ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ އެންމެ ފަހުގެ ތަފާސް ހިސާބުތަކަށް ބަލާއިރު، ޕާކިސްތާނުގެ އަމިއްލަ ފަސްގަނޑުގައި މި ބަލީގެ ޝިކާރައަކަށްވެ މަރުވި ރައްޔިތުންނަށްވުރެ، އެމެރިކާގެ ނިއުޔޯކް ސިޓީގައި މަރުވި ޕާކިސްތާނު ރައްޔިތުންގެ އަދަދު އިތުރުކަމަށް ރެކޯޑްތަކުން ދައްކައިފިއެވެ.
އޮފިޝަލުން ވިދާޅުވާ ގޮތުގައި ކޮވިޑް-19 ޖެހިގެން ނިއުޔޯކްގައި މަރުވި 8600 މީހުންގެ ތެރޭގައި، ޕާކިސްތާނުގެ 100 އަށްވުރެ ގިނަ ރައްޔިތުން ހިމެނެއެވެ. ޕާކިސްތާނުގެ ފަސްގަނޑުގައި ކޮވިޑް-19 ޖެހިގެން މަރުވިކަމަށް ރެކޯޑްކޮށްފައި ވަނީ 93 ކޭހެކެވެ. ޕާކިސްތާނުން ކޮވިޑް-19އަށް ޕޮޒިޓިވްވި މީހުންގެ އަދަދު މިހާރު ވަނީ 5374 އަށް އަރާފައެވެ.
ޕާކިސްތާނުގެ ކޮންސިއުލް ޖެނެރަލް ޢާއިޝާ ޢަލީ ވިދާޅުވީ، ނިއުޔޯކް-ނިއުޖާޒީ ސަރަހައްދުގެ ހޮސްޕިޓަލުތަކާ، މީހުން ވަޅުލުމުގެ މަސައްކަތްކުރާ ތަންތަނާ، އާއިލާތަކުން އެއްކުރި މައުލޫމާތަށް ބަލާއިރު ކޮވިޑް-19ގައި މަރުވި ޕާކިސްތާނު މީހުންގެ އަދަދު 100 އަށްވުރެ މައްޗަށް އަރާފައިވާކަމަށެވެ.
އެމެރިކާގެ މަސްރަހަށް ބަލާއިރު ކޮވިޑް-19ގައި އެންމެ ބޮޑު ތަކުލީފެއް އުފުލަމުންދަނީ އާބާދީގެ ނިސްބަތުން ބައިމަދު ޖަމާއަތްތަކުގެ މީހުންނެވެ. އެގޮތުން އެފްރިކާ އެމެރިކާ ދަރިކޮޅުގެ މީހުން މަރުވާ ނިސްބަތްވެސް އިތުރުކަމަށް ރެކޯޑްތަކުން ދައްކައެވެ.
ޕާކިސްތާނުގެ ކޮންސިއުލް ޖެނެރަލް ޢާއިޝާ ވިދާޅުވީ، އިތުރު ތަފާސް ހިސާބުތައް ލިބެމުންދާވަރަކަށް މަރުވި މީހުންގެ އަދަދު އަދިވެސް މައްޗަށް ދިއުން އެކަށީގެންވެއެވެ.
އެމެރިކާގައި މަސައްކަތްކުރައްވާ ޕާކިސްތާނުގެ ޑޮކްޓަރެއް ކަމަށްވާ ސަފްރާޒް މައިމޫން ވިދާޅުވީ، ބަލި ފެތުރިގެން ދިއުމުގައި، އެކަން ކޮންޓްރޯލް ކުރުމަށް ސިއްހީ ތަޖުރިބާކާރުން ދޭ އިރުޝާދަށް އާންމުން ސަމާލުކަން ނުދިނުމަކީ އެންމެ ބޮޑު އެއް ސަބަބު ކަމަށެވެ.
އެމެރިކާގައި އޮންނަ ޕާކިސްތާނުގެ އާބާދީއިން ދަނީ މި ހައްސާސީ ދަނޑިވަޅުގައި އެއްބަޔަކު އަނެއް ބަޔަކަށް ވެދެވެން އޮތް އެންމެ މަތީ ދަރަޖައަކަށް އެއްބާރުލުން ދީ، އެހީތެރިކަން ފޯރުކޮށްދެމުންނެވެ. އެގޮތުން ކޮވިޑް-19ގެ ނުރައްކާ ގިންތިތަކުގައި ހިމެނޭ މީހުންނަށް ހިލޭ ކާބޯތަކެތި ފޯރުކޮށްދިނުމުގެ ޕްރޮގްރާމެއްވެސް ހިންގަމުންދާކަމަށް މައުލޫމާތު ލިބެއެވެ.
