ބޮޑެތި ޖިނާއީ ޖަރީމާތަކެއް ހިންގި ކަމުގެ ތުހުމަތުގައި އިންޑިއާގެ ކަމާބެހޭ ފަރާތްތަކުގެ ބެލުމުގެ ދަށަށް ގެންދިޔަ ވިކާސް ދުބޭ މިއަދު މަރާލަން ޖެހުނީ ބަންދުގައި ހުރެ، ފިލަން މަސައްކަތް ކުރަން އުޅުމުގެ ތެރޭގައި ކަމަށް އިންޑިއާގެ އޮފިޝަލުން ވިދާޅުވެއްޖެއެވެ.
ފާޑުކިއާ މީހުންނާއި ސަރުކާރާ އިދިކޮޅު ފަރާތްތަކުން ބުނަމުން ދަނީ މިއީ އިންޑިއާގެ ކަމާބެހޭ ފަރާތްތަކުން 'ރާވައިގެން ކުޅުނު ޑްރާމާ"އެއް ކަމަށެވެ.
އިންޑިއާ ފުލުހުންގެ އޮފިސަރެއް ކަމަށްވާ މޯހިތު އަގަރުވާލް ވިދާޅުވީ، ކަމްޕޫރު ސިޓީ ކައިރީގައި އޮންނަ ހައިވޭ މަތިން ދުއްވާފައި ދިޔަ ވެހިކަލް ފުރޮޅާލުމާއެކު ފުލުހުންގެ އަތުން ބަޑިއެއް އަތުލިކަމަށެވެ. އަދި ވިކާސް ދުބޭ މަރާލީ ހަމަލާ ބަދަލުކުރުން ތަކެއްގައި ކަމަށްވެސް އޭނާ ވަނީ ވިދާޅުވެފައެވެ.
ކަމާބެހޭ ފަރާތްތަކުން އޭނާ ހޯދަމުން ދިޔަތާ ހަފުތާއެއް ފަހުން، ބުރާސްފަތި ދުވަހު، ވިކާސް ދުބޭ ފުލުހުންނާ ހަވާލުވީ އޭނާ އަމިއްލައަށެވެ. ފުލުހުންނާ އޭނާ ހަވާލުވީ އުއްޖައިންއޭ ކިއުނު ސަރަހައްދުން ކަމަށް ވާއިރު، ވިކާސް ދުބޭ މަރާލި ހަމަނުޖެހުންގަނޑު ހިނގީ، މީގެ ހަފުތާއެއްހާ ދުވަސް ކުރިން 8 ފުލުސް އޮފިސަރެއް މަރާލި ހާދިސާ ހިންގި ކަންޕޫރަށް ދަތުރު ކުރަމުން ދިޔަ މަގުމަތީގައެވެ.
ޖަންޕޫރުގައި ފުލުހުންގެ 8 އޮފިސަރަކު މަރާލުމުގެ އަމަލު ހިންގާފައިވަނީވެސް ވިކާސް ދުބޭގެ އޯޑަރަކަށް ކަމަށް ތުހުމަތު ކުރެވެއެވެ. ތުހުމަތު ކުރެވޭ ގޮތުގަ ވިކާސް ދުބޭއަކީ ސްޓޭޓް ފެންވަރުގެ ސިޔާސީ ޝަހްސުންނާ ފުލުހުންނާވެސް ގުޅުން އޮންނަ ގޭންގްސްޓާރެކެވެ. ވިކާސް ދުބޭ ދިރިއުޅެމުންދިޔަ ގެ ރެއިޑް ކުރުމަށް މިދިޔަ ހުކުރު ދުވަހު ފުލުހުން ދާން އުޅޭ ކަމުގެ މައުލޫމާތު، އޭނާއަށް ފޯރުކޮށްދިން ކަމުގެ ތުހުމަތުގަ 2 ފުލުހަކުވެސް މިހާރު ވަނީ ވަޒީފާއިން ވަކިކޮށްފައެވެ.
