ހިޔާ މަޝްރޫގެ ދަށުން ބިނާ ކޮށްފައިވާ ފްލެޓްތަކާ ގުޅުވައިގެން ދޮގު ވާހަކަތައް ސަރުކާރުން ފަތުރާ ކަމަށް ތުހުމަތުކޮށް، ދޮގު ވާހަކަ ނުފަތުރާ އެތަނުގެ ކުލީގެ ގޮތުގައި ކުރީގެ ރައީސް އަބްދުﷲ ޔާމީންގެ ސަރުކާރުގައި ދޭން ހަމަޖެއްސި އަގުގައި އޭގެ ހައްވެރިންނަށް ދިނުމަށް އިދިކޮޅު ކޯލިޝަނުން ގޮވާލައިފިއެވެ.
އިދިކޮޅުން ނެރުނު ބަޔާނެއްގައި ބުނީ ހިޔާ ފްރޮޖެކްޓްގެ ދަށުން ހުޅުމާލޭގެ ދެވަނަ ފިޔަވަހީގައި ގާއިމް ކޮށްފައިވާ 7000 ފްލެޓާ ގުޅުވައިގެން ރައީސް އިބްރާހިމް މުހައްމަދު ސޯލިހާއި މި ސަރުކާރުގެ އިސްވެރިން ރައްޔިތުންނަށް ހަގީގަތް އޮޅުވާލާ ކަމަށާ އެކަން ހަރުކަށި އިބާރާތުން ކުއްވެރި ކުރާ ކަމަށެވެ.
މިދިޔަ އަހަރުގެ ޖުލައި ގައި އޭގެ ހައްގު ވެރިންނަށް ހަވާލު ކުރުމަށް އޭރު ނިންމާފައި ވަނީ ފިނިޝިންގެ މަސައްކަތާއި އެއްކޮށް ކަމަށްވެސް އެ ބަޔާނުގައި ވެއެވެ. ހިޔާ ފްލެޓް ތަކުުގެ ސައިޒުގައި 550 އަކަފޫޓު ހުންނަ އިރު، އެ ފްލެޓްތައް ރައްޔިތުންނަށް ދޫކުރުމަށް ރައީސް ޔާމީންގެ ސަރުކާރުން ހަމަޖެއްސީ 6600 ރުފިޔާ އަށް ކަމަށާއި އެއީ ކުއްޔަށް 5600 ރުފިޔާ އާއި މެއިންޓަނަންސް ފީއަށް 1000 ރުފިޔާ ނަގާ ގޮތަށެވެ.
އެ ކޯލިޝަނުން ބުނެފަިއވާ ގޮތުގައި އެ ފްލެޓްތަކުގައި ހުރީ ކުޑަ ކޮޓަރިތަކެއް ނޫން ކަމަށާއި ދޮރާއި ޓައިލްސް ނުހުންނާނެ ކަމަށް ރައީސް އިބްރާހިމް މުހައްމަދު ސޯލިހް ދެއްކެވި ވާހަކަވެސް ވަނީ ދޮގުކޮށްފައެވެ. އެކަން ދޮގު ކުރި އިރު އެތާ ދޮރާއި، ތަށިމުށިފަދަ ތަކެތި ނުލަނީ އެތަނަށް ވަންނަ މީހުން ބޭނުންވާ ގޮތަށް ފިނިޝިން ނިންމަށް ވަންނަ މީހުން ބޭނުން ވާނެތީ އެފުރުސަތު ދޭން ކަމަށް ޔާމީން ސަރުކާރުންވެސް ކުރިން ބުނެފައި ވެއެވެ.
ކޮވިޑް-19އާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްްކަވަމުން ރައީސް ސޯލިހް ވިދާޅުވެފައި ވަނީ ކުރީގެ ސަރުކާރުން ފެށި އެ މަޝްރޫއަކީ ބޭކާރު، ބޮޑު ހަރަދެއް ކަމަށާއި އެ ތަނަށް ވަންނަ މީހުންގެ ތެރެއިން 80 ޕަސެންޓް މީހުން އެތަން ދޫކޮށްފައި ނުކުންނާނެ ކަމަށެވެ. ނަމަވެސް އެހެން ގޮތެއް ނެތް މީހުން އެތަނުގެ ތެރޭގައި ތިބޭނެ ކަމަށްވެސް ރައީސް ވިދާޅުވިއެވެ. އަދި ރައީސް ވިދާޅުވީ މަޝްރޫއު ފުރަތަމަ ޕްލޭންކޮށްފައި އޮތް ގޮތުން ފްލެޓުތަކުގައި ޓައިލްސް ނެތް އިރު، އެތެރޭގައި ދޮރުތަކެއްވެސް ނެތް ކަމަށެވެ.
އެޗްޑީސީ އިން މި ފަހުން ބުނެފައި ވަނީ، އެ މަޝްރޫއުގެ އަގުތައް ހަދާފައި ހުރީ އެޕާޓުމަންޓް ތަކުގެ ފިނިޝިން ޗާޖު ނުލައި ކަމަށާއި، މިހާރު ހުރިހާ ހަރަދުތަކެއް ހިމަނައިގެން އެ ކޮންޓްރެކްޓް ނިމޭއިރު ޔުނިޓަކަށް ގާތްގަނޑަކަށް 1.2 މިލިއަން ރުފިޔާ އަރާ ކަމަށެވެ. އެއީ ފްލެޓަކަށް ކުލީގެ ގޮތުގައި މަހަކު 11،000 ރުފިޔާ ޖެހޭ ވަރުގެ ބޮޑު އަދަދެކެވެ.
ހިޔާ މަޝްރޫއުގެ ދަށުން ހުޅުމާލޭގައި އިމާރާތް ކުރަމުން އަންނަ 7،000 ފްލެޓްގެ ޖާގަ ކުޑަކަމުން ޑިޒައިނަށް ބަދަލު ގެންނަން މި ސަރުކާރުން ވިސްނިއެވެ. ހައުސިން ޑިވެލޮމްޕަންޓް ކޯޕަރޭޝަން (އެޗްޑީސީ) ން ކުރިން ބުނެފައިވާ ގޮތުގައި ދެ ކޮޓަރީގެ ފްލެޓްތައް ތިން ކޮޓަރި އަށް ބޮޑުކުރުމުން ފްލެޓްތަކުގެ އަދަދު 3،588 އަަށް މަދުވާނެއެވެ. ނަމަވެސް ކަމާބެހޭ އިދާރާތަކުން މަޝްވަރާ ކުރުމަށް ފަހު ނިންމީ އަދަދު މަދު ނުކުރުމަށެވެ.
