ދައުލަތުން ކުރާ ފަސް މިލިއަން ރުފިޔާއަށް ވުރެ ދަށުގެ ހުރިހާ މުއާމަލާތްތަކެއްގެ މައުލޫމާތު ހާމަކުރަން ޖެހޭ ގޮތަށް މާލިއްޔަތުގެ އުސޫލު ބަދަލުކޮށްފިއެވެ.
ފިނޭންސް މިނިސްޓްރީން ނެރުނު ސާކިއުލާގައި ބުނީ ޕްރޮކިއުމަންޓެއް އެވޯޑްކޮށްފައި އެ މައުލޫމާތުތައް ސަރުކާރު ބަންދު ނޫން ފަސް ދުވަހުގެ ތެރޭގައި ގެޒެޓުގައި ޝާއިއުކުރަން ޖެހޭނެ ކަމަށާއި ޕްރޮކިއުމަންޓަކަށް 15 ޕަސެންޓަށް ވުރެ އިތުރަށް އެޑްވާންސްގެ ގޮތުގައި ދައްކާ އަދަދު 35،000 ރުފިޔާއަށް ވުރެ ބޮޑު ނަމަ އެ ފައިސާ އެއްފަހަރާ ދޫކުރުމުގެ ކުރިން ފިނޭންސް މިނިސްޓްރީއަށް އަންގަން ޖެހޭނެ ކަމަށެވެ.
ފިނޭންސް މިނިސްޓްރީން ބުނީ ކޮންމެ މަހެއްގައި އެފަދަ ޕްރޮކިއުމަންޓްތައް އެވޯޑްކޮށްފައިވާ ފަރާތުގެ މައުލޫމާތުވެސް، ދެން ފެށޭ މަހުގެ 10 ވަނަ ދުވަހުގެ ކުރިން ދިވެހި ސަރުކާރުގެ ގެޒެޓްގައި ޝާއިއުކުރަން ޖެހޭނެ ކަމަށެވެ.
އެގޮތުން ބަނޑޭރި ޕޯޓަލް ބޭނުންކުރާ ހުރިހާ އޮފީސްތަކުން ބިޑް ކޮމިޓީގެ މެންބަރުންގެ މައުލޫމާތު އެ ޕޯޓަލްގެމެދުވެރިކޮށް ހުށަހެޅުމަށް އަންގާފައިވާއިރު މިނިސްޓްރީން ބުނީ ބަޑޭރި ޕޯޓަލް ބޭނުންނުކުރާ އޮފީސްތަކުން ކޮމިޓީ މެންބަރުންގެ ދަފުތަރު ފުރިހަމަކުރުމަށް ފަހު [email protected] އަށް ފޮނުވަން ވާނެ ކަމަށެވެ.
މިނިސްޓްރީން ބުނީ ދައުލަތުގެ ޕްރޮކިއުމަންޓް ނިޒާމު ހަރުދަނާކުރުމަށްޓަކައި، ޕްރޮކިއުމަންޓްގެ މަސައްކަތްތަކުގައި އުޅޭ ހުރިހާ މުވައްޒަފުންނަށް ހާއްސަކޮށްގެން އެ މިނިސްޓްރީގެ ބަނޑޭރި ޕޯޓަލްގައި ގަވާމަންޓް ޕްރޮކިއުމަންޓް ޕްރޮފެޝަނަލްސް ނެޓްވޯކްގެ ނަމުގައި ނޮލެޖް ޕޯޓަލްއެއް ގާއިމުކޮށްފައިވާ ކަމަށެވެ. އަދި އެ ޕޯޓަލް މެދުވެރިކޮށް ޕްރޮކިއުމަންޓްގެ މަސައްކަތްތަކުގައި އުޅޭ ހުރިހާ މުވައްޒަފުންނަށް މައުލޫމާތު ބަދަލުކޮށް، މަސައްކަތާއި ގުޅިގެން އުފެދޭ ސުވާލުތައްކޮށް، އެފަދަ ސުވާލުތަކަށް ޖަވާބު ލިބިގެންދާނެ އިންތިޒާމެއް ހަމަޖެހިފައިވާނެ ކަމަށް ވެސް މިނިސްޓްރީން ބުންޏެވެ.
އަދި ޕްރޮކިއުމަންޓްގެ މަސައްކަތްތަކުގައި އުޅޭ އެންމެހައި މުވައްޒަފުން ޕްރޮކިއުމަންޓް އާއި ގުޅިގެން ކުރަންބޭނުންވާ ސުވާލުތައް ކުރުމުގައި އާއި، އަދި ޕްރޮކިއުމަންޓް އާއި ގުޅޭ އިތުރު މަޢުލޫމާތު ހޯދުމަށް އެ ޕޯޓަލް ބޭނުންކުރުމަށް ވެސް ފިނޭންސުން އެދެއެވެ.
