ވަޑާން ގެއަކުން ވައްކަން ކުރި މީހަކު އެއް އަހަރު ދުވަހުގެ މުއްދަތަށް ޖަލަށް ލުމަށް ތިލަދުންމަތީ ދެކުނުބުރީ ވައިކަރަދޫ މެޖިސްޓްރޭޓް ކޯޓުން ހުކުމް ކޮށްފިއެވެ.
ފުލުހުން ބުނީ ވައްކަމުގެ މައްސަލައިގެ ކުށް ސާބިތުވުމާ ގުޅިގެން މި މަހުގެ 4 ވަނަ ދުވަހު ހުކުމްކޮށްފައިވަނީ ހދ. ވައިކަރަދޫ، ޕެރިމްރޯޒް، 36 އަހަރުގެ ހުސައިން ޝާހްގެ މައްޗަށް ކަމަށެވެ.
ދައުލަތުން ހިސައިން ޝާހްގެ މައްޗަށް ވައްކަން ކުރި ކުށުގެ ދައުވާ އުފުލާފައިވަނީ، މި އަހަރުގެ މާރިޗު މަހުގެ 17 ވަނަ ދުވަހެވެ. އެ ދައުވާ އޭނާގެ މައްޗަށް އުފުލާފައި ވަނީ ހދ. ވައިކަރަދޫ ، ތޮނަގޭގައި ހުންނަ ވަޑާންގެއިން މަކިޓާ ބުރޭންޑްގެ ސަރކިއުލާރ ކީހަކާއި، މަކިޓާ ބްރޭންޑްގެ ޓްރިމަރެއްގެ އިތުރުން މަކިޓާ ބްރޭންޑްގެ ބުރުމާއެއް ވަގަަށް ނަގާފައިވާ މައްސަލައާއި ގުޅިގެންނެވެ.
އެ ދައުވާ ޝަރީއަތުން ބެލުމަށްފަހު ކޮށްފައިވާ ހުކުމްގައި ބުނެފައިވަނީ، އެ މައްސަލައިގައި ދައުވާލިބޭ ހިސައިން ޝާހް ، އެ ދައުވާގެ އިބްތިދާއީ މަޖިލީހުގަޔާއި އަވަސް ނިޔާގެ ޝަރީއަތުގެ މަޖިލީހުގައި އިއުތިރާފުވެފައިވާތީ ވައްކަންކުރުމުގެ ކުށް ސާބިތުވާކަމަށެވެ.
އެހެންކަމުން ހުސައިން ޝާހްގެ މައްޗަށް ދައުލަތުން ކޮށްފައިވާ ވައްކަން ކުރުމުގެ ކުށް ސާބިތުވާކަމަށް ކަނޑައަޅައި، އެއް އަހަރު ދުވަހުގެ މުއްދަތަށް ޖަލަށްލުމަށް ވަނީ ހުކުމްކޮށްފައެވެ.
