ކޮވިޑް-19 އިން ރައްކާތެރިވުމުގެ ގޮތުން ބޯޑާރު ބަންދު ކުރުމަށްފަހު އަލުން ހުޅުވާލި ފަހުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައި ވަނީ ރަޝިއާއާއި އިންޑިއާ އިންނެވެ.
ޓޫރިޒަމް މިނިސްޓްރީން އާންމު ކުރާ ހަފްތާގެ ތަފާސް ހިސާބުތަކުން ދައްކާ ގޮތުން ޖުލައި 15ގައި ބޯޑަރު ހުޅުވިފަހުން މިވީ 5 މަސް ދުވަސް ތެރޭގައި ރަޝިއާއިން ވަނީ 23،226 ފަތުރުވެރިން ރާއްޖެ އައިސްފައެވެ. އަދި އިންޑިއާއިން 18،758 ފަތުރުވެރިން އައިސްފައި ވާއިރު، އިނގިރޭސި ވިލާތުން ވަނީ 12،372 ފަތުރުވެރިން ރާއްޖެ އައިސްފައެވެ.
މީގެ އިތުރުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމުތަކުގެ ތެރޭގައި ޔޫއެސްއޭ، ޔޫއޭއީ، ޖަރުމަނު ޔޫކްރެއިން، ފްރާންސްގެ އިތުރުން ސްޕެއިން އަދި ބްރެޒިލް ހިމެނެއެވެ. މިއަހަރު މިހާތަނަށް ރާއްޖެ ދަތުރުކުރި ފަތުރުވެރިންގެ އަދަދު މިވަނީ 5 ލައްކައަށް އަރާފައެވެ.
ކޮވިޑްގެ ސަބަބުން ދުނިޔޭގެ ދަތުރުފަތުރުގެ ނިޒާމު އެއްކޮށްހެން ހުއްޓުމަކަށް އައުމަށްފަހު އެކި އެއާލައިންތަކުން ދަނީ އަލުން ދަތުރުތައް ފަށަމުންނެވެ. އެގޮތުން މިމަހުގެ ނިޔަލަށް އިތުރު 8 އެއާލައިނަކުން ރާއްޖެ ދަތުރުކުރަން ފަށާނެ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. އެ އެއާލައިންތަކުގެ ތެރޭގައި ހިމެނެނީ އަލިޓާލިއާ، އެއާ ފްރާންސް، ޔޫކްރެއިން އިންޓަނޭޝަނަލް އެއާލައިންސް، ނިއޯސް ސްޕާ، ގަލްފް އެއާ ރޮޝިޔާ އެއާލައިންގެ އިތުރުން ނޯވިންޑް އަދި އޮސްޓްރިއަން އެއާލައިންސް ހިމެނެއެވެ.
ފަތުރުވެރިކަމުގެ ދާއިރާގައި ކޮވިޑް-19ގެ ހާލަތު އޮތް ގޮތަށް ބަލާލާއިރު، ބޯޑަރު ހުޅުވިފަހުން ރާއްޖެ ޒިޔާރަތްކުރި 115730 ފަތުރުވެރިންގެ ތެރެއިން 208 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. މީގެ ތެރެއިން 151 މީހަކު ބަލިން ރަނގަޅުވިއިރު، 57 މީހުން އަދިވެސް ތިބީ ބަލިކޮށެވެ.
ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތު އެފުށް މިފުށަށް ޖެހިގެން ދިޔުމަށްފަހުން އަލުން އަނބުރާ ކޮޅަށް ޖެހުމުގެ މަސައްކަތް ދަނީ ކުރަމުންނެވެ. އެގޮތުން، މިހާތަނަށް 138 ރިސޯޓާއި 178 ހޮޓެލް އަދި ގެސްޓްހައުސްގެ އިތުރުން 129 ސަފާރީ އޮޕަރޭޓް ކުރަމުން އެބަދެއެވެ. އެއީ 38645 އެނދެވެ.
މިހާރު އައިސޮލޭޝަން ފެސިލިޓީތަކުގެ ގޮތުގަިއ ބޭނުން ކުރަމުން ދަނީ ފަން އައިލެންޑް ރިސޯޓް، ވެލިދޫ އައިސޮލޭޝަން ފެސިލިޓީގެ އިތުރުން ސެންޓްރަލް އައިސޮލޭޝަން ފެސިލިޓީއެވެ.
