ދިފާއީ ވަކީލުން އެދިވަޑައިގަތަސް ބޭނުންވެވަޑައިގަންނަވާ ކޮންމެ ލިޔެކިޔުމެއް ދޭކަށް ނުޖެހޭނެ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވެފައިވަނީ، މިއަދު ކުރީގެ ރައީސް އަބްދުﷲ ޔާމީންގެ ޝަރީއަތުގައި ދިފާއުގެ ވަކީލުންނަށް ޖަވާބުދާރީ ވުމުގައި ހުރަސްތަކެއް ހުރީ އެފަރާތުން ހޯއްދެވުމަށް އެދިވަޑައިގެންފައިވާ ބައެއް ލިޔެކިޔުންތައް ދައުލަތުގެ ފަރާތުން ފޯރުކޮށްދީފައި ނުވާތީކަމަށް ވިދާޅުވެފައި ވަނިކޮށެވެ.
ޝަމީމް ވިދާޅުވީ، ޖިނާއީ ދައުވާތަކުގައި މައުލޫމާތު ހިއްސާ ކުރުމުގެ މޭރުމުން މައުލޫމާތުގެ ގޮތުގައި ރިއާޔަތް ކުރަނީ، ތަހުގީގީ މަރުހަލާގައި އެއްކޮށްފައިވާ އަދި ޝަރީއަތުގެ މަޖިލީހުގައި ބޭނުން ކޮށްފައިވާ މައުލޫމާތުތަކަށް ކަމަށެވެ. އަދި އެފަދައިން ހިއްސާ ކުރާނީ އެއްވެސް ހާލެއްގައި ދިފާއީ ވަކީލުން އެދިވަޑައިގަންނަވާ ހުރިހާ މައުލޫމާތެއް ނޫން ކަމަށް ޝަމީމް ވިދާޅުވިއެވެ. އަދީ އެއީ ތަޖުރިބާ މަދު ދިފާއީ ވަކީލުންނަށް އާންމުކޮށް ހެދޭ ގޯހެއް ކަމަށް ޝަމީމް ވިދާޅުވިއެވެ.
މިއަދު ކްރިމިނަލް ކޯޓުގައި އޮތް އަޑުއެހުމުގައި ރައީސް ޔާމީނުގެ ވަކީލުންނާ ހަވާލުކުރަން ޝަރީއަތުން އެންގި ލިޔެކިޔުންތައް މިހާރު ލިބިވަޑައިގެންފައިވޭތޯ ކުރިމިނަލް ކޯޓުގެ އިސް ގާޒީ އަހުމަދު ޝަކީލު ވަނީ ސުވާލު ކުރައްވާފައެވެ. މި ސުވާލަށް ޖަވާބު ދެއްވަމުން އެ މަނިކުފާނުގެ ވަކީލުން ވިދާޅުވެފައި ވަނީ ލިޔެކިޔުންތައް ނުލިބޭ ކަމަށާއި އެހެންކަމުން ޖަވާބުދާރީ ވުމުގައި ހުރަސްތަކެއް އެބަހުރި ކަމަށެވެ.
ސިއްރުކުރުމަށް ދައުލަތުން އެދުނު ލިޔުންތައް ފިޔަވައި ދެން ހުރި ލިޔުންތައް ދައުލަތުން ހިފަހައްޓާ ސަބަބު ހާމަކުރައްވަމުން ޕީޖީގެ ވަކީލާ ވިދާޅުވެފައި ވަނީ ހާމަކުރަން އެދުނު ލިޔެކިޔުންތަކުގެ ތެރެއިން ދައުވާކޮށްދިނުން އެދި ޕީޖީއަށް ފުލުހުން ފޮނުވި ފޯމު ހާމަ ނުކުރަނީ އެއީ ޖީނާއީ އިޖުރާއާތުގެ ގާނޫނުގެ ދަށުން ހާމަކުރަންނުޖެހޭ ލިޔުމެއް ކަމުގައިވާތީ ކަމަށެވެ. ހަމައެއާއެކު ދައުވާ ރައްދުވާ ފަރާތުގެ ބަންދާ ގުޅޭ މައުލޫމާތު ހިމަނައި ކޯޓަށް ޕީޖީން ފޮނުވާ ލިޔުމަކީވެސް އިދާރީ ލިޔުމެއް ކަމުގައިވާތީ އެ ލިޔުމަކީވެސް ހާމަކުރަންޖެހޭ ލިޔުމެއް ނޫން ކަމަށް އޭނާ ވިދާޅުވެފައިވެއެވެ. ތަހުގީގަށް ބަޔާން ދީފައިވާ ފަރާތްތަކުގެ ވަނަވަރަކީވެސް ދައުވާ ރައްދުވާ ފަރާތާ ހިއްސާކުރާ ލިޔުމެއް ނޫން ކަމަށާއި އެ ލިޔުންތަކަކީ ދައުވާ ސާބިތުކުރުމަށް ހުށަހަޅާ ހެކިންނަކީ ކޮން ބައެއްކަން ސާބިތުކުރުމަށް ހުށަހަޅާ ލިޔެކިޔުންތަކެއް ނޫން ކަމަށް ދައުލަތުގެ ވަކީލާ ވިދާޅުވެފައި ވެއެވެ.
