ކޮވިޑް19 އާއި ގުޅިގެން އަޅާފައިވާ ފިޔަވަޅުތަކަށް ލުއިތަކެއް ދީ ޒަރޫރީ ބޭނުންތަކަށް ވިޔަފާރި ކުރުމަށް ދީފައިވާ ފުރުސަތުގައި ވިޔަފާރިތައް ހުޅުވާފައި ބެހެއްޓޭނެ ވަގުތުތައް އިކޮނޮމިކް މިނިސްޓްރީން ހާމަކޮށްފިއެވެ.
އިކޮނޮމިކް މިނިސްޓްރީން ބުނީ ފިހާރަތައް ހުޅުވާފައި ބެހެއްޓޭނީ ހެނދުނު 9:00 އިން ފެށިގެން ރޭގަނޑު 9:00އަށް ކަމަށެވެ. އަދި ޑެލިވަރީގެ ހިދުމަތްތައް ދެވޭނީ ހެނދުނު 9:00 އިން ރޭގަނޑު 11:00އާ ހަމައަށް ކަމަށް އިކޮނޮމިކް މިނިސްޓްރީން ވަނީ ބުނެފައެވެ. ސައިހޮޓާތަކާއި ކެފޭ ރެސްޓޯރަންޓުތަކަށް ޑެލިވަރީގެ ހިދުމަތް ފޯރު ކޮށްދެވޭނީ ހެނދުނު 9:00 އިން ރޭގަނޑު 11:00އަށް ކަމަށްވެސް އިކޮނޮމިކް މިނިސްޓްރީން ބުނެއެވެ.
އިކޮނޮމިކް މިނިސްޓްރީން ވިޔަފާރި ކުރެވޭނެ ގަޑިތަކާއި ވިޔަފާރިތައް ހުޅުވާފައި ބެހެއްޓޭނެ ގަޑިތައް ހާމަކުރިއިރު ނިއު ނޯމަލް އުސޫލުގައިވާ ގޮތުން އަންނަ މަހުގެ ތެރޭގައި ފިހާރަތަކަށް ވަދެ ނިކުތުމުގައިވެސް އިތުރު ލުއިތަކެއް ދިނުމަށް ނިންމާފައިވެއެވެ. އެގޮތުން ފިހާރަތަކަށް ވަނުމުގައި މާސްކު އެޅުމާއި އަދި އެއްފަހަރާ ގިނަ އަދަދެއްގެ ކަސްޓަމަރުން ފިހާރައަށް ނުވަނުން ހިމެނެއެވެ. މީގެއިތުރުން ހަފްތާއަކަށް ވާވަރަށް ތަކެތި ގަތުމަށްވެސް އުސޫލުގައި ބަޔާންކޮށްފައިވެއެވެ. ނަމަވެސް ޖުލައި މަހުގެ ތިންވަނަ އަދި ހަތަރުވަނަ ހަފްތާގައި، ހަފްތާއަކަށް ވާވަރަށް ތަކެތި ގަތުމަށް ލުއިތަކެއް ދީފައިވެއެވެ. ސެޕްޓެމްބަރު މަހު އެއްކޮށް އާއްމު ހާލަތަށް ގެނެވޭނެ ކަމަށް ލަފާކޮށް އަޅާފައިވާ ފިޔަވަޅުތައް ވަނީ ނަގާފައެވެ.
ކެފޭ ރެސްޓޯރަންޓުތައް އާއްމުންނަށް ހުޅުވާލާނެ ކަމަށް އުސޫލުގައި ބުނެފައި ވަނީ އަންނަ މަހުއެވެ. އަންނަ މަހު ހުޅުވާލި ނަމަވެސް ކެފޭތަކުގައި ދުންފަތުގެ އިސްތިއުމާލު ކުރުމާއި ޝީޝާ ބުއިމާއި ވޭޕް ކުރުން ފަދަ ކަންކަން ވަނީ މަނާކޮށްފައެވެ. އެގޮތުން މި ފިޔަވަޅުތައް ވެސް އޮގަސްޓު މަހުގެ ނިޔަލަށް އަޅާފައިވެއެވެ. ނަމަވެސް ފިޔަވަޅުތައް ނަގާނެ ކަމަށް ބުނެފައިވަނީ ސެޕްޓެމްބަރު މަސް ތެރޭގައެވެ.
ރާއްޖެއިން ކޮވިޑް19 އެންމެ ފުރަތަމަ ފެނުނީ މިދިޔަ މާޗު މަހުއެވެ. ނަމަވެސް އޭރު އެހާ ބޮޑަށް ރާއްޖޭގައި މި ބައްޔެއް ނުފެތުރެއެވެ. މިބަލި ކުއްލިއަކަށް ފެތުރެން ފެށީ މިދިޔަ މަހުގެ 15ވަނަ ދުވަހު މާލެއިން މީހަކު މިބައްޔަށް ޕޮޒިޓިވްވުމާއި އެކުގައެވެ. އެއާއިއެކު ސަރުކާރުގެ ކަމާ ގުޅުންހުރި އިދާރާތަކުން ވަނީ މިކަމާއި ދެކޮޅަށް ގިނަ ފިޔަވަޅުތަކެއް އަޅާފައެވެ.
