ޖުލައި 26 ވަނަ ދުވަހަކީ ކޮންމެ އަހަރަކުމެ ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަ ކުރަމުން އަންނަ ދުވަހެކެވެ. މިއީ، އިނގިރޭސީންގެ ހިމާޔަތުން ފުރިހަމަ މިނިވަންކަމެއް ލިބި ސިޔާސީ ގޮތުން ރާއްޖެއަށް މިނިވަންކަން ލިބުނު ދުވަހެވެ. އެގޮތުން މި އަހަރު ފާހަގަ ކުރަމުން މިދަނީ ރާއްޖޭގެ މިނިވަން ކަމަށް 55 އަހަރު ފުރުނު މިނިވަން ދުވަހެވެ.
1965، ޖުލައި 26 ވަނަ ދުވަހު ރާއްޖެއަށް ފުރިހަމަ މިނިވަންކަމެއް ލިބުނު އިރު، ރާއްޖޭގެ ތާރީހުން ފެންނަން އޮތީ ފެށުނީއްސުރެ ރާއްޖެއަކީ މިނިވަން ގައުމެއް ކަމުގައެވެ. ރާއްޖޭގެ އަމިއްލަ ވެރިކަމާއި ސިޔާދަތު ގެއްލިގެން ގޮސްފައި އޮތީ، އެންމެ ދެ ފަހަރެވެ. އެއީ މީލާދީން 1558 އިން 1573 އަށް ޕޯޗުގީޒުން ރާއްޖޭގެ މައްޗަށް އަތްގަދަކޮށް ވެރިކަން ހިންގި ދުވަސްވަރާއި، އޭގެފަހުން ހިޖުރައިން 1166 ގައި ހޮޅިން ރާއްޖެ ހިފައި އެމީހުންނަށް މި ގައުމުގައި ތިބެވުނު ދުވަސްކޮޅެވެ.
މިނިވަންކަން ގެއްލިގެން ދިޔަ ކޮންމެ ފަހަރަކުމެ، އަލުން މިނިވަންކަން ހޯދިފައިވަނީ، ކާބަފައިންގެ ތެރެއިން އެތައް ބަޔަކު ކުރި މިންނެތް މަސައްކަތުންނެވެ. ދިވެހިން މިނިވަން ކަމަށް ބުނެ ދައްކާ ވަހަކައަކީ ފުންކޮށް މިއަދު ވިސްނާލަން ޖެހިފައިވާ ވާހަކަތަކެވެ. ދިވެހިންނަކީ ހަގީގީ މިނިވަންކަން ލިބިފައިވާ ބަޔެއް ހެއްޔެވެ؟ އެހެން ގައުމެއްގެ ވެރިކަން މި ގައުމުގެ ރައްޔިތުންގެ މައްޗަށް ނުކުރާތީވެ، އަހަރެމެން ދިވެހިންނަކީ މިނިވަން ބަޔެއް ހެއްޔެވެ؟
ވޭތުވެދިޔަ ދެ މަހެއްހާ ދުވަސްތެރޭގައި ހިނގާފައިވާ ކަންތަކަށް ބަލާލާއިރު ހަމަ ހަގީގަތުގައި ވެސް ދިވެހިންގެ މިނިވަން ކަމާމެދު ސުވާލު އުފެދެއެވެ. 5 ލައްކައިގެ އާބާދީއެއް އޮންނަ ރާއްޖެއަށް ވޭތުވެދިޔަ 5 އަހަރެއްހާ ދުވަސްތެރޭގައި ރާއްޖޭގެ އާބާދީގެ 25 ޕަސަންޓު، 110،000 އަށް ވުރެ ގިނަ ބިދޭސީން އެތެރެ ކޮށްފައި ވެއެވެ. އޭގެ ދެބައިކުޅަ އެއްބަޔަށް ވުރެ ގިނަ މީހުންގެ އެއްވެސް ލިޔެކިއުމެއް ނެތް އިރު، އެމީހުންނަކީ ކޮންތާކު ކޮންބައެއް ކަމެއް ވެސް ނޭނގޭ ކަމަށް ސަރުކާރުން ބުނެއެވެ. އެމީހުން އަނބުރާ ފޮނުވާލަންވީ ތަނެއް ވެސް ނޭނގޭ ކަމަށް ވެއެވެ.