ޔާމީންގެ ވަކީލުން ހޯއްދަވަން އެދިވަޑައިގެންފައިވާ އަނެއް ލިޔުމަކީ އެމްއެމްއޭއިން ރެއިސްކޮށްފައިވާ އެސްޑީއާރެއް ކަމަށާއި އެއީ ދައުލަތުން ހާމަކުރަންޖެހޭ މައުލޫމާތެއް ނޫން ކަމަށް ޕީޖީން ބުނެފައި ވެއެވެ. ހަމައެއާއެކު ހެކި ރައްކާކުރުމުގެ އަމުރަކަށް އެދިފައިވާ ހެއްކެއް ކަމުގައިވާ ލިޔުން އެ އަމުރާމެދު ގޮތެއް ޝަރީއަތުން ނިންމުމުގެ ކުރިން ދެވެން ނެތް ކަމަށާއި ރައީސް ޔާމީނުގެ ވަކީލުންގެ ފަރާތުން ތަހުގީގުގައި ހެކިން ދީފައިވާ ހެކި ބަހުގެ އޯޑިޔޯ ވީޑިޔޯ ހޯދުމަށް އެދިފައިވީ ނަމަވެސް އެފަދަ އޯޑިޔޯ ވީޑިޔޯ ހެދުމަކީ ޖިނާއީ އިޖުރާއާތުގެ ގާނޫނުން ލާޒިމުކުރާ ކަމަކަށް ނުވާތީ އެއީ ވުޖޫދުގައި ނެތް އެއްޗެއް ކަމުގައިވެސް ޕީޖީން ވަނީ ބުނެފައެވެ.
މިކަމާ ގުޅިގެން ރައީސް ޔާމީނުގެ ވަކީލުން ވިދާޅުވެފައި ވަނީ ދިފާއީ ވަކީލުން އެދިފައި ވަނީ ފޮރެންސިކް އެނަލެސިސް ރިޕޯޓު އެ އެއްޗެއްގެ މައްޗަށް ބިނާކުރި އަސްލު ހޯދުމަށް ކަމަށެވެ. އަދި ދައުލަތުން ނެތޭ ވިދާޅުވުމުން ނެތް ކަމަށް ގަބޫލު ނުކުރެވޭނެ ކަމަށާއި، އަދި ފޮރެންސިކް ރިޕޯޓެއް އުފައްދާނީ ކޮންމެވެސް އެއްޗެއްގެ މައްޗަށް ބިނާކޮށްގެން ކަމަށް ރައީސް ޔާމީންގެ ވަކީލުން ވިދާޅުވެފައިވެއެވެ.
މިކަމާ ގުޅިގެން ގާޒީ ޝަކީލް ވަނީ ދިފާއުގެ ވަކީލުން ހޯއްދެވުމަށް އެދިވަޑައިގެން ނުލިބި ހުރި ލިޔެކިޔުންތަކެއް ހޯދުމަށާއި ރައީސް ޔާމީނާއެކު ވަކީލުންނަށް ދިރާސާ ކުރަން ގިނަ ވަގުތު ބޭނުންވާނެތީ އެ އިންތިޒާމުތައް ޕީޖީ އޮފީސް މެދުވެރިވެގެން ހަމަޖައްސައިދިނުމަށް އަންގަވާފައެވެ.
