ވޯލްޑް ޓްރެވަލް އެންޑް ޓޫރިޒަމް ކައުންސިލް (ޑަބްލިއުޓީޓީސީ) އިން ދޭ، ސޭފް ޓޫރިޒަމް ސްޓޭމްޕް ރާއްޖެއިން ހޯދައިފިއެވެ.
ޓޫރިޒަމް މިނިސްޓްރީ އިން މިއަދު ބުނީ ރާއްޖެއިން ކޮވިޑް19ގެ ހާލަތުގައި ފަތުރުވެރިންގެ ސަލާމަތާއި ރައްކާތެރިކަމަށް އަޅާފައިވާ ފިޔަވަޅުތައް ޑަބްލިއުޓީޓީސީ އިން ބަލައިގެންފައިވާ ކަމަށެވެ.
އެގޮތުން ސޭފް ޓޫރިޒަމް ސްޓޭމްޕް ރާއްޖެއަށް ލިބިފައިވާ ކަމަށާއި، މިއީ ޓޫރިސްޓުންނަށް ރާއްޖެއަކީ ރައްކާތެރި މަންޒިލެއްގެ ޔަގީންކަން ދޭން މުހިންމު ސެޓްފިކެޓެއް ކަމަށް މިނިސްޓްރީން ވަނީ ބުނެފައެވެ. އެ ސްޓޭމްޕް ރާއްޖެއަށް ލިބިފައިވަނީ އެ ޖަމްއިއްޔާ އިން ގަބޫލުކުރާ ބައިނަލްއަގުވާމީ ސޭފް ޓޫރިޒަމް ޕްރޮޓޮކޯލްތައް ރާއްޖެއިން ފުރިހަަމަ ކޮށްފައިވާތީ އެވެ.
އެ ސްޓޭމްޕް ރާއްޖެއަށް ލިބުނުކަން އިއްޔެ އަންގާފައިވާއިރު މިހާރު ޑަބްލިއުޓީޓީސީން ވެސް ވަނީ އެކަން އިއުލާނުކޮށްފައެވެ.
ކޮވިޑް19 ގެ ބަލިމަޑުކަމާ ގުޅިގެން ބޯޑަރު ބަންދުކޮށްފައި އޮތުމަށްފަހު މިދިޔަ ޖުލައި 15 ގައި ބޯޑަރު އަލުން ހުޅުވާލި ނަމަވެސް އޮޕަރޭޓު ކުރުމުގެ ހުއްދަ ދީފައިވަނީ ރިސޯޓުތަކަށާއި ސަފާރީ ތަކަށެވެ. އަދި އަންނަ މަހުގެ 15 އިން ފެށިގެން މާލެ ނޫން ސަރަހައްދުގެ ގެސްޓު ހައުސްތައް އޮޕަރޭޓްކުރަން ފެށުމަށް ހުއްދަ ދިނުމަށް ވަނީ ނިންމާފައެވެ.
