ހަކުރު ބައްޔަށް އަހުލުވެރި ކުރުމުގެ ގޮތުން ވެބިނާ އެއް ބާއްވަން ނިންމައިފިއެވެ.
އެ ބިވެނާ ބޭއްވުމަށް ހަމަޖެހިފައި ވަނީ އައިޖީއެމްއެޗާއި ޑައިބެޓިސް ސޮސައިޓީ އަދި އެޗްޕީއޭ ގުޅިގެންނެވެ.
އެ ވެބިނާގައި މައުލޫމާތު ދިނުމަށް ހަމަޖެހިފާ ފަރާތްތަކުގެ ތެރޭގައި ޑައިޓިޝަނުންނާއި ނިއުޓިރިޝަނިސްޓުންނާއި ފިޒީޝިނުންނާއި ޕަބްލިކް ހެލްތް އެކްސްޕާޓުން ހިމެނޭ ކަމަށް ހެލްތު ޕޮރޮޓެކްޝަން އެޖެންސީ (އެޗޕީއޭ) އިން ވަނީ ބުނެފައެވެ.
އެ ވެބިނާގައި ސުވާލުކުރުމުގެ ފުރުސަތު އާންމުންނަށް ވަނީ ހުޅުވާލާފައެވެ.
މިއަހަރު ހަކުރު ބަލީގެ ދުވަހަކީ މިއަދެވެ. މި ދުވަސް ފާހަގަކުރުމުގެ ގޮތުން އެޗްޕީއޭ އިން އެކި ދުވަސް ތަކަށް ބަހާލެވިގެން، ޓީވީ އަދި ރޭޑިއޯ ޕްރޮގްރާމް ތަކުގައި ތަޖުރިބާކާކުން ހަކުރު ބައްޔާ ބެހޭގޮތުން މައުލޫމާތު ދިނުމަށް ހަމަޖެހިފައިވާ ކަމަށް އެޗްޕީއޭ އިން ވަނީ ބުނެފައެވެ.
ކޮންމެ އަހަރެއްގެވެސް 14 ނޮވެންބަރަކީ ހަކުރުބަލިން ރައްކާތެރިވެ ތިބުމަށް އާންމުން ހޭލުންތެރި ކުރުމުގެ ގޮތުން ދުނިޔޭގެ ހަކުރުބަލީގެ ދުވަހުގެ ގޮތުގައި ފާހަގަކުރާ ދުވަހެވެ. އެގޮތުން އިންޓަނޭޝަނަލް ޑައިބެޓީސް ފެޑެރޭޝަންއިން (އައިޑީއެފް) އިން އަހަރުގެ ހަކުރުބަލީގެ ދުވަހުގެ ޝިއާރުގެ ގޮތުގައި ކަނޑައަޅާފައި ވަނީ "ހަކުރުބައްޔަށް ތަފާތު ދެއްކުމުގައި ނަރުހުން" އެވެ.
އެ ޝިއާރަކީ 2020 އަދި 2021ގައި ވެސް ބޭނުންކުރުމަށް އާއްމު ކޮށްފައިވާ ޝިއާރެވެ. އެ ޝިއާރުގެ މަގުސަދަކީ ހަކުރުބަލި ޖެހިފައިވާ މީހުންނާއި އާއިލާތަކައް އެހީތެރިވެ އެއްބާރުލުން ދިނުމުގައި ނަރުހުން އަދާކުރާ އިސް ދައުރު ފާހަގަކުރުމެވެ.
