އިންޑިއާއާއި ވިލާތުގެ އިއްތިހާދު (އީޔޫ)ގެ ގުޅުމަކީ، ދުނިޔޭގެ ހަމަޖެހުމާ ސުލްހައަށް ކޮންމެހެން ބޭނުން ކަމެއް ކަމަށް އިންޑިއާގެ ބޮޑުވަޒީރު ނަރޭންދްރާ މޯދީ ވިދާޅުވެއްޖެއެވެ.
މޯދީ މިމޭރުމުން ވާހަކަފުޅު ދެއްކެވީ، އިންޑިއާއާއި ވިލާތުގެ އިއްތިހާދުގެ ގުޅިފައިވާ (ވާޗުއަލް) ސަމިޓްގައި ތަގުރީރު ކުރައްވަމުންނެވެ.
" އިންޑިއާއާއި ވިލާތުގެ އިއްތިހާދުގެ ގުޅުމަކީ، ދުނިޔޭގެ ހަމަޖެހުމާ ސުލްހައަށް ކޮންމެހެން ބޭނުން ކަމެއް. ދުނިޔެއަށް މިއަދު ކުރިމަތިލާންޖެހިފައި މިވާ ހާލަތުގައި، މި ހަގީގަތް ވަކިން ސާފުކޮށް މިއޮތީ ފެންނަން" މޯދީ ވިދާޅުވިއެވެ.
ތަގުރީރު ކުރިއަށް ގެންދަވަމުން މޯދީ ވިދާޅުވީ، ޑިމޮކްރަސީއާ، މިނިވަންކަމާ، ދެފުށްފެންނަ އުސޫލްތަކާ، ބައިނަލްއަގުވާމީ މުއައްސަސާތަކަށް އިހުތިރާމް ކުރުމަކީ އިންޑިއާއާއި އީޔޫއިންވެސް ގަބޫލު ކުރާ އުސްލޫބުތަކެއް ކަމަށެވެ.
މިއަދު ދުނިޔެއަށް ކުރިމަތިވެފައިވާ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމުގެ ހާލަތަށް ރިއާޔަތް ކުރައްވަމުން މޯދީ ވިދާޅުވީ، މިއީ ޑިމޮކްރަސީތަކުން އެކަތިގަނޑަކަށް ވާންވީ ވަގުތު ކަމަށެވެ.
މި ސަމިޓްގައި ވާހަކަދައްކަވަމުން ޔޫރަޕިއަން ކައުންސިލްގެ ރައީސް ޗާލްސް މިޝެލް ވަނީ އިންޑިއާގެ ބަދަހި ގުޅުމަށް ޝުކުރު އަދާކުރައްވާފައެވެ. އަދި ކޮވިޑް-19އާ ދެކޮޅަށް ކުރަމުންދާ ހަނގުރާމާގައި ބައިނަލްއަގުވާމީ ފެންވަރުގަޔާ، ގައުމީ ފެންވަރުގައި އިންޑިއާއިން އަދާ ކުރަމުންދާ މުހިންމު ދައުރަށްވެސް އޭނާ ވަނީ ތައުރީފު ކުރައްވާފައެވެ.
