އައްޑޫ ސިޓީ މީދޫ އިން އަންހެނަކު ގެއްލިގެން ހޯދަން ފަށައިފިއެވެ.
މިކަމާއި ގުޅިގެން ފުލުހުން މިރޭ ބުނީ އެމީހާ ގެއިން ނިކުތީ މިއަދު ހެނދުނު 7:30ގައި ކަމަށެވެ. އުމުރުން 52 އަހަރުގެ އެ އަންހެން މީހާ އޭރު ގެއިން ނިކުމެގެން ދިޔަ ގޮތަށް އެނބުރި ގެއަށް އައިސްފައި ނުވާ ކަމަށްވެސް ފުލުހުން ބުންޏެވެ.
އަދި އެ އަންހެން މީހާ ގެއްލިގެން މިރޭ 7:40 ހާއިރު މައްސަލައެއް ހުށަހަޅާފައިވާ ކަމަށްވެސް ފުލުހުން ވަނީ ބުނެފައެވެ.
ފުލުހުން ބުނީ އެމީހާ ހޯދުމުގެ މަސައްކަތް ކުރަމުން އަންނަ ކަމަށެވެ.
ފުލުހުން، އެމީހާ ގެއިން ނިކުމެގެން ގޮސްފައި ވަނީ ހެނދުނު 7:30ގައި ކަމަށް ބުނި ނަމަވެސް އެ މީހާގެ ދަރިޔަކު ފޭސްބުކްގައި ބުނެފައި ވަނީ އޭނާގެ މަންމަ ސ. މީދޫ ވެހި، މަރިޔަމް މަނިކުފާނު ގެއްލިފައި ވަނީ ރޭ ދަންވަރު ކަމަށެވެ. އަދި އެއްވެސް މައުލޫމާތެއް އެނގޭ މީހަކު ހުރިނަމަ 9132132 އަށް ގުޅާ އާއިލާ އަށް އެކަން ހިއްސާ ކޮށްދިނުމަށް ވެސް އޭނާ ވަނީ އެދިފައެވެ.
