުގެ 2 ވަނަ ދުވަހު ކަމަށެވެ. ނަމަވެސް އޭނާ ކުރެއްވި ހިދުމަތަށް ޝުކުރު އަދާ ކުރައްވާ ސީޕީ ހަމީދު ފޮނުއްވި ތަހުނިޔާގެ މެސެޖަށް ރައްދު ދެއްވަމުން އެމްޑީޕީގެ ޗެއާ ޕާސަން ހަސަން ލަތީފު ވަނީ "ޝޭމް އޮން ޔޫ" މިހެން ވިދާޅުވެފައެވެ. މީގެ އިތުރުން އެ ޓްވީޓަށް ރައްދު ދެމުން، ރައީސް ނަޝީދުގެ ހިޔަނި ޓްވިޓާ އެކައުންޓް "އެލެކްސް އަހުމަދު" ބުނެފައި ވަނީ "ކަލޭ އޭނާ ކުރި ބަޣާވާތަށްވެސް ޝުކުރު އަދާކުރަނީ" ހެއްޔެވެ.
