2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ފުލުހުން ހިންގި ކަމަށް ބުނާ "ބަޣާވާތް" ނުހިނގާ ކަމެއްގެ ގޮތުގައި ދެކުމަކީ ރާއްޖެ އަށް ދެވޭ ގެއްލުމެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ވިދާޅުވީ އެ ދުވަހު ފުލުހުން ނިކުމެ ހިންގި "މިއުޓިނީ" އެއީ ނުހިނގާ ކަމެއްގެ ގޮތުގައި ދެކި ފުލުހުންގެ ގާނޫނަށް އިސްލާހު ގެންނަން ވިސްނައިފިނަމަ އެއީ ޒަމާންތަކެއް ވަންދެން ރާއްޖެ އަށް ދެވޭނެ ބޮޑު ގެއްލުމެއް ކަމަށެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައިވެސް ރައީސް ނަޝީދު ވަނީ ފުލުހުންގެ ބިލަށް ބައެއް އިސްލާހުތައް ކޮމިޓީން ގެނެސްފައި ނުވާތީ އެކަމުގެ ކަންބޮޑުވުން ފާޅުކުރައްވާފައެވެ. އެގޮތުން ރައީސް ނަޝީދު ވިދާޅުވީ ފުލުހުންގެ ބިލަކީ ވަރަށް ގިނަ ބައެއްގެ ޝައުގުވެރިކަން ހުރި ބިލެއް ކަމަށާއި ނަމަވެސް އެމަނިކުފާނުގެ ޝައުގުވެރިކަމަށް ކޮމިޓީން މާބޮޑު އަޅާލުމެއް ބަހައްޓާފައި ނުވާ ކަމަށް ވިދާޅުވިއެވެ.
ރައީސް ނަޝީދު އެފަދައިން ވިދާޅުވެފައި ވާއިރު، މި ސަރުކާރު ވައްޓާލަން ނުކުތުމަކީ މިހާރު އޮތް ފުލުހުންގެ މުއައްސަސާ އިން ކުރާނެ ކަމެއް ނޫން ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ.
ނަޝީދުގެ ވެރިކަމާ ދެކޮޅަށް ގިނަ އަދަދެއްގެ ފުލުހުން ފެބްރުއަރީ 7، 2012 ގައި ނިކުތްއިރު، އެކަމުގައި އިސްކޮށް އުޅުނު ފުލުހުން މިހާރުވެސް އިސް މަގާމުތަކުގައި އެބަ ތިއްބެވެ. އެ ފަރާތްތަކަށް ފިޔަވަޅު އަޅަން އެމްޑީޕީން އަންނަނީ ތަކުރާރުކޮށް ގޮވާލަމުންނެވެ.
