ރާއްޖޭގެ ރިސޯޓުތަކަށް ޗުއްޓީ ހޭދަކުރަން އަންނަ ފަތުރުވެރިންނަށް "ސްޕްލިޓް ސްޓޭ" ހުއްދަ އެޗްޕީއޭއިން ދީފިއެވެ.
ކޮވިޑާ ގުޅިގެން ކުރިން އޮތީ ރިސޯޓުތަކުގައި ޗުއްޓީ ހޭދަކުރަން އަންނަ ފަތުރުވެރިންނަށް އެމީހުން ޗުއްޓީ ހޭދަކުރަން އަންނަ ތަން ނޫން އެހެން ތަންތަނަށް ނުދެވޭ ގޮތަށެވެ. ހަމައެކަނި ހުއްދަ ދޫކޮށްފައިވަނީ އެއް ރިސޯޓުން އެއް މެނޭޖްމަންޓުގެ އަނެއް ރިސޯޓަށް ދިއުމަށް އެކަންޏެވެ. ނަމަވެސް ޓޫރިޒަމް މިނިސްޓްރީން މިއަދު ބުނީ ރިސޯޓަކަށް ޗުއްޓީ ހޭދަކުރަން އަންނަ ފަތުރުވެރިންނަށް ހޮޓެލް، ގެސްޓްހައުސް އަދި ސަފާރީއަށް ދެވޭނެ ހުއްދަ އެޗްޕީއޭ އިން ދީފައި ކަމަށެވެ.
ހުއްދަދިން ނަމަވެސް މިނިސްޓްރީން ވަނީ ކަނޑައަޅާފައިވާ ގައިޑްލައިންއަށް އަމަލުކުރުމަށް އެދިފައެވެ.
ކޮވިޑް-19 އަށް ފަހު ރާއްޖޭގެ ބޯޑަރު ހުޅުވާލި ފަހުން ރާއްޖެއަށް އަންނަ ފަތުރުވެރިންގެ އަދަދު އިތުރުވާން ފަށަފައިވާއިރު، ރިސޯޓުތައް ހުޅުވާލާފައި ވަނީ ޖުލައި މަހުގެ 15 ވަނަ ދުވަހެވެ.
މީގެ އިތުރުން ގެސްޓްހައުސްތައް ބަންދުކޮށްފައި ހުންނަތާ އެތަށް މަހަކަށްފަހު ގެސްޓްހައުސްތައް ހުޅުވީ މި މަހުގެ 15 ވަނަ ދުވަހެވެ. އެގޮތުން، 9 ރަށަކުން 16 ގެސްޓްހައުސްއެއް އެ ދުވަހު ވަނީ ހުޅުވާފައެވެ.
