މޫސުމީ ނޭދެވޭ ބަދަލުތަކުގެ ސަބަބުން ކުރިމަތިލާންޖެހޭ ތޫފާންތަކާ، ފެންބޮޑުވުމުގެ ހާދިސާތަކުގައި ގެދޮރު ގެއްލި، ރެފިއުޖީންނަށް ވާ މީހުންނަށް ބޯހިޔާވަހިކަން ފޯރުކޮށްދިނުމަށް ހާއްސަކޮށްގެން އަވަށްޓެރި ބަންގްލަދޭޝްއިން ހައުސިންގް ޔުނިޓްތަކެއް އަޅައިފިއެވެ.
20 ބްލޮކެއް ހިމެނޭ ގޮތަށް މި ހައުސިންގް ޔުނިޓްތައް އަޅާފައިވަނީ، މިޔަންމާގެ މިލިއަނެއްހާ ރޯހިންޏާ ރެފިއުޖީން މިހާރުވެސް ބަންގްލަދޭޝްގައި ދިރިއުޅެމުންދާ ކޮކްސް ބާޒާރު ސަރަހައްދުގައެވެ.
އަލަށް ހުޅުވި ހައުސިންގް ޔުނިޓްތަކަކީ ގާތްގަނޑަކަށް 650 އާއިލާއަކަށް ބޯހިޔާވަހިކަން ފޯރުކޮށްދެވޭނެ ކަމަށް ޚަބަރު ލިބެއެވެ. އަދިވެސް މިފަދަ އިތުރު ހައުސިންގް ޔުނިޓްތަކެއް އެޅުމުގެ މަސައްކަތް އެ ގައުމުން ކުރިއަށް ގެންދާ ކަމަށް މައުލޫމާތު ލިބެއެވެ.
މޫސުމީ ނޭދެވޭ ބަދަލުތަކުގެ ސަބަބުން އެންމެ ބޮޑު ތަކުލީފެއް އުފުލަންޖެހިފައިވާ އެއް ގައުމަކީ ބަންގްލަދޭޝްއެވެ. ދުނިޔެ ހޫނުވަމުންދާއިރު، އެންމެ ނުރައްކާ ބޮޑު ގައުމުތަކުގެ ލިސްޓުންވެސް ބަންގްލަދޭޝް ޖާގަ ހޯދައެވެ.
ބަންގްލަދޭޝްއިން އަލަށް ހުޅުވި ހައުސިންގް ޔުނިޓްތަކުން އެޕާޓްމަންޓް ލިބުނު މީހުންގެ ތެރޭގައި 1991 ވަނަ އަހަރު ތޫފާނުގައި ގެދޮރު ގެއްލިދިޔަ މީހުންވެސް ހިމެނެއެވެ.
