އެމެރިކާގެ 2 ސައެންސްވެރިން ކަމަށްވާ ހާވީ ޖޭ އޯލްޓާއާއި ޗާލްސް އެމް ރައިސް އަދި އިނގިރޭސިވިލާތުގެ ސައެންޓިސްޓު މައިކަލް ހިއުޓަންއަށް، ސިއްހީ ރޮނގުން ދޭ ނޮބޭލް އިނާމު އެވޯޑް ކޮށްފިއެވެ.
މި 3 ސައެންސްވެރިންނަށް ނޮބޭލް އިންމު އެވޯޑް ކޮށްފައި ވަނީ، ހެޕަޓައިޓިސް-ސީ ވައިރަސް ދެނެގަނެގެންނެވެ.
އެމެރިކާގެ 2 ސައެންސްވެރިއަކާ، އިނގިރޭސިވިލާތުގެ ސައެންސްވެރިއަކަށް ސިއްހީ ރޮނގުން ނޮބޭލް އިނާމު ލިބިފައި ވާ ކަން އިއުލާން ކުރެއްވީ، ނޮބޭލް ކޮމިޓީގެ އިސްވެރިޔާ ޓޮމަސް ޕެރިމަންއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ލަފާ ކުރާ ގޮތުގައި، ދުނިޔޭގެ އެކި ކަންކޮޅުތަކުގައި ހެޕަޓައިޓިސް-ސީގެ 70 މިލިއަން ކޭސް އުޅޭނެއެވެ. އަދި މި ބަލީގައި އަހަރަކު 400000 މީހުން މި ދުނިޔެއާއި ވަކިވެދާ ކަމަށްވެސް ޑަބްލިއުއެޗްއޯއިން ލަފާ ކުރެއެވެ. ހެޕަޓައިޓިސް-ސީ އަކީ ދިގު މުއްދަތުގެ ބައްޔަކަށް ވާއިރު، މިއީ ލިވާ އިންފްލަމޭޝަންއާއި ކެންސަރަށް މަގުފަހިކުރާ ވައިރަހެކެވެ.