ވިކާސް ދުބޭ އަކީ ތަފާތު އެކި ކަހަލަ ޖިނާއީ މައްސަލަތަކުގައި ތުހުމަތު ކުރެވޭ ގޭންގްސްޓާރަކަށް ވާއިރު، އޭނާއަށް ޖިނާއީ ދައުވާ އަމާޒުވާ ކޭސްތަކުގެ އަދަދު 60 އަށް އަރައެވެ.
އިންޑިއާގެ މައި އިދިކޮޅު ސިޔާސީ ޕާޓީ (ކޮންގްރެސް) ގެ ލީޑަރެއް ކަމަށްވާ އަމާނާތު އަގަރުވާލް ވަނީ، ވިކާސް ދުބޭ މަރާލުމަކީ އިންޑިއާގެ ފުލުހުން ރާވައިގެން ހިންގި އަމަލެއް ކަމަށް ތުހުމަތު ކޮށްފައެވެ. ދުރާލާ ރާވައިގެން ވިކާސް ދުބޭ މަރާލާފައިވަނީ، ވިކާސް ދުބޭއަށް ހިމާޔަތާ ރައްކާތެރިކަން ކަށަވަރު ކޮށްދެމުން ދިޔަ މީހުންގެ ނަންތައް ހާމަކޮށްފާނެ ކަމުގެ ބިރަށް ކަމަށްވެސް އޭނާ ވަނީ ތުހުމަތު ކޮށްފައެވެ.
ރާޝްތްރިޔާ ލޮކް ދާލް ޕާޓީގެ ލީޑަރު ޖާޔަންތް ޗޯދްރީގެ ވާހަކަވެސް ހުރީ މިފަދަ ގޮތަކަށެވެ. އެގޮތުން ވިކާސް ދުބޭ މަރާލުމަށް ކުޅުނީ ޑްރާމާއެއް ކަމަށާ، އެކަން ކުރީ ހަގީގީ ކުށްވެރިންގެ ޝަހްސު ސިއްރު ކުރުމަށް ކަމަށް އޭނާ ވަނީ ތުހުމަތު ކޮށްފައެވެ.
އިންޑިއާގެ ސީނިއާ ޖާނަލިސްޓެއް ކަމަށްވާ ސަބާ ނަގުވީ ސިފަކުރި ގޮތުގައި ވިކާސް ދުބޭ މަރާލާފައިވަނީ ގާނޫނީ އިމުން ބޭރުންނެވެ. ގާނޫނުން ވެރިކަން ހިންގުމުގެ މާނައަކީ، 'އުނދަގޫ ބޮޑު' މީހުން، ޝަރިއަތާ ނުލާ މަރާލުން ނޫން ކަމަށްވެސް އޭނާ ކުރި ޓްވީޓެއްގައި ވަނީ ބަޔާންކޮށްފައެވެ.
އިންޑިއާގައި އިންސާނީ ހައްގުތަކަށް ވަކާލާތު ކުރަމުންދާ ގުރޫޕެއް ކަމަށްވާ ނޭޝަނަލް ކެމްޕޭން އަގައިސްޓް ޓޯޗާއިން ހުސްވި މަހު އާންމު ކުރި ރިޕޯޓަށް ބަލާއިރު، 2019 ވަނަ އަހަރު 1731 މީހަކު ވަނީ އިންޑިއާގެ ފުލުހުންގެ ބެލުމުގެ ދަށުގަ ހުއްޓާ މަރުވެފައެވެ. މިއީ ދުވާލަކަށް ބަލާނަމަ 5 މީހުންގެ މަރެވެ. އިންސާނީ ހައްގުތަކަށް ވަކާލާތު ކުރާ ފަރާތްތަކުން ދަނީ، މިފަދަ މަރުތައް ތަހުގީގު ކުރުމަށް ޑިމާންޑް ކުރަމުންނެވެ.