މި ހުރިހާ މީހުން ރާއްޖެއައީ ބިދޭސީ މަސައްކަތްތެރިންގެ ގޮތުގައެވެ. ރާއްޖެ އައުމަށް ފަހު އެކި އެކި ސަބަބުތަކާ ހުރެ ކާކު ކަން އަންގައިދޭ އެއްވެސް ލިޔުމެއް އަތުގައި ނޯންނަ ހިސާބަށް ކަންތައް ގޯސްވީއެވެ. އެމީހުން ގެނައީ ދިވެހިންނަށް ނުކުރެވޭ ޒާތުގެ ހަޑި މަސައްކަތް ކުރާށެވެ. ނަމަވެސް މިއަދު ބިދޭސީންގެ ކަންކަން ގޮސްފައި އޮތް ހިސާބުން ހައިރާންވާހާ ވެއެވެ. ހީވާގި ދިވެހި ވަންތަ ބަޔަކު މިއަދު ނެތީއެވެ. ވިޔަފާރި ކުރުމާއި، ކޮންސްޓްރަކްޝަން މަސައްކަތް ކުރުމުގެ އިތުރުން ބިދޭސީންގެ އަތް މިވަނީ ދިވެހި ކަނބަލުން ގޭގައި ތިބެގެން ކުރާ މަސައްކަތްތަކާ ހަމައަށް ވެސް ފޯރާފައެވެ. ނުކުރާކަށް ކަމެއް ނެތެވެ.
ހެދިކާ ހަދަނީ ބިދޭސީންނެވެ. ދިވެހި ވަންތަ ކާނާ ތައްޔާރު ކުރަނީ ބިދޭސީންނެވެ. ދަނޑު ހައްދަނީ ބިދޭސީންނެވެ. ހެދުން ފަހަނީ ބިދޭސީންނެވެ. ވިޔަފާރި ކުރަނީ ބިދޭސީންނެވެ. ކޮންމެ ކަހަލަ ވިޔަފާރި އަކަސްއެވެ. މާރުކޭޓަކަސް، ފަތުރުވެރިކަމުގެ ވިޔަފާރިއަކަސް، ހެދުން ފިހާރައަކަސް، އާދައިގެ ކަންމަތީ ފިހަރައަކަސް، ބޮޑު މޯލަކަށް ވިޔަސް ހަމަ ބިދޭސީންނެވެ. ދިވެހިންނަކަށް ޖާގައެއް ނެތެވެ. ދިވެހި ފަސްގަނޑުގައި އެހެން ބަޔަކު، މި ހުރިހާ ކަމެއް ކުރާއިރު، ދިވެހިން މި ޖެހެނީ އެމީހުން ބުނާ ގޮތަކަށް ބުނާ އަގަކަށް ފެތޭށެވެ. އެމީހުން ދިނިއްޔާ ކައިގެން، އެމީހުން ދިނިއްޔާ ބޮއެގެން، އެމީހުން ދިނިއްޔާ ލައިގެންނެވެ. މިއީ ހަމަ ހަގީގަތުގައި ވެސް މިނިވަން ވުން ބާއެވެ.
ރާއްޖޭގައި އޮތް ބިދޭސީންގެ މައްސަލަ ވޭތުވެދިޔަ ދެ މަހެއްގެ ތެރޭގައި މިވަނީ ފަސް އަޅާ ނުފޮރުވޭ ވަރަށް ފުޅާ ވެގެން ގޮސްފައެވެ. އިހުތިޖާޖާއި ހަމަނުޖެހުމެވެ. ރަހީނު ކުރުމާއި އަނިޔާއެވެ. ބޮޑު ފިނޮޅުގައި ހިންގި ހަމަނުޖެހުމާ ވިދިގެން ހުޅުމާލޭގައި ހިންގި ހަމަނުޖެހުމެވެ. ފުލުހުންނާ ކުރިމަތިލުމާއި މުދަލަށް ގެއްލުން ދިނުމެވެ. ދެން ވެސް އެތައް މާރާމާރިއަކާއި ފޭރުމެވެ. ވައްކަމާއި އޮޅުވާލުމެވެ. ހިޔަނާތްތެރިވުމުގެ އިތުރުން ހިއުމަން ޓްރެފިކިންއާ ހަމައަށް ވެސް ކަންތައް ވަނީ ގޯސްވެފައެވެ.
