ރާއްޖޭގެ އާބަދީގެ 17 ޕަސަންޓް މީހުންނަކީ، މަހަކަށް 2235.5 ރުފިޔާ ވެސް އާމްދަނީގެ ގޮތުގައި ނުލިބޭ މީހުން ކަމަށް 2019 ވަނަ އަހަރު ހެދި ގޭބިސީތަކުގެ އާމްދަނީއާ ހަރަދު ކުރުން ހުރި ގޮތުގެ ސާވޭއިން ދައްކައިފިއެވެ.
މި ސާވޭއިން ދައްކާ ގޮތުގައި، ރާއްޖޭގެ މީޑިއަން އާމްދަނީއަކީ، މަހަކަށް 4471 ރުފިޔާއެވެ. އެއީ ދުވާލަހަށް 147 ރުފިޔާއެވެ. އަދި އާބާދީގެ 17 ޕަސަންޓް މީހުންނަކީ މީޑިއަން އާމްދަނީގެ 50 ޕަސަންޓަށް ވުރެ ދަށުން އާމްދަނީ ލިބޭމީހުން ކަމަށް މި ސާވޭއިން ދައްކާފައިވައިރު، މީޑިއަން އާމްދަނީގެ 50 ޕަސަންޓަށް ވުރެ ދަށުގައި ދިރިއުޅޭ މީހުންގެ މިންގަނޑުން ދައްކައިދެނީ އާމްދަނީގެ ފަރަގު އެ ގައުމެއްގައި ހުރި މިންވަރެވެ.
އެގޮތުން، އާބާދީގެ 19 ޕަސަންޓް އަންހެނުންނަކީ މަހަކަށް 2235.5 ރުފިޔާ ވެސް ނުލިބޭ މީހުންނަށްވާއިރު، ފިރިހެނުންގެ ތެރެއިން 16 ޕަސަންޓް މީހުންނަށް ވެސް މިވަރު އާމްދަނީގެ ގޮތުގައި ނުލިބެއެވެ.
އާބަދީގެ ނިސްބަތުން މީޑިއަން އާމްދަނީ އަކީ 4471 ރުފިޔާ ކަމަށް ވިޔަސް، މާލެއާއި އަތޮޅުތެރޭގައި މީޑިއަން އާމްދަނީ ތަފާތުވާނެއެވެ. އެގޮތުން މާލޭގައި މީޑިއަން އާމްދަނީ 6250 ރުފިޔާގައި ހުރިއިރު، އެއީ ދުވާލަކަށް 205 ރުފިޔާއެވެ. އަދި އަތޮޅުތެރޭގައި މީޑިއަން އާމްދަނީ 3200 ރުފިޔާގައި ހުރިއިރު އެއީ ދުވާލަކަށް 105 ރުފިޔާއެވެ.
ރާއްޖޭގައި އާމްދަނީ ލިބެނީ 221،259 މީހަކަށެވެ. މި ސާވޭގައި އާމްދަނީ ލިބޭ މީހުންގެ ތެރޭގައި ޕެންޝަންގެ ގޮތުގައި ފައިސާ ލިބޭ މީހުން ވެސް ހިމަނާފައިވެއެވެ. އެއީ މާލޭގައި 112،538 މީހަކާއި އަތޮޅުތެރޭގައި 108،722 މީހެކެވެ.
