މިހާރު ކޮވިޑް އެކްޓިވް ކޭސްގެ ގޮތުގައި ތިބީ 926 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ރޭ އިއުލާން ކުރި ތަފާސް ހިސާބުތަކުގައި ދައްކާ ގޮތުގައި ޖުމްލަ އެކްޓިވް ކޭސްގެ ތެރޭގައި ހިމެނޭ 926 މީހުންގެ ތެރެއިން އެކްޓިވް ކޭސްގެ ގޮތުގައި ރަށްރަށުގައި ތިބީ ޖުމްލަ 15 މީހުން އަދި ރިސޯޓުތަކުގައި ތިބީ 138 މީހުންނެވެ.
އެކްޓިވް ކޭސްގެ ގޮތުގައި 124 ކޭސް ތިބީ މިހާރު މީހުން ދިރިއުޅޭ 15 ރަށެއްގައި ކަމަށް އެޗްޕީއޭއިން ބުނެއެވެ. އަދި އެއީ 3 ދިވެހިންނާއި 12 ބިދޭސީން ކަމަށް އެޗްޕީއޭއިން ބުނެއެވެ.
އެ ރަށްރަށަކީ ހދ. ކުޅުދުއްފުއްޓާއި ކުރިނބި، ށ. އަތޮޅުން ކޮމަންޑޫއާއި ފޭދޫ، ބ. އަތޮޅުން ކެންދޫއާއި ފުޅަދޫ، ކ. އަތޮޅުން ހުރާއާއި މާފުށި،، ގއ. އަތޮޅުން ނިލަންދޫ، ގދ. އަތޮޅުން ހޯޑެއްދޫއާއި ނަޑެއްލާއެވެ.
ރަށްރަށުންގައި ތިބި އެކްޓިވް ކޭސްގެ އަދަދު 15 ކޭސްއަށް މަދުވެފައިވީ ނަމަވެސް ރިސީޓުތަކުން ޕޮޒިޓިވް ވަމުން އަންނަ ކޭސްތައް އަންނަނީ އިތުރުވަމުންނެވެ. އެ ގޮތުން މިހާރު ރިސޯޓުތަކުގައި ޖުމްލަ 138 ކޭސް އެބަ ތިއްބެވެ. އެއީ 48 ޓުއަރިސްޓަކާއި 90 ސްޓާފުން ކަމަށް އެޗްޕީއޭއިން ބުނެއެވެ.
އެހެންކަމުން މާލެ ސަރަހައުދުގައި މިހާރު ތިބި އެކްޓިވް ކޭސްތަކުގެ ޖުމްލަ އަދަދަކީ 773 އެވެ. އެއީ މާލެ ވިލިމާލެ އަދި ހުޅުމާލެ އަދި ހުޅުލޭ ހިމެނޭ ގޮތަށެވެ.
މިހާތަނަށް އައި އިރު ރާއްޖެއިން ޕޮޒިޓިވްވި މީހުންގެ ޖުމްލަ އަދަދު ވަނީ 12،384 އަށް އަރާފައެވެ. އެގޮތުން އިއްޔެ ރާއްޖެއިން ވަނީ 29 މީހުން ކޮވިޑަށް ޕޮޒިޓިވްވެފައެވެ. އެއީ މާލެ ސަރަހައްދުން 24 މީހުންނާއި ރަށްރަށުން ޕޮޒިޓިވްވި 5 މީހުންނެވެ. އަދި ބަލިން ރަނގަޅުވި މީހުންގެ އަދަދު ވަނީ 11،406 އަށް އަރާފައެވެ.
މިހާރު ހޮސްޕިޓަލުގައި 72 މީޙުންނަށް ދަނީ ކޮވިޑް ބަލީގައި ފަރުވާ ދެމުން ކަމަށް އެޗްޕީއޭގެ ތަފށް ހިސާބުތަކުން ދައްކާއިރު 5 މިޙކަށް ލ. އަތޮޅުގައި ހުންނަ ކޮވިޑް ފެސިލިޓީގައި ފަރުވާ ދެމުންދާ ކަމަށް އެޗްޕީއޭއިން ބުނެއެވެ. އަދި މިވަގުތު ކޮވިޑް ބަލި ޖެހިފައި ތިބި އެކްޓިވް ކޭސްގެ ތެރެއިން އައިސޮލޭޝަންގައި ތިބީ 351 މީހުން ކަމަށް އެޗްޕީއޭއިން ބުނެއެވެ.
މިހާތަނަށް އައި އިރު ރާއްޖެއިން މި ބަލި ޖެހިގެން ނިޔާވެފައި ވަނީ 45 މީހުންނެވެ. އެއީ 38 ދިވެހިންނާއި 7 ބިދޭސީންނެވެ.