ކުރިން ދިވެހިންގެ ތެރޭގައި އޮތް ސަގާފަތާއި އާދަކާދަ މިއަދަކު ފެންނާކަށް ނެތެވެ. ކުރިން ޗުއްޓީ ދުވަސް ދުވަހު އާއިލާތައް އެކީ ހިތްހަމަ ޖައްސާލުމަށް ނިކުމެ އުޅުނު ޕާކު ތަކާއި މައިޒާންތަކުން ފެނުނު އުފާވެރިކަމެއް މިއަދަކު ނެތެވެ. މިއަދު އެ ޕާކުތަކާއި މައިޒާންތައް ފުރާލީ ބިދޭސީންނެވެ. ކުރިން މިނިވަން ދުވަސް ފާހަގަ ކުރުމަށް ކުޅުނު ކުޅިވަރުތަކާއި ކެއްކި ކެއްކުމެއް މިއަދަކު ނެތެވެ. ކުރިން ކުލަ ގަދަކޮށް މިނވަން ދުވަސް ފާހަގަ ކުރި އިރު، އެ ސަގާފަތް ވެސް ގެއްލެމުން ގެއްލެމުން ގޮސް މިއަދު އޮތީ މިނިވަން ދުވަސް ފާހަގަ ކުރުމަށް ނަށާލާ ނަށާލުމަކާއި ކުޅޭ ކުޅިވަރުތައް އެކަންޏެވެ. އެކަމުގައި ތެރޭގައި ވެސް ބިދޭސީންގެ އަތެވެ. މިނިވަން ދުވަހުގެ ކުޅިވަރުތަކަށް ބޭނުންވާ ހެދުމާއި ތައްޔާރު ކުރަން ކުރަން ޖެހޭ އެކިއެކި އެއްޗެހި، ވިޔެ، ފަހާ ހަދަނީވެސް ބިދޭސީންނެވެ. ދިވެހިން މިތިބެނީ ބާކީވެފައެވެ.
މިހާރު ދިވެހިން މިނިވަން ދުވަސް ފާހަގަ ކުރަނީ ޓީވީ ކުރިމަތީގައެވެ. ޓީވީން ދައްކާލާ ލަވައަކާއި ޕްރޮގްރާމެއްގެ އިތުރުން ކޮންމެ އަހަރަކު ވެސް ބާއްވާ ހެވިކަމާއި ކުޅިވަރުގެ ޕްރޮގްރާމްތައް ގޭގައި ތިބެގެން ބަލާލާ ބޭރުން ކާއެއްޗެއް އޯޑަރުކޮށްގެން ކާލީމާ އެއީ މިނިވަން ދުވަސް ފާހަގަ ކުރެވުނީއެވެ. ސޯޝަލް މީޑިއާ ޕްލެޓްފޯމުތަކުގައި މިނިވަން ދުވަހުގެ ތަހުނިޔާގެ މެސެޖުތައް ދައުރުކޮށްލުމުން ނިމުނީއެވެ. މިނިވަން ދުވަހަކީ ހަމައެކަނި ލިބޭ ޗުއްޓީއަކަށް ވަނީ ވެފައެވެ. މިއީ ހަމަ ހަގީގަތުގައި ވެސް މިނިވަން ކަމެއްތޯއެވެ؟
ކީއްވެގެންތޯ އިންޑިޔާގެ ދަށުގަ މިހާރުގެ ދިވެހި ސަރުކާރު އޮތް ވާހަކަ ނުދައްކަނީ