ފާއިތުވީ 24 ގަޑިއިރުގެ ތެރޭގައި، އަވަށްޓެރި އިންޑިއާއިން 90632 މީހަކު ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެފައި ވާ ކަމަށް އެގައުމުން ރިޕޯޓްކޮށްފިއެވެ.
މިއީ އިންޑިއާއަށް ކޮވިޑް-19ގެ ބަލިމަޑުކަން ފެތުރުނު ފަހުން މިހާތަނަށް އެންމެ ގިނަ އަދަދަކަށް ޕޮޒިޓިވް ކޭސް ރެކޯޑް ކުރި ދުވަހެވެ.
އިންޑިއާގެ ސިއްހަތާ ބެހޭ ވުޒާރާގެ ތަފާސް ހިސާބުތަކަށް ބަލާއިރު، އެ ގައުމުން މިހާތަނަށް ކޮވިޑް-19އަށް ޕޮޒިޓިވްވީ މީހުންގެ ޖުމުލަ އަދަދަކީ 4113811 އެވެ. މަރުވި މީހުންގެ ޖުމުލަ އަދަދަކީ 70626އެވެ.
ބައިނަލްއަގުވާމީ މަސްރަހުން ލިބެމުންދާ އެންމެ ފަހުގެ ތަފާސް ހިސާބުތަކަށް ބަލާއިރު، އިންޑިއާ މިހާރު މިސްރާބު ޖަހާފައި ވަނީ ދުނިޔޭގައި ދެވަނައަށް އެންމެ ގިނަ އަދަދަކަށް ކޮވިޑް-19ގެ ކޭސްތައް ރެކޯޑް ކުރަމުންދާ ގައުމާ ދިމާލަށެވެ. މިވަގުތުގެ ތަފާސް ހިސާބުތަކަށް ބަލާއިރު، 2 ވަނާގައި އޮތީ ބްރެޒިލްއެވެ. ބްރެޒިލްއިން ހޮނިހިރު ދުވަހުގ ޕޮޒިޓިވްވި މީހުންނާއެކު އެ ގައުމުން ބަލި ޖެހުނު މީހުންގެ ޖުމުލަ އަދަދު 4123000 އަށް އަރާފައިވާއިރު، އިންޑިއާއާއި ބްރެޒިލްއާއި ދެމެދު އޮތީ ގާތްގަނޑަކަށް 9189 ކޭހުގެ ފަރެގެކެވެ.
އިންޑިއާގެ ސިއްހަތާ ބެހޭ ވުޒާރާއިން މައުލޫމާތު ދޭ ގޮތުގައި، މިވަގުތު އެކްޓިވް ކޭހުގެ ގޮތުގައި 862320 ކޭހެއް ފާހަގަ ކުރެވިފައިވެއެވެ. ޝިފާ ލިބި، ރަނގަޅުވި މީހުންގެ އަދަދަކީ 3180865 ކަމަށްވެސް ރެކޯޑްތަކުން ދައްކައެވެ.
ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، ހޮނިހިރު ދުވަހުގެ ނިޔަލަށް އެގައުމުން 48831145 ސާމްޕަލެއް ވަނީ ކޮވިޑް-19އަށް ޓެސްޓު ކޮށްފައެވެ.
ޕާޓީ ކުރުމަކަށް ބަދަލެއް ނެތް
ނިމިދިޔަ އޯގަސްޓް މަހަށް ބަލާއިރު، ދުނިޔޭގެ ނިސްބަތުން އެންމެ ގިނަ އަދަދަކަށް ކޭސް ރެކޯޑް ކޮށްފައިވަނީ އިންޑިއާއިންނެވެ. މި މަމަހުގެ ފުރަތަމަ ހަފުތާ ނިމުމަކާ ގާތްވިއިރުވެސް މިކަން އޮތީ މިހެންކަމުގައި ދެންނެވިދާނެއެވެ.
ކަން މިހެން އޮތް ނަމަވެސް، އިންޑިއާގެ އާންމު މަސްރަހުން މިހާރު ފެންނަމުންދަނީ ބަލިމަޑުކަމެއްގައި އުޅޭ ބަޔަކު އުޅޭނެ ފަދަ ގޮތެއްގެ މަންޒަރުތަކެއް ނޫނެވެ. މިފަދަ ހަރަކާތްތައް ހުއްޓުވުމަށް އިންޑިއާގެ ފުލުހުންވެސް ދަނީ ހަރުކަށި ފިޔަވަޅުތަކެއް ތަންފީޒު ކުރަމުންނެވެ.
އެގޮތުން، އުތުރުގެ ޕަންޖާބު ސްޓޭޓްގައި ގަވައިދާ ހިލާފަށް ޕޫލްޕާޓިއެއް ބާއްވައިގެން އުޅުނު މީހުންގެ ތެރެއިން 54 މީހަކު، ކަމާބެހޭ ފަރާތްތަކުގެ ބެލުމުގެ ދަށަށް ގެންގޮސްފައިވާކަމަށް ޚަބަރު ލިބެއެވެ.
އެޑިޝަނަލް ޑެޕިއުޓީ ކޮމިޝަނާ އޮފް ޕޮލީސް، ސަމީރް ވަރުމާ ވިދާޅުވީ، ކޮވިޑް-19ގެ ބަލިމަޑުކަމުގެ ތެރޭގައި ޕޫލްޕާޓީ އިންތިޒާމް ކުރީ ލޫދިއާނާގެ ރެސްޓޯރަންޓަކުން ކަމަށެވެ. ފުލުހުންނަށް ލިބުނު ޓިޕަކާ ގުޅިގެން ރެއިޑެއް ޖެއްސި ކަމަށާ، ޕާޓީ ކުރިއަށްދިޔަ މާހައުލުން ބަނގުރާވެސް ފެނިފައި ވާކަމަށާ، އެތަކެތިވެސް ފުލުހުންގެ ކޮންޓްރޯލްގެ ދަށަށް ގެންގޮސްފައިވާ ކަމަށް ސަމީރު ވިދާޅުވިއެވެ.
މިއަދު ހެނދުނުގެ ނިޔަލަށް ބަލާއިރު ޕަންޖާބުން އެކަނިވެސް 15731 ޕޮޒިޓިވް ކޭހާ، 1739 މަރުގެ ކޭސް ވަނީ ރެކޯޑް ކޮށްފައެވެ.
