ދުނިޔޭގައި ހަލުވި ކަމާއެކު ފެތުރެމުންދާ ކޮވިޑް-19 ނުވަތަ ކޮރޯނާ ވައިރަސް ރާއްޖެއިންވެސް ފެނިފައި ވާއިރު، ރާއްޖެއިން ލޭ ލިބުން ދަތިވެފައިވާތީ ތެލަސީމިއާ ކުދިންނަށް ލޭ ހޯދުމަށް އާންމުންގެ އެހީތެރި ކަމަށް ތެލަސީމިއާ ސެންޓަރުން އަދިވެސް ދަނީ އިލްތިމާސް ކުރަމުންނެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރުމަށް މިރޭ ދަރުބާރުގޭގައި ބެއްވި ނޫސްވެރިންގެ ބައްދަލުވުމެއްގައި ކޮވިޑް-19 ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ ތެލަސީމިއާ ސެންޓަރުން އިސްނަގައިގެން މާލޭގައި ކޭމްޕް ތަކެއް ބާއްވަމުންދާ ކަމަށާއި، މިހާތަނަށް 83 ފަރާތަކުން އެ ލޭ ހަދިޔާ ކޮށްފައިވާ ކަމަށެވެ. މި ވަގުތަކީ އާންމުންގެ އެހީތެރިކަން ލޭ އަޅާ ކުދިންނަށް ބޭނުން ވެފައިވާ ދަނޑިވަޅެއް ކަމަށާއި ވެވުނު ވަރަކުން ލޭ ހަދިޔާ ކޮށް އެހީތެރިކަން ފޯރުކޮށްދިނުމަށްވެސް މަބްރޫކް ވަނީ އިލްތިމާސް ކުރައްވާފައެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި މަބްރޫކް ވިދާޅުވެފައި ވަނީ ލޭ އަޅާ ކުދިންނަށް އެންމެ ބޮޑަށް ލޭ ހޯދުމުގައި އެހީތެރިވާ ބަޔަކީ ރާއްޖޭގެ ރިސޯޓުތަކުގެ މުވައްޒަފުން ކަމަށާއި މިހާލަތުގައި އެކަން އެގޮތަށް ކުރެވެން ނެތުމުގެ ސަބަބުން އާންމުނގެ ތެރެއިން އެހީވެވޭނެ ފަރާތްތަކުން ލޭ ހޯދުމަށް އެހީތެރިވުމަށް އެދޭ ކަމަށެވެ.
ލޭ ހަދިޔާ ކުރުމަށް އާންމުންގެ އިހީތެރިކަމަށް ތެލަސީމިއާ ސެންޓަރުން އެދިފައި ވާއިރު، އިދިކޮޅު ޕްރޮގްރެސިވް ކޮންގްރެސް ކޯލިޝަން (ޕީއެންސީ) އިން ވަނީ އެ ޕާޓީގެ ފަރާތުން ތެލެސީމިއާ ކުދިންނަށް ލޭ ހޯދުމަށް ޕްރޮގްރާމެއް ކުރިއަށް ގެންގޮސްފައެވެ. އެ ޕްރޮގަރާމް ގެ ތެރެއިން އެ ޕާޓީގެ އިސްވެރިން ވަނީ ލޭ ހަދިޔާ ކުރައްވާފައެވެ.
