މިއަދު ގައުމަށް ކުރިމަތިވެފައިވާ އިގްތިސާދީ، އަދި އިޖްތިމާއީ ބޮޑެތި މައްސަލަތަކުން ސަލާމަތް ވެވޭނީ އެކުވެރިކަމާއި އެއްބައިވަންތަކަން އިސްކޮށް އަދާވާތްތެރިކަމާއި ނަފްރަތުން ދުރުހެލިވެގެން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ނައިބު މިހެން ވިދާޅުވީ ގައުމީ އެއްބައިވަންތަކަމުގެ ދުވަހުގެ މުނާސަބާގައި ރޭ ހުވަދުއަތޮޅު އުތުރުބުރީ އަތޮޅު ތައުލީމީ މަރުކަޒުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން، މީގެ 16 އަހަރު ކުރިން ކުރިމަތިވި ހިތާމަވެރި ސުނާމީ ކާރިސާގެ ހަނދާންތައް އާކުރައްވާ، ވަކިވެގެންދިޔަ ފުރާނަތަކަށް ސުވަރުގޭގެ މަތިވެރި ނިއުމަތް މިންވަރު ކުރެއްވުމަށާއި، އެ ފަރާތްތަކުގެ އާއިލާތަކަށް ކެތްތެރިކަން މިންވަރުކުރެއްވުން އެދި ނައިބު ވަނީ ދުއާ ދަންނަވާފައެވެ. އަދި، އެ ކާރިސާއާ ގުޅިގެން ދިވެހިން ދައްކުވައިދިން އެއްބައިވަންތަކަމާއި، އެކުވެރިކަމުގެ ރިވެތި ނަމޫނާއަށް ނައިބު ތައުރީފު ކުރެއްވިއެވެ.
ނައިބު ވިދާޅުވީ މިއަދު އިސްކުރަންވީ މާތްވެގެންވާ އިސްލާމް ދީނުގައި އަންގަވާފައިވާ ގޮތަށް އެކުގައި މަސައްކަތްކުރުމުގެ ރޫހު ކަމަށެވެ. އަދި އެކުވެރިކަމަކީ ގަދަފަދަ ބާރެއްކަން ފާހަގަކުރައްވާ ވިދާޅުވީ ސުލޫކު ހެޔޮ ދަރިންތަކެއް ބިނާކުކުރުމާއި ތަރައްގީ ހާސިލުކުރެވޭނީ އަދި އަމާން ގައުމެއް ކަށަވަރު ކުރެވޭނީ ވެސް އެކުވެރިކަމާއި އެއްބައިވަންތަކަށް އިސްކޮށްގެން ކަމަށް ނައިބު ރައީސް ވަނި ވިދާޅުވެފައެވެ.
އެކި ހިޔާލުތަކާއި ވިސްނުންތަކަށް ފުރުސަތު ދިނުމުގެ މުހިންމުކަމަށް އިޝާރާތްކުރައްވާ ނައިބު ވިދާޅުވީ ހިޔާލު ތަފާތުވުމުގެ ބޭނުމަކީ ރަނގަޅު ބިނާކުރަނިވި އަދި ފައިދާ ކުރަނިވި ގޮތްތަކެއް ހޯދުމަށް މަސައްކަތްކުރުން ކަމަށެވެ. ނަމަވެސް ހިޔާލު ތަފާތުވުމަކީ އަނިޔާވެރިކަމާއި ދެކޮޅުވެރިކަމަށް ދެވޭ ފުރުސަކަށް ނުހެދުމަށާއި އިންސާފުވެރިކަމާއި އޯގާތެރިކަމާއި އެކަކު އަނެކާއަށް އިހްތިރާމް ކުރުމުގެ ރިވެތި އާދަތައް އިސްކުރުމަށް މަސައްކަތް ކުރުމަށް ނައިބު ވަނީ ދިވެހި ރައްޔިތުންނަށް ގޮވާލައްވާފައެވެ.
ނައިބު ރައީސް ގއ. ވިލިނގިއްޔަށް ކުރައްވަމުން ގެންދަވާ ދެ ދުވަހުގެ ދަތުރުފުޅުގައި އެ މަނިކުފާނުގެ އަރިހުގައި މިނިސްޓަރ އޮފް ހޯމް އެފެއާޒް އިމްރާން އަބްދުﷲ އާއި މިނިސްޓަރ އޮފް ޖެންޑާ ފެމިލީ އެންޑް ސޯޝަލް ސާވިސަސް އާއިޝަތު މުހައްމަދުދީދީގެ އިތުރުން ރައީސް އޮފީހުގެ ސްޕެޝަލް އެޑްވައިޒާ އޮން ސޯޝަލް ޕޮލިސީ ޑެ. މުސްޠަފާ ލުތުފީ ބައިވެރިވެ ވަޑައިގަންނަވައެވެ.
2004 ވަނަ އަހަރުގެ ސުނާމީ ކާރިސާގައި ވިލިނގިއްޔަށް ލިބުނު ގެއްލުމާއި އެ ކާރިސާއާ ގުޅިގެން އެ ރަށުގެ ރައްޔިތުން ދައްކައިދިން އެއްބައިވަންތަކަމާއި އެއްބައެއްވަންތަކަމުގެ ރޫހު ދައްކުވައިދޭ ހާއްސަ ވީޑިއޯ ޕްރެޒެންޓޭޝަން އެއް މި ޖަލްސާގައި ދައްކާފައިވާ ކަމަށް ރައީސް އޮފީހުން ވަނީ ބުނެފައެވެ.
