ހުސްވި ހަފުތާގައި ޕާކިސްތާނުގެ ބޮޑުވަޒީރު އިމްރާން ހާންއާއި ބައްދަލުވި މީހަކު ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވުމާއެކު، އިމްރާން ހާންވެސް ކޮވިޑް-19އަށް ޓެސްޓު ކުރައްވަން ޖެހިވަޑައިގެންފިއެވެ.
ކޮވިޑް-19އާ ދެކޮޅަށް ޕާކިސްތާނުން ކުރަމުންދާ ހަނގުރާމައަށް އެހީތެރިކަން ފޯރުކޮށްދިނުމުގެ ގޮތުން އިމްރާންގެ އަތްޕުޅަށް ޗެކެއް އެރުވި ފައިސައި އީދީ ވަނީ ކޮވިޑް-19އަށް ޕޮޒިޓިވްވެފައެވެ. އީދީއަކީ ޕާކިސްތާނުގައި ހިންގާ ހިލޭ އެހީދޭ އެންމެ ބޮޑު ޖަމިއްޔާގެ އިސްވެރިޔާއެވެ.
ޗެކް ހަވާލުކުރުމަށް ކުރިއަށްދިޔަ ރަސްމިއްޔާތުގެ މަންޒަރުތައް ސޯޝަލް މީޑިއާގައި މިހާރު ދައުރުވަމުންދާއިރު، އިމްރާންއާއި އީދީވެސް މާސްކެއް ބޭނުންކުރައްވާތީ ނުފެނެއެވެ.
އިމްރާން ހާންގެ ފިޒީޝަން، ޑރ ފައިސަލް ސުލްތޯން ވިދާޅުވީ، އިރުޝާދަށް ހާން ކިޔަމަންވެވަޑައިގަންނަވާނެ ކަމަށާ، ޚުދު ހާންވެސް ކޮވިޑް-19އަށް ޓެސްޓުކުރައްވާނެ ކަމަށެވެ.
އީދީއާއިއެކު ކުރިއަށްގެންދެވި ބައްދަލުވުމަށްފަހު އިމްރާން ހާން ވަނީ އިސް މަގާމުތަކެއްގައި ތިއްބެވި ގިނަ އަދަދެއްގެ އޮފިޝަލުންނާ ބައްދަލުކުރައްވާފައެވެ. މީގެ އިތުރުން، ވަޒީރުންގެ މަޖިލީހުގެ ބައްދަލުވުމެއްގައިވެސް އިމްރާން ހާން ވަނީ ބައިވެރިވެވަޑައިގެންފައެވެ.
ޕާކިސްތާނުގެ އެންމެ ފަހުގެ ރެކޯޑްތަކަށް ބަލާއިރު 9749 މީހަކު ވަނީ މި ވައިރަހަށް ޕޮޒިޓިވްވެފައެވެ. އަދި މި ބަލީގައި 209 މީހެއްގެ ފުރާނަވަނީ ގެއްލިފައެވެ.
ކަންމިހެން އޮތްއިރު، ޕާކިސްތާނުންވަނީ ކޮވިޑް-19 ފެތުރުން ކޮންޓްރޯލް ކުރުމަށް އެގައުމުން އަޅަމުންދިޔަ ބައެއް ފިޔަވަޅުތަކަށް ލުއި ދޭން ފަށާފައެވެ. އެގޮތުން އަސާސީ ބައެއް ސިނާއަތްތަކުގެ އޮޕަރޭޝަންތައް ފެށުމުގެ ހުއްދަ މީހާރުވަނީ ދީފައެވެ. މީގެ އިތުރުން މިސްކިތްތަކުގައި ޖަމާއަތުގައި ނަމާދު ކުރުން ހުއްޓާލާފައި އޮތް އޮތުންވެސް މިހާރު ވަނީ ނިމުމަކަށް ގެނެސްފައެވެ.
