ރާއްޖޭގައި ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމަށް ބިލު ފާސްކޮށްފިއެވެ.
ސަރުކާރުގެ ފަރާތުން އެ ބިލު ހުށަހަޅާފައިވަނީ މަކުނުދޫ ދާއިރާގެ މެންބަރު މުހައްމަދު ރާއީއެވެ. އެ ބިލު ފާސްވެފައިވަނީ ވޯޓުގައި ބައިވެރިވެވަޑައިގެންނެވި 62 މެންބަރުންގެ އިއްތިފާގުންނެވެ. ބިލް ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.
އެބިލް އެކުލަވާލާފައި ވަނީ ރާއްޖޭގައި ގާއިމުވެގެން ހިންގާ ވިޔަފާރިތަކުގެ މެދުގައި ވާދަވެރިކަން އުފައްދައި ދެމެހެއްޓުމަށެވެ. އަދި ވިޔަފާރިތަކުގެ މެދުގައި ވާދަވެރިކަން ހަނިވާގޮތަށް ހިންގާ ވިޔަފާރީގެ އަމަލުތަކުގެ ސަބަބުން ގައުމުގެ އިގްތިސޯދީ ކުރިއެރުމަށް ކުރާ ނޭދެވޭ އަސަރުތައް ހުއްޓުވުމަށްޓަކައެވެ.
މާކެޓުގައި ނުފޫޒު ފޯރުވޭނޭ މަގާމެއް ލިބިފައިވާ ވިޔަފާރިއަކުން އެފަދަ މަގާމެއްގެ ބޭނުން ނަހަމަ ގޮތުގައި ބޭނުންކުރާ ކުރުމާއި ވިޔަފާރީގެ އަމަލުތައް މަނާކުރުން އަދި ވާދަވެރިކަމަށް ހުރަސްއަޅާ އެއްބަސްވުންތައް މަނާކުރެވޭނެ ނިޒާމެއް ގާއިމުކުރެވޭނެ ގޮތްތައް އެ ބިލުގައި ވަނީ ކަނޑައަޅާފައެވެ.
