އިސްރާއީލުން ފަލަސްތީނުގެ ބިންތަކަށް ވެރިވެގަތުމަށް ކުރަމުން ގެންދާ މަސައްކަތް އަދި ފަލަސްތީނުގެ ރައްޔިތުންނަށް ދެމުންގެންދާ އިންސާނިއްޔަތާ ހިލާފު އަމަލުތައް ކުށްވެރިކޮށް، އެ އަމަލުތައް ހުއްޓާލުމަށް ގޮވާލާ ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މި ގަރާރު ހުށަހެޅީ ވިލިނގިލި ދާއިރާގެ މެންބަރު ސައުދު ހުސެއިނެވެ. މި ގަރާރުގައި ފަލަސްތީނަކީ މިނިވަން ދައުލަތެއް ކަމަށް ބަލައިގަތުމަށް ބައިނަލްއަގްވާމީ މުޖުތަމައަށް ގޮވާލާ، ރާއްޖޭގެ ރައްޔިތުންގެ މަޖިލީހުން ދެކޭގޮތް ހާމަކުރުމަށް ވަނީ ގޮވާލާފައެވެ.
އެ ގަރާރުގައި ބުނީ 1967 ވަނަ އަހަރު އެކުލަވާލި ފަލަސްތީނުގެ ސަރަހައްދީ އިމުގެ ތެރޭގައި ފަލަސްތީނުގެ މިނިވަން ދައުލަތެއް ގާއިމްކޮށް، އެ ދައުލަތުގެ ވެރިރަށަކީ އިރުމަތީ ގުދުސް ކަމަށް ރާއްޖެއިން އަބަދުވެސް ގަބޫލު ކުރާ ކަމަށެވެ. އަދި އިސްރާއިލުން ފަލަސްތީނުގެ އިތުރު ބިންތައް ފޭރިގަނެ އެބިންތަކަށް ވެރިވުމަކީ ފަލަސްތީނާއި އިސްރާއިލު ސުލްހަވެ ވަކި ދެ ދައުލަތެއް ގާއިމް ކުރަން ކުރާ މަސައްކަތަށް އެޅޭ ހުރަހެއް ކަމަށެ އެ ގަރާރުގައިވެއެވެ.
ސައުދު ވިދާޅުވީ، ފަލަސްތީނުގެ ރައްޔިތުންނާމެދު ހިންގާ ލާއިމްސާނީ އަމަލުތައް ހުއްޓުމެއް ނެތި ތަކުރާރުވަމުން ދިއުމަކީ އިންސާނީ ކަރާމާތާއި އިންސާނީ ޝަރަފް ނަގާލުން ކަމަށެވެ. އެއީ ބައިނަލްއަގްވާމީ ގާނުނުތަކާއި ކަނޑައެޅުގެން ހިލާފު ކަމެއްކަން ފާހަގަ ކުރައްވާ އެނާ ވިދާޅުވީ، އެ އަމަލުތައް ވަގުތުން ވަގުތަށް ހުއްޓާލުމަށް ގޮވާލުމަކީ އިސްރާއިލުގެ އަނިޔާވެރި އަމަލުތައް ހުއްޓުވުމަށް ކުރެވޭނެ މަސައްކަތެއް ކަމަށެވެ.
އޭނާ ވިދާޅުވީ ރާއްޖެވެސް ބައިވެރިވެފައިވާ އދގެ ސަލާމަތީ މަޖިލީހުގެ ގަރާރުތަކަށް އިސްރާއިލުން ބޯނުލަނބާ މައްސަލާގައި އެގައުމު ޖަވާބުދާރީ ކުރުވަން ބައިނަލްއަގްވާމީ މުޖުތަމައަށް ގޮވާލުމަކީ ވެސް މުހިންމު ކަމެއް ކަމަށެވެ.
މި ގަރާރުގައި ބުނީ ރާއްޖޭގެ ރައްޔިތުންނަކީ އަބަދުވެސް ފަލަސްތީނުގެ ލޮބުވެތި އަހުންނާއި އުހްތުންނަށް ލޯބިކުރާ އަދި އަހްވަންތަކަމާއި އުހުއްވަތްތެރިކަން ދެމެހެއްޓުމަސް ކެނޑިނެޅި މަސައްކަތް ކުރާ ބައެއް ކަމަށެވެ. އެހެންކަމުން މިފަދަ ހިތްދަތި ވަގުތެއްގައި ދިވެހި ރައްޔިތުންނާއި މަޖިލީހުން ތިބީ ފަލަސްތީނުގެ ރައްޔިތުންނާއެކުކަން ހާމަކުރުމަކީ ބައިނަލްއަގްވާމީ ޖަމިއްޔާ ޖަމާއަތްތަކަށް އިތުރު ކުރިއެރުމަކަށް ވެގެން ދާނެ ކަމެއް ކަމަށް ސައުދު ވިދާޅުވެއެވެ.
މިފަދަ ގަރާރެއް މަޖިލީހަށް ހުށަހަޅާފައިވާއިރު، ބައިނަލްއަގްވާމީ ކޮންފަރެންސެއްގައި، ދިވެހިރާއްޖެ ތަމްސީލް ކުރައްވާ ވާހަކަދައްކަވަމުން އިސްލާމިކް މިނިސްޓަރު، ޑރ. އަހްމަދު ޒާހިރު އަލީ ވަނީ ފަލަސްތީނުގެ މައްސަލައަކީ ދީނާއި އަގީދާ އާ ގުޅިފައިވާ މައްސަލައެއް ކަމަށް ވިދާޅުވެފައެވެ. އަދި އެތަނެއްގައި މުސްލިމުންގެ ގިބްލައެއް ކަމުގައިވާ އަލް މަސްޖިދުލް އަގަސާ ހުރުމުގެ ސަބަބުންވެސް އެތަން ހިމާޔަތްކޮށް ރައްކާތެރިކުރުމަކީ ދީނީ ވާޖިބެއްކަމަށް އޭނާ ވިދާޅުވިއެވެ.
މީގެ އިތުރުން، އިސްރާއީލުން ފަލަސްތީނުގެ ރައްޔިތުންނާމެދު ހިންގަމުންދާ ލާއިންސާނީ އަމަލުތަކާއި، މިނިވަން ދެ ދައުލަތެއްގެ ގޮތުގައި ފަލަސްތީނާ އިސްރާއީލް އޮތުމަށް ކުރެވޭ މަސައްކަތަށް ހުރަސް އެޅޭގޮތަށް އިސްރާއީލުން ހިންގަމުންދާ އަމަލުތައް ރާއްޖެއިން ވަނީ ކުށްވެރިކޮށްފައެވެ.
