އަވަށްޓެރި އިންޑިއާއިން މިއަދުވެސް ރެކޯޑް އަދަދަކަށް ކޮރޯނާވައިރަސް ޑިޒީޒް (ކޮވިޑް-19)ގެ ކޭސް ރިޕޯޓް ކޮށްފިއެވެ.
އިންޑިއާގެ ހެލްތް އެންޑް ފެމެލީ ވެލްފެއާ މިނިސްޓްރީއިން މިއަދު އާންމު ކުރި ތަފާސް ހިސާބުތަކަށް ބަލާއިރު، އިއްޔެ އެގައުމުން 78761 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. މިއީ، އިންޑިއާއިން ކޮވިޑް-19ގެ ކޭސްތައް ފެންނަން ފެށިފަހުން، މިހާތަނަށް ދެވަނަ އަށް އެންމެ ގިނަ އަދަދަކަށް ކޭސް ރެކޯޑް ކުރި ދުވަހެވެ.
މިއިންޑިއާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 3542733 އަށް އަރާފައެވެ. މި ހިނގާ، އޯގަސްޓް މަހު އެންމެ ގިނަ އަދަދަކަށް ކޭސް ރެކޯޑް ކުރަމުންދާ އިންޑިއާ އޮތީ، ދުނިޔޭގެ ނިސްބަތުން ބަލާއިރު، 3 ވަނައަށް އެންމެ ކޭސް ގިނަ ގައުމުގެ މަގާމުގައެވެ.
ކޮވިޑް-19 ޖެހިގެން އިންޑިއާއިން އިއްޔެ 948 މީހެއްގެ ފުރާނަ ގެއްލުނު ކަމަށް ރެކޯޑްތަކުން ދައްކައެވެ. މިއާއެކު އިންޑިއާއިން ކޮވިޑް-19ގައި މަރުވި މީހުންގެ އަދަދު ވަނީ 63498 އަށް އަރާފައެވެ.
އިންޑިއާގައި މިވަގުތު އެކްޓިވް ކޭހުގެ ގޮތުގައި ފާހަގަކޮށްފައި ވަނީ 765143 ކޭހެކެވެ. ބަލި ޖެހުނު މީހުންގެ ތެރެއިން 2713933 މީހަކަށް ޝިފާ ލިބި ރަނގަޅުވެފައި ވާ ކަމަށް ތަފާސް ހިސާބުތަކުން ދައްކައެވެ. 1.3 ބިލިއަން މީހުންގެ އާބާދީއެއް އޮތް އިންޑިއާއިން މިހާތަނަށް 41461636 ސާމްޕަލެއް ކޮވިޑް-19އަށް ޓެސްޓު ކޮށްފައިވާއިރު، މިއީ އާބާދީގެ ކޮންމެ 33 މީހަކަށް 1 ޓެސްޓެވެ. އިންޑިއާގެ އާބާދީގެ ނިސްބަތުން ބަލާއިރު، ކޮންމެ 390 މީހަކުން 1 އަށް ކޮވިޑް-19 ޖެހިފައިވާކަމަށް ތަފާސް ހިސާބުތަކުން ދައްކައެވެ.
