2014 ވަނަ އަހަރު ޔަމަނުގެ ސަރުކާރު ވައްޓާލުމަށްފަހު ވެރިކަމަށް ތަޅާފޮޅަމުންދާ ހަތިޔާރުއެޅި ހޫތީ ހަނގުރާމަވެރިންގެ ކޯޓަކުން، 4 ނޫސްވެރިއެއްގެ މައްޗަށް މަރުގެ ހުކުމް އިއްވައިފިއެވެ.
ހޫތީންގެ ޖުޑީޝަރީ އޮފިޝަލު އަދި ވަކީލެއްގެ ގޮތުގައި މަސައްކަތް ކުރާ ޢަބްދުލްމަޖީދޫ ސޮބްރާ ބުނީ، 4 ނޫސްވެރިއަކު މަރަން ހހުކުމް ކޮށްފައިވަނީ 'ގައްދާރުވުމާ' ޖާސޫސުކުރިކަމުގެ ކުށުގައެވެ.
މި 4 ނޫސްވެރިންނަކީ، އީރާނުގެ އެއްބާރުލުމާއެކު ހަރަކާތްތެރިވަމުންދާ ހޫތީ ހަނގުރާޟަވެރިންގެ ބެލުމުގެ ދަށަށް ގެންގޮސްފައިވާ 10 ނޫސްވެރިންގެ ތެރޭގައި ހިމެނޭ 4 މީހެކެވެ. އެމީހުން ހައްޔަރުކޮށްފައިވަނީ ދުޝްމަނުން އެއްބައިވާ ކަމުގެ ކުށުގެ ތުހުމަތުގައެވެ. ދުޝްމަނުންގެ ގޮތުގައި މާނަ ކުރަމުންދަނީ، ހޫތީންނާ ދެކޮޅަށް 2015 ވަނަ އަހަރުން ފެށިގެން ޔަމަނުގައި ހަނގުރާމަ ކުރަމުންދާ ސައުދީ އަރަބިއްޔާގެ އަސްކަރީ ކޯލިޝަންއެވެ.
ހޫތީންގެ ކޯޓުން މަރުގެ ހުކުމް އިއްވާފައިވަނީ 4 ނޫސްވެރިންނަކީ ޢަބްދުލްޚާލިޤު އަމްރާން، އަކްރަމް އަލް-ވަލީދީ، ހާރިސް ހާމިދު އަދި ތައުފީޤު އަލް-މަންސޫރީއެވެ.
ބާކީތިބި 6 ނޫސްވެރިންގެ މައްޗަށް އިއްޔާވފައިވަނީ ޖަލު ހުކުމެވެ. އެމީހުންގެ މައްޗަށް ޖަލު ހުކުމް އިއްވާފައިވަނީ ދޮގު ޚަބަރާ ތޯތޯ ވާހަކަ ފެތުރުމުގެ ކުށުގައި ކަމަށް ޚަބަރު ލިބެއެވެ.
ބައިނަލްއަގުވާމީ ފެންވަރުގައި ބަލައިގެންފައިވާ ޔަމަނުގެ ސަރުކާރުންވަނީ ހޫތީންގެ ކޯޓުން ނިންމި ނިންމުން ކުށްވެރިކޮށްފައެވެ.
ޔަމަނު ސަރުކާރުގެ އިންފޮމޭޝަން މިނިސްޓަރު މުޙައްމަދު އަލް-އިރްޔާނީ ވިދާޅުވީ، ނޫސްވެރިންތަކެއްގެ މައްޗަށް އިއްވި ޣައިރު ގާނޫނީ މަރުގެ ހުކުމް، ހަރުކަށި އިބާރާތުން ކުށްވެރިކުރާކަމަށެވެ. އެ ޝަރިޔަތަކީ އަދުލު އިންސާފާ ނަޒާހާތްތެރިކަމުގެ އެންމެ ކުޑަ މިންވަރުވެސް ހަމަނުވާ ޝަރިޔަތެއް ކަމަށްވެސް އޭނާ ވަނީ ސިފަކުރައްވާފައެވެ.
ޔަމަނުގެ ގާނޫނު ބުނާ ގޮތުގައި ޖާސޫސު ކުރުމުގެ ކުށް، އެމީހެއްގެ މައްޗަށް ސާބިތުވެއްޖެނަމަ އެމީހެއްގެ މައްޗަށް އަންނާނީ މަރުގެ ހުކުމެކެވެ.
