ކޮވިޑް19 އާ ގުޅިގެން މިހާރު އަމަލު ކުރަން ނިންމާފައިވާ ނިއު ނޯމަލްގައި ޓެކްސީ އެމްބިއުލާންސް ޑްރައިވަރުންގެ ސީޓު ވަކި ޕާޓީޝަނެއް ޖަހާ ވަކި ކުރަން ޖެހޭ ކަމަށް ބުނެފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނެރެފައިވާ އުސޫލެއްގައި ބުނީ ކާރު ހުންނަން ވަނީ ޓްރާންސްޕޯޓު އޮތޯރިޓީގެ މިންގަނޑަށް ފެތޭގޮތަށް ކަމަށެވެ. މިގޮތުން އެކާރުގެ ރޯޑްވާދިނަސް ފުރިހަމަވާން ވާނެ ކަމަށްވެސް އުސޫލުގައި ބުނެފައިވެއެވެ. ޓްރާންސްޕޯޓް މިންގަނޑު ތަކަށް އުޅަނދު ހުރުމާއެކު އުޅަނދުގެ ޑްރައިވަރު ސީޓް ހުންނަން ވާނީ މުޅިން ވަކިން ޕާޓިޝަނެއްގައި ކަމަށްވެސް އުސޫލުގައިވެއެވެ. ޕާޓިޝަން ޖެހުމަށް ބޭނުންކުރާ މެޓީރިއަލް އަކީ ފެން ނުފާއްދާ ފަސޭހައިން ސާފުކުރެވޭ އެއްޗަކަށް ވާންވާނެ ކަމަށްވެސް އުސޫލުގައި ބަޔާންކޮށްފައިވެއެވެ.
އެ އުސޫލުގައި ބުނެފައިވަނީ ބަލިމީހާ ގޮވައިގެން ދަތުރު ކުރާއިރުގައި އުޅަނދުގެ ކުޑަދޮރުތައް ހުންނަން ވާނީ ހުޅުވާފައި ކަމަށެވެ. އުޅަނދުގައި ސީޓު ނުވަތަ ސީޓު ކަވަރު ހަދާފައި ހުންނަން ވާނީ ފެން ނުފާއްދާ ފަސޭހައިން ސާފުކުރެވޭ މެޓީރިއަލް އަކުން ކަމަށާއި އަދި ސީޓުގެ ކަވަރު ހުންނަން ވާނީ ބަލި މީހާ ހޮޑުލެވުން ފަދަ ކަމެއް ދިމާވާ ހާލަތެއްގައި ކާރު ރަނގަޅަށް ސާފުކޮށް ޑިސްއިންފެކްޓް ކުރެވޭ ގޮތަށް ކަމަށްވެސް އެޗްޕީއޭގެ އުސޫލުގައިވެއެވެ.
ކާރުގައި ނުވަތަ އުޅަނދުގައި ރަނގަޅު ކޮމިއުނިކޭޝަން ސިސްޓަމެއް ހަރު ކުރެވިފައި ހުންނަންވާނެ ކަމަށްވެސް އުސޫލުގައިވެއެވެ. އިމަޖެންސީ ހާލަތުގައި ފަސޭހައިން ބޭނުން ކުރެވޭނެ ސައުންޑް ސިސްޓަމް ކާރުގައި ނުވަތަ އުޅަނދުގައި ހަރުކުރެވފައި ހުންނަންވާނެ ކަމަށްވެސް އުސޫލުގައި ބުނެފައިވެއެވެ. ޑްރައިވަރު ހުންނަން ވާނީ ޑިސްޕޯސަބަލް މާސްކް އަޅައި އަންގި ލައްވައިގެން ކަމަށްވެސް ބުނެފައިވެއެވެ.
އުޅަނދު ދުއްވުމަށް ނަގާ ޑްރައިވަރު ވާންވާނީ 60 އަހަރުން ދަށުގެ އަދި ދާއިމީ ބައްޔަކަށް ބޭސްފަރުވާ ނުކުރާ މީހަކަށް ކަމަށާއި ޑްރައިވަރަކީ ރޯގާގެ އެއްވެސް އަލާމާތެއް ހުރި މީހަކަށް ވެގެން ނުވާނެ ކަމަށް އެޗްޕީއޭ އިން ބުނެއެވެ. އަދި ކޮވިޑް19 އަށް ޕޮޒިޓިވްވެފައިވާ މީހެއްގެ ކޮންޓެކްޓަކަށްވެސް ވެގެން ނުވާނެ ކަމަށް އުސޫލުގައިވެއެވެ.
ކޮންމެ ދަތުރެއް ފެށުމުގެ ކުރިންނާއި ކޮންމެ ދަތުރެއް ނިމުމުން ކާރު ނުވަތަ އުޅަނދުގެ އެތެރެއާއި ބޭރު ރަނގަޅަށް ސާފު ކުރަންވާނެ ކަމަށާއި ކާރު ނުވަތަ އުޅަނދގުގެ އަތްގަނޑާއި، ހުންގާނު ފަދަ ގިނައިން އަތްލެވޭ ތަންތަން ސާފުކޮށް ޑިސްއިންފެކްޓް ކުރަންވާނެ ކަމަށްވެސް އުސޫލުގައިވެއެވެ.
