ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް ގައުމުތަކުން ތަންފީޒު ކުރަމުންދާ ފިޔަވަޅުތަކުގެ ތެރެއިން މާސްކު އެޅުން ލާޒިމު ކޮށްފައިވާއިރު، އެ ގައުމެއްގައި ކަނޑައަޅާފައިވާ ގަވައިދުތަކާ އެއް ގޮތަށް، އުމުރުން 12 އަހަރުން މަތީގައި ހުރިހާ އެންމެން އަމަލު ކުރުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން ގޮވާލައިފިއެވެ.
ކުޑަ ކުދިންގެ ކިބައިން ކޮވިޑް-19 ފެތުރިގެންދާ ގޮތާ ބެހޭ މާ ބޮޑު ތަފްސީލުތަކެއް އަދި ލިބިފައި ނުވާކަމަށް ޑަބްލިއުއެޗްއޯއިން އިއުތިރާފުވެއެވެ. ނަމަވެސް ފުރާވަރު އުމުރުގެ ކުދިންނަކީ ބޮޑެތި މީހުންނެކޭ އެއްފަދައިން ވައިރަސް ފަތުރާ ބައެއްކަމަށް ދާއިރާގެ ތަޖުރިބާކާރުން ބުނެއެވެ.
ކުޑަކުދިން މާސްކު އެޅުމާ ބެހޭ ގޮތުން ޑަބްލިއުއެޗްއޯއިން އެންމެ ފަހުން އެކުލަވާލި ގައިޑްލައިންއަށް ބަލާއިރު، އުމުރުން 5 އަހަރުން ދަށުގެ ކުދިން، އާންމު ކޮށް މާސްކު އެޅުމަށް އިރުޝާދު ދީފައެއް ނުވެއެވެ.
އުމުރުން 12 އަހަރު ފުރިފައިވާ ކުދިންނަކީ ބޮޑެތި މީހުންނެކޭ އެއްފަދައިން މާސްކު ކުރަން ބޭނުން ކުރަން ޖެހޭނެ ބައެއް ކަމަށާ، ވަކިން ހާއްސަކޮށް، ބޭރު ތެރެއަށް ނިކުމެ އުޅޭ އިރު 1 މީޓަރަށް ޖިސްމާނީ ގައިދުރުކަން ތަންފީޒު ނުކުރެވިދާނެ ކަމުގެ ބިރު އޮންނަ ތަންތަނަށް ދާއިރު މާސްކު ބޭނުން ކުރުމަށް ޑަބްލިއުއެޗްއޯއިން ގޮވާލައެވެ.
އުމުރުން 6-11 އަހަރާ ދެމެދުގެ ކުދިން މާސްކު ބޭނުން ކުރުމުގައި، ބޮޑެތި މީހުންގެ އެހީ ހޯދުމަށާ، މާސްކު އަޅައިގެން ހުންނައިރުވެސް އެކުދިންނަށް ސަމާލުވުމަށް ޑަބްލިއުއެޗްއޯގެ ގައިޑްލައިންގައި ފާހަގަކޮށްފައިވެއެވެ.
ކުޑަކުދިންނާ ގާތުން މަސައްކަތް ކުރާ ޓީޗަރުންގެ ތެރެއިން 60 އަހަރުން ދަށުގެ ޓީޗަރުން ފޮތި މާސްކު ބޭނުން ކުރުމަށް ޑަބްލިއުއެޗްއޯއިން އިރުޝާދުދެއެވެ. އުމުރުން 60 އަހަރުން މަތީގެ މީހުންނާ، ސިއްހީ އެކި މައްސަލަތައް ހުންނަ މީހެއް ނަމަ ބޭނުން ކުރަންޖެހެނީ، މެޑިކަލް ނުވަތަ ސާޖިކަލް މާސްކުކަން ޑަބްލިއުއެޗްއޯއިން ފާހަގަކުރެއެވެ.
