ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ޗީފް ފައިނޭންޝަލް އޮފިސާގެ މަގާމަށް މުހައްމަދު ނިޒާމް ހަމަޖައްސަވައިފިއެވެ.
ނިޒާމް އަކީ ކުރިން އެ ކުންފުނީގެ ޖެނެރަލް މެނޭޖާ ޕްރޮކިއުމަންޓްގެ މަގާމުގައި ހުންނެވި ބޭފުޅާއެވެ.
އެސްޓީއޯގެ ސްޕޯކްސްޕާސަން އަބްދުﷲ މުހައްމަދު ވިދާޅުވީ، ނިޒާމް އެ މަގާމަށް އައްޔަން ކުރީ އެ މަގާމުގައި ކުރިން ހުންނެވި މުހައްމަދު މިހާދު މާދަމާއިން ފެށިގެން އެ މަގާމުން ވަކިވެވަޑައިގަންނަވާތީ ކަމަށެވެ.
ނިޒާމަކީ ފައިނޭންސް އެންޑް އެކައުންޓިންގ ދާއިރާއިން މާސްޓާސް ހާސިލްކުރައްވައި އެ ކުންފުނީގައި 10 އަހަރަށް ވުރެ ގިނަ ދުވަހު ހިދުމަތްކުރައްވާފައިވާ ބޭފުޅެއް ކަމަށް އެސްޓީއޯއިން ބުނެއެވެ.
މިހާދު މަގާމުން ވަކިވެ ވަޑައިގަންނަވަނީ ދުނިޔޭގެ އެންމެ ބޮޑު އެއް ކޮންސަލްޓަންސީ ފާމް ކަމަށްވާ ކޭޕީއެމްޖީގެ ޕާޓްނަރެއްގެ ގޮތުގައި މަސައްކަތް ކުރެއްވުމަށް ކަމަށް އެސްޓީއޯއިން ބުނެއެވެ. މިއީ އިންޓަނޭޝަނަލް ކޮންސަލްޓަންސީ ފާމެއްގެ ޕާޓްނަރެއްގެ ގޮތުގައި ދިވެއްސަކު އައްޔަން ކުރެވުނު ފުރަތަމަ ފަހަރެވެ.
މިހާދު އެސްޓީއޯގެ ސީއެފްއޯގެ މަގާމަށް ވަޑައިގެންނެވީ އޭނާގެ އުމުރުން 26 އަހަރުގައެވެ. އެގޮތުން މިހާދަކީ ޕަބްލިކް ލިސްޓެޑް ކުންފުންޏެއްގެ ސީއެފްއޯގެ މަގާމު އަދާކުރެއްވި އެންމެ ޒުވާން ސީއެފްއޯއެވެ. މިހާދު ވަނީ އެސްޓީއޯގައި 11 އަހަރަށް ވުރެ ގިނަ ދުވަހު ހިދުމަތްކުރައްވާފައެވެ.
