އެމްޓީސީސީން ތ. އަތޮޅުން ލ. އަތޮޅާ ދެމެދު ސްޕީޑް ފެރީގެ ހިދުމަތް ފަށައިފިއެވެ.
މި ދެ އަތޮޅު ދެމެދު ލޯންޗު ފެރީ ހިދުމަތް ފަށަނެ ކަމަށް އިއުލާންކޮށް ދެއްވީ އެމްޓީސީސީން މި ހިދުމަތް އިފްތިތާހް ކުރުމަށް ބޭއްވި ރޭ ހާއްސަ ރަސްމިއްޔާތެއްގައެވެ. އެމްޓީސީސީގެ ބުނީ، ތ. އަތޮޅު އަދި ލ. އަތޮޅާ ދެމެދު ފެށުމަށް ނިންމާފައިވާ ލޯންޗް ފެރީގެ ހިދުމަތުގެ ފުރަތަމަ ދަތުރު މިއަދު ފަށާނެ ކަމަށެވެ. ތ. އަދި ލ. އަތޮޅާ ދެމެދެ ފަށާ ލޯންޗް ފެރީގެ ހިދުމަތް ދޭ ރޫޓްގައި ހިމެނޭ ރަށްތަކަކީ ތ. ވޭމަންޑޫ، ތ. ތިމަރަފުށި އަދި ލ. ގަން ކަމަށް އެ ކުންފުންިން ބުނެއެވެ.
ޓިކެޓު އަގުތައް ހާމަ ކުރަމުން އެމްޓީސީސީން ބުނީ، ތ. ވޭމަންޑޫއިން ތ. ތިމަރަފުއްޓަށް އެއްކޮޅު ޓިކެޓުގެ އަގަކީ 75.00 ރުފިޔާ ކަމަށާއި ދެކޮޅު ޓިކެޓުގެ އަގަކީ 150.00 ރުފިޔާ ކަމަށެވެ. އަދި ތ.ވޭމަންޑޫ އަދި ތ. ތިމަރަފުށިން ލ. ގަމަށް އެއްކޮޅު ޓިކެޓުގެ އަގަކީ 250.00 ރުފިޔާ ކަމަށާއި ދެކޮޅު ޓިކެޓުގެ އަގަކީ 400.00 ރުފިޔާ ކަމަށް އެ ކުންފުނިން ބުނެއެވެ.
ތ އަދި ލ އަތޮޅާއި ދެމެދު ފެރީ ހިދުމަތް ހަފުތާއަކު 4 ދުވަހު އޮންނާނެ ކަމަށް އެ ކުންފުނިން ބުނެއެވެ. އެއީ ހޮނިހިރު، އާދީއްތަ، އަންގާރަ، ބުރާސްފަތި މި ހަތަރު ދުވަހެވެ.
ފެރީ ހިދުމަތް ފެއްޓުމުގައި އެމްޓީސީސީއާ އެކު ވަރަށް ގާތުން މަސައްކަތްކުރި އިކޮނޮމިކް މިނިސްޓަރު ފައްޔާޒް އިސްމާއިލާއި ޓްރާންސްޕޯޓް މިނިސްޓަރު އައިޝަތު ނަހުލާ އާއި ލ.ގަމު ދާއިރާގެ މަޖިލީހުގެ މެންބަރު މުހައްމަދު ވިސާމް އަދި ލ. ފޮނަދޫ ދާއިރާގެ މަޖިލީހުގެ މެންބަރު މޫސާ ސިރާޖަށް ހާއްސަ ޝުކުރެއް ދަންނަވާ ކަމަށް އެ ކުންފުނިން ބުނެއެވެ.
